Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 33: Zot traverse la mer rouge

Zistoire 33: Zot traverse la mer rouge

GUETTÉ ki pé arrivé! Sa missié ki pé leve so la baton dan direction la mer Rouge-la c’est Moïse. Bann ki pé deboute a coté li c’est bann Israélite. Mais Pharaon ek tou so l’armée pé noyé dan de l’eau. Anou guetté couma sa finn arrivé.

L’armée bann Égyptien noyé

Couma nou’nn aprann, apré ki Bondié envoye 10eme plaie lor bann Égyptien, Pharaon dire bann Israélite quitte l’Égypte. Apepré 600,000 zom Israélite allé, ek ena aussi bann femme ek bann zenfant. Ena aussi enn bon quantité dimoune ki commence croire dan Jéhovah, zot aussi zot al ensam avek bann Israélite. Zot tou inn prend zot mouton, cabri ek boeuf ar zot.

Avant ki zot allé, bann Israélite demann bann Égyptien bann linge ek bann lezot kitsoz ki en or ek en argent. Bann Égyptien inn gagne extra peur a cause sa dernier plaie-la. Alors, zot donne bann Israélite tou seki zot demandé.

Apré deux-trois jour, bann Israélite arrive kot la mer Rouge, ek zot campe la. Pendant sa le temps-la, Pharaon ek so bann zom pé commence regretté ki zot inn dire bann Israélite allé. Zot dire: ‘Nou finn laisse nou bann esclave allé!’

Alors Pharaon change so l’idée encore enn coute. Desuite li donne l’ordre pou prepare so calesse la guerre ek so l’armée. Li commence galope derriere bann Israélite avek 600 calesse special, ek tou bann lezot calesse ki ti ena dan l’Égypte.

Letan bann Israélite trouve Pharaon ek so l’armée pé vinn derriere zot, zot commence gagne peur. Pena okenn chemin sorti. Enn coté ena la mer Rouge ek lot coté ena bann Égyptien ki pé vinn dan zot direction. Mais Jéhovah mette enn nuage entre so peuple ek bann Égyptien. Coumsa bann Égyptien pa ti kapav trouve bann Israélite pou attak zot.

Lerla, Jéhovah demann Moïse pou leve so baton dan direction la mer Rouge. Kan li faire sa, Jéhovah faire enn grand di-vent levé depuis l’est. La mer divise en deux, ek de l’eau tini deux coté.

Lerla bann Israélite commence marche a travers la mer Rouge lor enn la terre sec. Sa finn prend zot beaucoup le temps pou ki tou sa million dimoune-la ensam avek zot zanimo traverse la mer depuis enn boute ziska lot boute. A la fin, bann Égyptien reussi trouve bann Israélite. Zot bann esclave ti pé sauvé! Alors, zot degazé rente dan la mer.

Couma zot faire sa, Bondié faire zot la roue calesse sorti. Letan bann Égyptien trouve sa zot gagne extra peur ek zot commence criyé: ‘Jéhovah pé laguerre kont nou, pou bann Israélite. Anou sauvé!’ Mais trop tard.

Lerla mem Jéhovah dire Moïse leve so baton lor la mer Rouge, pareil couma to trouvé lor sa zimage-la. Ek kan Moïse faire sa, sa bann muraille de l’eau-la tombé ek couvert bann Égyptien ek zot bann calesse. L’armée Égyptien en entier finn suive bann Israélite dan la mer, mais okenn Égyptien pa’nn sorti vivant!

Peuple Jéhovah extra content ki zot gagne la vie sauve! Bann missié commence chanté pou remercié Jéhovah: ‘Jéhovah finn gagne enn grand victoire. Li’nn jette bann cheval ek zot cavalier dan la mer.’ Moïse so soeur, Miriam, prend so tambourin, ek tou bann femme suive li avek zot tambourin. Ek a mesure ki zot pé dansé dan la joie, zot chante mem chanté ki bann missié pé chanté: ‘Jéhovah finn gagne enn grand victoire. Li’nn jette bann cheval ek zot cavalier dan la mer.’

Exode chapitre 12 ziska 15.



Question

  • Ensam avek bann femme ek bann zenfant, comié zom Israélite inn quitte l’Égypte, ek kisannla ti al ensam avek zot?
  • Ki sentiment Pharaon ti ena apré ki li ti laisse bann Israélite allé, ek ki li’nn faire?
  • Ki Jéhovah ti faire pou empeche bann Égyptien attak so peuple?
  • Ki ti arrivé kan Moïse ti leve so baton lor la mer rouge, ek ki bann Israélite ti faire?
  • Ki ti arrivé apré ki bann Égyptien ti galope derriere bann Israélite dan la mer?
  • Couma bann Israélite ti montré zot la joie ek zot reconnaissance envers Jéhovah ki ti delivré zot?

Bann question en plus

  • Lire Exode 12:33-36.

    Couma Jéhovah ti faire sur ki dedommage so peuple pou tou sa bann l’année ki zot ti bann esclave en Égypte-la? (Ex. 3:21, 22; 12:35, 36)

  • Lire Exode 14:1-31.

    Alors ki la guerre Har-Maguédôn pé kosté, ki l’effet seki Moïse ti dire dan Exode 14:13, 14 ena lor bann serviteur Jéhovah zordi? (2 Chron. 20:17; Ps. 91:8)

  • Lire Exode 15:1-8, 20, 21.

    Kifer bann serviteur Jéhovah bizin chante bann louange pou Li? (Ex. 15:1, 2; Ps. 105:2, 3; Rév. 15:3, 4)

    Miriam ek bann lezot madame ti loué Jéhovah kot la mer Rouge, ki l’exemple zot inn quitté pou bann soeur zordi? (Ex. 15:20, 21; Ps. 68:11)