Skip to content

Skip to table of contents

Zistoire 20: Dina gagne probleme

Zistoire 20: Dina gagne probleme

ESKI to trouve sa bann tifi ki Dina pé vinn rann visite-la? C’est bann tifi ki reste dan pays Canaan. Eski so papa Jacob ti pou content si li ti konn sa? Pou reponn sa question-la, nou bizin rappel seki Abraham ek Isaac ti pensé lor bann femme ki ti vive dan pays Canaan.

Dina pé rann visite bann tifi cananéen

Eski Abraham ti d’accord ki Isaac marié ar enn tifi ki ti reste Canaan? Non. Eski Isaac ek Rébecca ti content ki zot garson Jacob marié ar enn tifi dan Canaan? Non. Eski to koné kifer?

C’est parski bann Cananéen ti adore bann fausse bondié. Zot pa ti pou vinn bann bon mari ni bann bon madame, ek zot pa ti pou bann bon camarade aussi. Alors, nou kapav sur ki Jacob pa ti pou content ki so tifi faire camarade ar sa bann tifi cananéen-la.

Nou ti kapav attann ki Dina gagne probleme. Eski dan zimage, to trouve sa missié cananéen ki pé guette Dina-la? Li appel Shekèm. Enn jour, kan Dina ti vinn guette so bann camarade, Shekèm ti force li pou dormi ar li. Sa ti enn mauvais kitsoz, parski zis bann dimoune marié ki gagne droit dormi ensam. Sa mauvais kitsoz ki Shekèm ti faire Dina-la ti amenn enn quantité lezot malheur.

Kan bann frere Dina ti tann seki ti’nn arrivé, zot ti bien en colere. Deux parmi zot, Siméon ek Lévi, ti tellement en colere ki zot ti prend zot l’epée ek zot ti attak par surprise bann zom ki ti reste dan la ville kot Shekèm ti resté. Zot ek zot bann frere ti touye Shekèm ek tou bann lezot zom. Zot mauvais action ti faire Jacob bien en colere.

Kifer tou sa bann malheur-la ti’nn arrivé? Parski Dina ti faire camarade avek bann dimoune ki pa ti obeir bann la loi Bondié. Nou pa envie imite Dina ek faire bann camarade coumsa, pa vrai?

Genèse 34:1-31.



Question

  • Kifer Abraham ek Isaac pa ti envie ki zot zenfant marié ar bann habitant Canaan?
  • Eski Jacob ti d’accord ki so tifi faire camarade ar bann tifi dan Canaan?
  • Dan sa zimage-la, kisannla sa missié ki pé guette Dina-la, ek ki mauvais kitsoz li’nn faire?
  • Ki bann frere Dina, Siméon ek Lévi, ti faire kan zot ti aprann seki ti arrivé?
  • Eski Jacob ti d’accord avek seki Siméon ek Lévi ti faire?
  • Couma eski tou sa bann malheur-la inn commencé?

Bann question en plus

  • Lire Genèse 34:1-31.

    Dina ti al guette bann tifi Cananéen. Eski sa ti enn kitsoz ki ti arrivé enn sel fois? Expliké (Gen. 34:1)

    Kifer Dina ena so part responsabilité kan li’nn perdi so virginité? (Gal. 6:7)

    Couma eski bann jeune zordi kapav montré ki zot prend bien compte l’exemple Dina? (Prov. 13:20; 1 Cor. 15:33; 1 Jean 5:19)