Skip to content

Skip to table of contents

Zistoire 13: Abraham—Camarade Bondié

Zistoire 13: Abraham—Camarade Bondié

ENN parmi bann l’endroit kot bann dimoune ti al vive apré deluge, ti appel Our, ki ti vinn enn la ville important kot ti ena bann joli lakaz. Mais so bann habitant ti servi bann fausse bondié, pareil couma bann habitant dan la ville Babel. Bann habitant Our ek Babel pa ti pareil couma Noé ek so garson Sem, ki ti contigne servi Jéhovah.

Finalement, 350 an apré deluge, Noé, ki ti reste fidele envers Jéhovah, ti mort. Sa ti passé zis deux an avant naissance sa missié ki to trouvé lor sa zimage-la. Jéhovah ti bien content li. Li ti appel Abraham. Li ti reste avek so famille dan la ville Our.

Abraham pé guette bann zetoile

Enn jour, Jéhovah ti dire Abraham: ‘Quitte la ville Our et quitte to bann famille, ek al dan enn pays ki mo pou montré toi.’ Eski Abraham ti obeir Bondié ek ti quitte tou bann confort materiel ki ti ena dan la ville Our? Oui. Abraham ti obeir Bondié touletan ek c’est a cause sa ki li ti vinn camarade Bondié.

Certain membre famille Abraham ti al ensam avek li kan li ti quitte Our. C’est seki so papa Térah ti faire ek aussi so neveu Lot. Ek bien sur, so madame Sara aussi ti al avek li. Apré enn longue voyage, zot ti arrive dan enn l’endroit ki ti appel Harân, c’est la ki Térah ti mort. Zot ti bien loin ar Our.

Apré enn certain temps, Abraham ek so famille ti quitte Harân ek ti al dan pays Canaan. La, Jéhovah ti dire li: ‘Sa pays-la-mem ki mo pou donne to bann descendant.’ Abraham ti reste Canaan ek ti vive dan bann la tente.

Bondié ti aide Abraham pou ki li gagne enn grand troupeau mouton ek lezot zanimo ek plusieurs centaine serviteur. Mais Abraham ek Sara pa ti ena zenfant.

Abraham ti ena 99 an kan Jéhovah ti dire li: ‘Mo promette toi ki to pou vinn papa beaucoup nation.’ Mais couma sa ti pou kapav arrivé alors ki Abraham ek Sara ti trop vié pou gagne zenfant?

Genèse 11:27-32; 12:1-7; 17:1-8, 15-17; 18:9-19.



Question

  • Ki qualité dimoune ti vive dan la ville Our?
  • Kisannla sa missié lor sa zimage-la, kan eski li’nn né, ek kot-sa li ti vive?
  • Ki Bondié ti demann Abraham faire?
  • Kifer ti appel Abraham camarade Bondié?
  • Kisannla ti suive Abraham kan li ti quitte Our?
  • Ki Bondié ti dire Abraham kan li ti arrive dan pays Canaan?
  • Kan Abraham ti ena 99 an, ki promesse Bondié inn faire li?

Bann question en plus

  • Lire Genèse 11:27-32.

    Couma eski Abraham ek Lot ti tombe famille? (Gen. 11:27)

    Mem si nou lire ki c’est Térah ki ti faire so famille al Canaan, couma eski nou koné ki c’est Abraham ki ti derriere sa, ek kifer li ti faire sa? (Gen. 11:31; Actes 7:2-4)

  • Lire Genèse 12:1-7.

    Apré ki Abraham ti rente Canaan, couma eski Jéhovah ti elargi l’alliance ki Li ti faire avek Abraham? (Gen. 12:7)

  • Lire Genèse 17:1-8, 15-17.

    Kan Abram ti ena 99 an, couma eski so nom finn changé, ek kifer? (Gen. 17:5)

    Ki bann benediction Jéhovah ti promette Sara li pou gagné dan l’avenir? (Gen. 17:15, 16)

  • Lire Genèse 18:9-19.

    Dan Genèse 18:19, ki responsabilité bann papa inn gagné? (Deut. 6:6, 7; Éph. 6:4)

    Ki kitsoz ti arrive Sara ki montré nou ki nou pa kapav cachiette nanyin Jéhovah? (Gen. 18:12, 15; Ps. 44:21)