Skip to content

Skip to table of contents

Zistoire 27: Enn mauvais le roi dirige l’Égypte

Zistoire 27: Enn mauvais le roi dirige l’Égypte

SA BANN zom-la pé force bann dimoune pou travail. Guette sa missié ki pé donne coute fouette enn travailleur-la! Sa bann travailleur-la c’est bann descendant Jacob, bann Israélite. Sa bann zom ki pé force zot pou travail-la, c’est bann Égyptien. Bann Israélite ti’nn vinn esclave bann Égyptien. Couma sa ti arrivé?

Bann Égyptien pé maltraite bann Israélite

Pendant beaucoup l’année, famille Jacob, ki’nn agrandi, vive en paix dan l’Égypte. Joseph, li-mem dimoune pli important dan l’Égypte apré le roi Pharaon, ek li bien prend zot compte. Mais apré sa, Joseph mort. Enn nouveau Pharaon, ki pa content bann Israélite, vinn le roi dan l’Égypte.

Sa mauvais Pharaon-la faire bann Israélite vinn bann esclave. Li mette bann zom ki brite ek ki pena pitié en charge zot. Sa bann zom-la force bann Israélite pou travail bien dur pou range bann la ville pou Pharaon. Mais kan-mem sa, bann Israélite contigne augmenté dan l’Égypte. Apré enn certain temps, bann Égyptien commence gagne peur pangar bann Israélite vinn trop beaucoup ek trop fort.

Bann Égyptien pé maltraite bann Israélite

Eski to koné ki Pharaon faire? Li koz ar bann madame ki ti aide bann Israélite pou gagne zot tibaba, ek li dire zot: ‘Zot bizin touye tou ti garson ki né.’ Mais sa bann madame-la bann bon madame ek zot pa touye sa bann tibaba-la.

Alors, Pharaon donne sa l’ordre-la tou so peuple: ‘Prend tou bann ti garson ki né parmi bann Israélite ek touye zot. Laisse zis bann tifi vivant.’ C’est enn l’ordre bien cruel, pa vrai? Anou guetté couma enn parmi sa bann ti garson-la reussi sapé.

Exode 1:6-22.



Question

  • Dan sa zimage-la, kisannla sa missié avek enn fouette-la, ek kisannla li pé batté?
  • Apré ki Joseph mort, ki arrive bann Israélite?
  • Kifer bann Égyptien ti commence peur bann Israélite?
  • Ki commandement Pharaon ti donne bann madame ki ti aide bann femme israélite pou accouché?

Bann question en plus

  • Lire Exode 1:6-22.

    Dan ki fason Jéhovah inn commence realise promesse ki Li ti faire ar Abraham? (Ex. 1:7; Gen. 12:2; Actes 7:17)

    Couma eski bann femme sage hébreu ti montré respé pou valeur sacré ki la vie ena? (Ex. 1:17; Gen. 9:6)

    Couma eski Jéhovah ti recompense zot pou zot fidelité? (Ex. 1:20, 21; Prov. 19:17)

    Couma eski Satan inn essaye empeche projet Jéhovah concernant semence ki Li ti promette Abraham, realisé? (Ex. 1:22; Mat. 2:16)