Skip to content

Skip to table of contents

Zistoire 4: Kifer finn pousse zot en dehors jardin

Zistoire 4: Kifer finn pousse zot en dehors jardin

GUETTÉ ki pé arrivé asterla. Adam ek Ève nepli dan sa joli jardin Éden-la, finn mette zot dehors. Eski to koné kifer?

Finn mette Adam ek Ève en dehors jardin Éden

C’est parski zot ti faire enn kitsoz ki bien grave. A cause sa Jéhovah pé puni zot. Eski to koné ki mauvais kitsoz Adam ek Ève ti faire?

Zot ti faire enn kitsoz ki Bondié ti defann zot faire. Bondié ti dire zot ki zot kapav mange tou fruit ki lor bann pié ki dan sa jardin-la, excepté enn sel. Si zot mange fruit sa pié-la zot pou mort. Sa fruit-la pa ti pou zot. Ek nou koné ki li pa bon ki nou prend enn kitsoz ki pa pou nou, pa vrai? Mais ki finn arrivé?

Enn jour, kan Ève ti tousel dan jardin, enn serpent ti koz ar li. Mazinn enn coup, enn serpent ki kozé! Li ti dire Ève mange fruit ki lor sa pié ki Bondié ti defann zot mangé-la. Kan Jéhovah ti faire bann serpent, Li pa ti donne zot capacité pou kozé. Alors, sa vedir ki ti ena enn kikenn ki ti pé faire sa serpent-la kozé. Mais kisannla sa?

Pa Adam ki ti faire sa. Alors surement ti bizin enn parmi bann creature ki Jéhovah ti faire bien avant ki Li ti faire la terre. Sa bann creature-la zot bann ange, ek nou pa kapav trouve zot. Enn parmi zot ti’nn vinn fiere. Li ti commence pensé ki li kapav dirigé pareil couma Bondié. Ek li ti envie ki bann dimoune obeir li au lieu ki zot obeir Jéhovah. Li-mem sa ange ki ti faire sa serpent-la kozé.

Sa ange-la ti reussi embete Ève. Li ti dire Ève ki li ti pou vinn couma Bondié si li ti mange sa fruit-la, ek Ève ti croire li. Alors li ti mange sa fruit-la, ek Adam aussi ti mangé. Adam ek Ève ti desobeir Bondié, ek a cause sa zot ti perdi zot joli jardin kot zot ti pé resté.

Mais enn jour Bondié pou faire la terre en entier vinn joli pareil couma jardin Éden. Plitar, nou pou aprann couma toi aussi to kapav prend part dan sa travail-la. Mais asterla anou guetté ki’nn arrive Adam ek Ève.

Genèse 2:16, 17; 3:1-13, 24; Révélation 12:9.



Question

  • Dan sa zimage-la, ki pé arrive Adam ek Ève?
  • Kifer Jéhovah ti puni zot?
  • Ki enn serpent ti dire Ève?
  • Kisannla ti faire sa serpent-la koz ar Ève?
  • Kifer Adam ek Ève ti perdi Paradis kot zot ti resté?

Bann question en plus

  • Lire Genèse 2:16, 17 ek 3:1-13, 24.

    Kifer question ki sa serpent-la ti pose Ève ti mal represente Jéhovah? (Gen. 3:1-5; 1 Jean 5:3)

    Couma l’exemple Ève li enn l’avertissement pou nou? (Phil. 4:8; Jacq. 1:14, 15; 1 Jean 2:16)

    Couma Adam ek Ève inn montré ki zot ti refuse accepté ki zot ti responsable seki zot ti faire? (Gen. 3:12, 13)

    Couma bann chérubin ki Bondié ti metté dan l’est jardin Éden, ti soutenir droit ki Jéhovah ena pou dirigé? (Gen. 3:24)

  • Lire Révélation 12:9.

    Ziska ki point Satan finn reussi al kont domination Bondié? (1 Jean 5:19)