Skip to content

Skip to table of contents

Zistoire 3: Premier zom ek premier femme

Zistoire 3: Premier zom ek premier femme

KI KITSOZ different lor sa zimage-la? Nou trouve bann dimoune lor la. C’est premier zom ek premier madame. C’est Bondié ki finn faire zot. Eski to koné couma Bondié appelé? Li appel Jéhovah. Premier zom ek premier madame ti appel Adam ek Ève.

Adam ek Ève dan jardin Éden

Anou guetté couma Jéhovah ti faire Adam. Li ti prend inpé la poussiere la terre ek avek sa Li ti forme enn lekor parfait, lekor enn zom. Apré sa, Li ti soufflé dan so néné, ek coumsa Adam ti gagne la vie.

Jéhovah ti ena enn travail pou Adam. Li ti dire Adam donne enn nom chaque zanimo ki existé. Surement Adam finn passe beaucoup le temps pou observe bann zanimo avant ki li trouve bann nom ki pou al bien avek zot tou. Letan Adam ti pé donne bann zanimo enn nom li ti remark enn kitsoz. Ki kitsoz sa?

Chaque zanimo ti ena so paire. Ti ena bann papa ek bann mama l’elephant, ek ti ena bann papa ek bann mama lion. Mais Adam li, li pa ti ena so paire. Alors Jéhovah ti faire Adam tombe dan enn grand sommeil, ek lerla Li ti tire enn cote ar li. Avek sa cote-la, Li ti faire enn femme pou Adam, ek li ti vinn so madame.

Surement Adam ti bien content! Ève aussi surement ti bien content ki Bondié inn mette li dan enn joli jardin coumsa! Asterla zot ti pou kapav gagne bann zenfant ek vive ensam dan la joie.

Jéhovah ti envie ki Adam ek Ève vive pou touletan. Li ti envie ki zot faire la terre en entier vinn joli pareil couma jardin Éden. Surement Adam ek Ève ti bien content kan zot ti pense travail ki ti pé attann zot! Eski sa pa ti pou faire toi plaisir si to ti gagne l’occasion pou donne enn coude-main pou faire la terre vinn enn joli jardin? Mais bonheur Adam ek Ève pa finn dure longtemps. Anou guetté kifer.

Psaume 83:18; Genèse 1:26-31; 2:7-25.



Question

  • Ki difference ena entre zimage dan Zistoire 3 ek zimage dan Zistoire 2?
  • Kisannla ki ti faire premier zom, ek couma li ti appelé?
  • Ki travail Bondié ti donne Adam pou faire?
  • Kifer Bondié ti faire Adam tombe dan enn grand sommeil?
  • Comié le temps Adam ek Ève ti kapav vive, ek ki travail Jéhovah ti envie zot faire?

Bann question en plus

  • Lire Psaume 83:18.

    Couma Bondié appelé, ek ki position Li tousel ena par rapport ar la terre? (Jér. 16:21; Dan. 4:17)

  • Lire Genèse 1:26-31.

    Pendant sixieme jour creation, ki kitsoz bien important Bondié ti crée, ek couma sa creation-la ti different ar bann zanimo? (Gen. 1:26)

    Ki Jéhovah ti donne bann dimoune ek bann zanimo toulé-deux? (Gen. 1:30)

  • Lire Genèse 2:7-25.

    Adam ti bizin faire pou donne bann zanimo enn nom? (Gen. 2:19)

    Couma Genèse 2:24 aide nou pou comprend fason ki Bondié considere mariage, separation, ek divorce? (Mat. 19:4-6, 9)