Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 16: Mariage Isaac

Zistoire 16: Mariage Isaac

ESKI to koné kisannla sa madame lor sa zimage-la? Li appel Rébecca. Sa missié ki li pé al joinde-la c’est Isaac. Li pou marié ar li. Couma sa ti arrivé?

Abraham, envie ki so garson Isaac marié ar enn bon tifi. Li pa envie ki Isaac marié ar enn parmi bann tifi ki reste Canaan, parski zot adore bann fausse bondié. A cause sa, Abraham appel so serviteur ek dire li: ‘Al dan la ville Harân kot mo bann famille resté, ek choisir enn tifi pou mo garson Isaac.’

Desuite, serviteur Abraham prend dix chameau ek faire enn longue voyage. Kan li arrive pré ar la ville kot bann famille Abraham resté, li arrete kot enn puit. Ti’nn tard dan l’apré-midi, ler kot bann madame dan la ville vinn tire de l’eau dan puit. Lerla, serviteur Abraham prié Jéhovah: ‘Faire ki sa madame ki to finn choisir pou marié ar Isaac-la, al prend de l’eau pou moi ek pou mo bann chameau.’

Rébecca zwenn Isaac

Enn tipé apré, Rébecca vinn prend de l’eau. Kan serviteur Abraham demann li inpé de l’eau pou boire, li donne li. Apré sa, li galopé li al prend de l’eau pou donne tou so bann chameau. Pa facile pou faire sa, parski bann chameau boire beaucoup de l’eau.

Kan Rébecca fini donne de l’eau tou bann chameau, serviteur Abraham demann li couma so papa appelé ek si li possible pou li reste kot zot a-soir. Rébecca dire li: ‘Mo papa appel Bethouël, ek ena assez place kot nou pou to resté.’ Serviteur Abraham koné ki Bethouël li garson Nahor, frere Abraham. Alors, li tombe agenou ek li remercié Jéhovah parski Li finn dirige li kot bann famille Abraham.

Sa soir-la, serviteur Abraham dire Bethouël ek Labân, frere Rébecca, kifer li finn vinn la. Zot toulé-deux d’accord ki Rébecca marié ar Isaac. Ki Rébecca dire kan zot demann li si li envie allé? Li dire: ‘Oui.’ Alors, lendemain-mem, zot monte lor bann chameau ek zot commence enn longue voyage vers pays Canaan.

Kan zot arrivé, finn fini commence faire noir. Rébecca trouve enn missié ki pé marché dan karo. Sa missié-la c’est Isaac. Li content pou trouve Rébecca. Sa faire trois an ki Sara, so mama, ti’nn mort, ek li encore chagrin. Mais asterla, Isaac commence content Rébecca ek li ré-trouve so la joie.

Genèse 24:1-67.



Question

  • Kisannla sa missié ek sa madame ki lor sa zimage-la?
  • Ki Abraham inn faire pou ki so garson gagne enn madame, ek kifer?
  • Couma eski Bondié ti reponn la priere ki serviteur Abraham ti faire?
  • Ki reponse Rébecca ti donné kan ti demann li si li envie marié ar Isaac?
  • Ki kitsoz ti faire Isaac ré-gagne so la joie?

Bann question en plus

  • Lire Genèse 24:1-67.

    Ki bann bon qualité Rébecca ti manifesté kan li ti joinde serviteur Abraham kot puit? (Gen. 24:17-20; Prov. 31:17, 31)

    Concernant bann disposition ki Abraham ti prend pou Isaac, ki bon l’exemple li’nn quitté pou bann chretien zordi? (Gen. 24:37, 38; 1 Cor. 7:39; 2 Cor. 6:14)

    Kifer nou bizin trouve le temps pou medité, pareil couma Isaac? (Gen. 24:63; Ps. 77:12; Phil. 4:8)