Skip to content

Skip to table of contents

Zistoire 19: Bann zenfant Jacob

Zistoire 19: Bann zenfant Jacob
Jacob ek so bann garson

GUETTE sa grand famille-la. C’est douze garson Jacob. Li ti ena aussi bann tifi. Eski to konn nom bann zenfant Jacob? Anou guetté couma zot ti appelé.

Léa ti gagne Ruben, Siméon, Lévi, ek Juda. Kan Rachel ti trouvé ki li pa ti ena zenfant, li ti bien chagrin. Alors, li ti donne Jacob so servante Bilha ki ti gagne deux garson, Dân ek Naphtali. Apré sa, Léa aussi ti donne Jacob so servante Zilpa, ek li ti gagne Gad ek Asher. Finalement, Léa ti gagne encore deux garson, Issakar ek Zéboulôn.

Enfin Rachel ti reussi gagne enn zenfant. Li ti appel li Joseph. Plitar, nou pou koz plus lor Joseph, parski li ti vinn enn dimoune bien important. Sa c’est 11 garson ki Jacob ti gagné kan li ti pé reste kot Labân, papa Rachel.

Jacob ti ena aussi bann tifi, mais la Bible donne nou zis nom enn sel. Li ti appel Dina.

Ti’nn arrive ler pou Jacob quitte Labân pou retourne Canaan. Alors, li ti rassemblé so grand famille ek tou so bann troupeau mouton ek boeuf, ek li ti commence enn longue voyage.

Inpé le temps apré ki Jacob ek so famille ti’nn retourne Canaan, Rachel ti gagne enn lot garson. Sa ti arrivé pendant enn voyage. Rachel ti bien souffert ek finalement li ti mort kan li ti gagne so tibaba. Mais so ti garson ti bien. Jacob ti appel li Benjamin.

Li bon nou rappel nom 12 garson Jacob parski c’est zot bann descendant ki ti forme nation Israël. En realité, 12 tribu Israël porte nom 10 garson Jacob ek deux garson Joseph. Isaac ti vive encore beaucoup l’année apré naissance tou sa bann garson-la. Surement li ti bien content pou ena tou sa bann ti-zenfant-la. Mais anou guetté ki ti arrive Dina, enn so bann ti-zenfant.

Genèse 29:32-35; 30:1-26; 35:16-19; 37:35.



Question

  • Léa, premier femme Jacob, ti gagne six garson, couma zot appelé?
  • Couma deux garson ki Zilpa, servante Léa, ti gagné, ti appelé?
  • Couma deux garson ki Bilha, servante Rachel, ti gagné, ti appelé?
  • Couma deux garson Rachel ti appelé, mais ki ti arrivé kan deuxieme-la ti né?
  • Dapré sa zimage-la, comié garson Jacob ti ena, ek kisannla ti pou zot descendance?

Bann question en plus

  • Lire Genèse 29:32-35; 30:1-26; ek 35:16-19.

    Pareil couma nou’nn trouvé dan cas bann 12 garson Jacob, dan lepok longtemps couma eski ti choisir bann nom pou bann garson hébreu?

  • Lire Genèse 37:35.

    Mem si dan la Bible mentionne zis nom Dina, couma nou koné ki Jacob ti ena lezot tifi encore? (Gen. 37:34, 35)