Skip to content

Skip to table of contents

Zistoire 26: Job reste fidele envers Bondié

Zistoire 26: Job reste fidele envers Bondié

ESKI to chagrin sa missié ki malade-la? Li appel Job ek c’est so madame ki pé deboute pré kot li. Eski to koné ki li pé dire Job? ‘Maudit Bondié ek mort.’ Anou guetté kifer li pé koz coumsa avek Job, ek kifer Job pé souffert sa quantité-la.

Job avek bann boutton

Job c’est enn zom fidele ki obeir Jéhovah. Li reste dan pays Outs, pa trop loin ar Canaan. Jéhovah bien content Job, mais ena enn kikenn ki pa content li ditou. Eski to koné kisannla sa?

C’est Satan le Diable. To rappel, c’est li-mem sa mauvais ange ki detesté Jéhovah-la. Li ti reussi faire Adam ek Ève desobeir Jéhovah, ek li pensé ki li pou kapav faire tou dimoune desobeir Jéhovah. Mais eski li ti reussi? Non. Zis mazinn sa bann dimoune fidele ki nou finn trouvé dan bann zistoire avant-la. Comié to kapav cité?

Apré la mort Jacob ek Joseph dan l’Égypte, parmi tou bann dimoune ki lor la terre c’est Job ki pli fidele envers Jéhovah. Jéhovah envie ki Satan koné ki li pa pou kapav faire tou dimoune vinn mauvais, alors Li dire Satan: ‘Guette Job. Guetté couma li fidele envers moi.’

Satan reponn: ‘Li fidele parski to pé beni li ek li ena beaucoup di-bien. Mais si to tire tousala ar li, to pou trouvé couma li pou maudit toi!’

Alors Jéhovah dire li: ‘Allé, prend tou seki li ena. Faire li tou di-tort ki to envie. Nou pou guetté si li maudit moi. Selman, faire sur ki to pa touye li.’

Pou commencé, Satan faire bann dimoune kokin tou bann boeuf ek bann chameau Job ek touye so bann mouton. Apré sa, li faire so 10 zenfant mort dan enn cyclone. Finalement, li faire Job gagne enn maladie grave. Job bien souffert. C’est a cause sa ki so madame dire li: ‘Maudit Bondié ek mort.’ Mais Job pa faire enn zaffaire coumsa. Ena aussi so trois fausse camarade ki vini ek zot dire li ki li ti’nn faire beaucoup mauvais kitsoz. Mais Job reste fidele.

Jéhovah bien content, ek couma to trouvé lor sa zimage-la, Li beni Job ek Li gueri li. Apré sa, Job gagne encore 10 zenfant ki pli joli encore, ek li gagne deux fois plus boeuf, chameau ek mouton, comparé ar seki li ti ena avant.

Eski toi aussi to pou reste fidele envers Jéhovah, pareil couma Job? Si oui, Bondié pou beni toi. To pou kapav vive pou touletan kan la terre entier pou vinn enn joli paradis, pareil couma jardin Éden.

Job 1:1-22; 2:1-13; 42:10-17.

Job ek so famille


Question

  • Kisannla Job?
  • Ki Satan ti essaye faire, mais eski li ti reussi?
  • Ki kitsoz Jéhovah ti donne Satan permission faire, ek kifer?
  • Kifer Job so madame ti dire li “maudit Bondié ek mort”? (Guette zimage.)
  • Pareil couma to kapav trouvé lor deuxieme zimage, couma eski Bondié ti beni Job, ek kifer?
  • Si pareil couma Job nou reste fidele envers Jéhovah, ki bann benediction nou pou gagné?

Bann question en plus

  • Lire Job 1:1-22.

    Couma eski bann chretien azordi kapav imite Job? (Job 1:1; Phil. 2:15; 2 Pierre 3:14)

  • Lire Job 2:1-13.

    Dan ki fason different Job ek so madame inn reagir devant bann persecution Satan? (Job 2:9, 10; Prov. 19:3; Mika 7:7; Mal. 3:14)

  • Lire Job 42:10-17.

    Ki bann kitsoz ki pareil ena entre bann recompense ki Job inn gagné ek seki Jésus inn gagné parski zot ti reste fidele? (Job 42:12; Phil. 2:9-11)

    Couma eski bann benediction ki Job ti gagné kan li ti garde so l’integrité envers Bondié encourage nou? (Job 42:10, 12; Héb. 6:10; Jacq. 1:2-4, 12; 5:11)