Skip to content

Skip to secondary menu

Skip to table of contents

Bann Temwin Zeova

Kreol Morisien

Mo liv zistwar Labib

Zistoire 10: Enn grand deluge

Zistoire 10: Enn grand deluge

EN DEHORS l’arche, bann dimoune ti pé contigne amenn zot la vie pareil couma avant. Zot ti toujours pa croire ki enn deluge ti pou vini. Surement zot ti pé bouffonne Noé ek so famille encore plus. Mais bien vite zot ti commence riye jaune.

Bann dimoune ek bann zanimo pé gagne peur ek zot entouré ar de l’eau deluge

Enn sel coup la pluie ti commence tombé. De l’eau ki ti sorti dan le ciel ti tombé pareil couma dire pé vide bann seau de l’eau. Noé ti ena raison! Mais asterla li ti trop tard. Personne pa ti kapav rente dan l’arche. Jéhovah ti’nn fini scelle la porte.

Bien vite, de l’eau ti couvert la terre. De l’eau ti pé allé coumadir bann grand la riviere, ek li ti rasse bann pié, roule bann gros roche, ek faire beaucoup tapage. Bann dimoune ti bien peur. Zot ti grimpe dan bann hauteur. Ah! Couma zot ti regretté ki zot pa ti ecoute Noé ek ki zot pa ti rente dan l’arche kan la porte ti encore ouvert! Mais asterla li ti trop tard.

De l’eau ti pé contigne monté. Pendant 40 jour ek 40 nuit, la pluie ti contigne tombé. De l’eau ti monté ek bien vite li ti couvert mem bann pli haute montagne. Alors, pareil couma Bondié ti dire, tou bann dimoune ek bann zanimo ki ti en dehors l’arche ti mort. Zis bann ki ti dan l’arche ki ti sapé.

Noé ek so bann garson ti bien range l’arche-la. De l’eau ti commence souleve l’arche-la ek li ti flotté sans probleme. Lerla enn jour la pluie ti arreté ek soleil ti commence brillé. Seki zot ti trouvé ti extraordinaire! Ti ena zis enn grand la mer partout. Ek sel kitsoz ki ti kapav trouvé c’est l’arche ki pé flotté lor de l’eau.

L’arche pé flotté lor de l’eau

Bann geant ti disparette. Zot ti nepli la pou faire dimoune di-tort. Zot tou inn mort, ensam avek zot mama ek le reste mauvais dimoune. Mais ki’nn arrive zot papa?

Bann papa sa bann geant-la, zot pa ti vrai mem bann dimoune couma nou. Zot ti bann ange ki ti’nn vinn lor la terre pou vive couma bann zom. Alors kan deluge ti vini, zot pa ti mort avek bann lezot dimoune. Zot ti abandonne lekor humain ki zot ti prend ek zot ti monte dan le ciel couma bann ange. Mais zot ti nepli ena droit pou faire partie dan famille bann ange Bondié. Alors zot ti vinn bann ange Satan. La Bible appel zot bann demon.

Lerla, Bondié ti faire enn di-vent soufflé, ek de l’eau deluge ti commence diminué. Cinq mois plitar l’arche ti pose la-haut net lor enn montagne. Beaucoup jour finn passé. Enfin, bann ki ti dan l’arche ti kapav guette dehors ek trouve bann boute montagne. De l’eau ti pé contigne baissé.

Lerla, Noé ti envoye enn corbeau en dehors l’arche. Li ti envolé pou enn ti moment ek apré li ti retourné, parski li pa ti trouve enn bon place pou posé. Noé ti contigne faire sa ek chaque fois zoiseau-la ti retourné.

Enn colombe

Noé ti envie trouvé si de l’eau ti’nn sec lor la terre. Alors prochain fois li ti envoye enn colombe. Mais colombe-la aussi ti retourné, parski li pa ti trouve enn place pou resté. Noé ti envoye li enn deuxieme fois, ek sa fois-la li ti retourné avek enn feuille zolive dan so la bec. Alors Noé ti koné ki de l’eau ti’nn baissé. Noé ti envoye colombe-la enn troisieme fois, ek finalement zoiseau-la ti trouve enn place sec pou li resté.

Apré sa Bondié ti koz avek Noé. Li ti dire li: ‘Sorti dan l’arche. Prend tou to famille ek bann zanimo avek toi.’ Zot ti’nn reste dan l’arche pendant plus ki enn l’année entier. Alors nou kapav mazinn la joie ki zot ti ena kan zot ti sorti en dehors, vivant!

Genèse 7:10-24; 8:1-17; 1 Pierre 3:19, 20.



Question

  • Enn fois ki la pluie finn commence tombé, kifer personne pa finn kapav rente dan l’arche?
  • Pendant comié jour ek comié la nuit Jéhovah inn faire la pluie tombé, ek ziska ki hauteur de l’eau inn monté?
  • A mesure ki de l’eau ti couvert la terre, ki ti arrive l’arche?
  • Eski bann geant ti sapé pendant deluge, ek ki ti arrive zot papa?
  • Ki’nn arrive l’arche apré cinq mois?
  • Kifer Noé ti largue enn corbeau en dehors l’arche?
  • Couma Noé ti koné ki niveau de l’eau lor la terre ti’nn baissé?
  • Ki Bondié ti dire Noé apré ki li ek so famille ti’nn reste dan l’arche pendant plus ki enn an?

Bann question en plus

  • Lire Genèse 7:10-24.

    Ziska ki point la vie lor la terre ti detruire? (Gen. 7:23)

    Comié le temps sa finn prend pou ki niveau de l’eau baissé? (Gen. 7:24)

  • Lire Genèse 8:1-17.

    Couma Genèse 8:17 montré ki Jéhovah pa’nn change projet ki Li ti ena depuis commencement pou la terre? (Gen. 1:22)

  • Lire 1 Pierre 3:19, 20.

    Ki jugement bann ange rebelle finn gagné, kan zot inn retourne dan le ciel? (Jude 6)

    Couma l’exemple Noé ek so famille kapav fortifié nou confiance dan capacité ki Jéhovah ena pou delivré So peuple? (2 Pierre 2:9)