Bann dimoune pé riye Noé

NOÉ ti ena so madame ek trois garson. So bann garson ti appel Sem, Cham ek Japhet. Toulé-trois ti marié. Dan famille Noé, en tou ti ena huit dimoune.

Enn jour, Bondié ti demann Noé faire enn travail inpé drole. Li ti donne li l’ordre pou range enn grand l’arche. Sa l’arche-la ti pou grand couma enn grand bateau, mais li ti pou longue ek li ti pou ena forme enn grand caisse. Bondié ti dire Noé: ‘Faire li en trois l’etage, ek faire bann la chambre.’ Noé ek so famille ti pou servi sa bann la chambre-la pou zot-mem, pou bann zanimo, ek pou ramasse mangé ki zot tou ti pou bizin.

Bondié ti dire Noé faire l’arche-la dan enn fason pou empeche de l’eau rente endan. Bondié ti dire: ‘Mo pou envoye enn grand deluge ek mo pou detruire le monde entier. Tou bann ki pa dan l’arche pou mort.’

Noé et so bann garson ti obeir Jéhovah ek zot ti commence range l’arche. Mais, bann dimoune ti riye zot. Zot ti contigne faire seki mauvais. Personne pa ti croire Noé kan li ti dire zot seki Bondié ti pou faire.

La famille Noé pé mette bann zanimo ek mange dan l’arche

Noé finn prend beaucoup le temps pou range sa l’arche-la parski li ti bien grand. Finalement, apré plusieurs l’année, li ti reussi termine li. Lerla Bondié ti dire Noé amenn bann zanimo dan l’arche. Pou certain l’espece zanimo Bondié ti dire li prend deux, setadir enn male ek enn femelle. Mais pou lezot l’espece, Bondié ti dire Noé prend sept. Li ti aussi dire Noé amenn different qualité l’espece zoiseau. Noé ti faire tou seki Bondié ti dire li faire.

A la fin, Noé ek so famille aussi ti rente dan l’arche, ek Bondié ti ferme la porte. Dan l’arche, Noé ek so famille ti attann. Essaye maziné ki toi aussi to ensam avek zot dan l’arche, ek to pé attann. Eski vrai-mem deluge pou vini, pareil couma Bondié ti dire?

Genèse 6:9-22; 7:1-9.



Question

  • Comié dimoune ti ena dan Noé so famille, ek couma so trois garson ti appelé?
  • Ki kitsoz inpé drole Bondié ti demann Noé faire, ek kifer?
  • Couma bann voisin Noé ti reagir kan li ti koz concernant l’arche?
  • Ki Bondié ti dire Noé faire avek bann zanimo?
  • Apré ki Bondié inn ferme la porte l’arche, ki Noé ek so famille ti bizin faire?

Bann question en plus

  • Lire Genèse 6:9-22.

    Kifer Noé ti enn adorateur vrai Bondié ki ti exceptionnel? (Gen. 6:9, 22)

    Ki Jéhovah ressenti concernant la violence, ek couma sa bizin ena enn l’effet kan nou choisir nou bann divertissement? (Gen. 6:11, 12; Ps. 11:5)

    Couma nou kapav imite Noé kan nou gagne bann direction a travers l’organisation Jéhovah? (Gen. 6:22; 1 Jean 5:3)

  • Lire Genèse 7:1-9.

    Jéhovah ti trouve Noé couma kikenn ki droite mem si li ti imparfait, couma sa encourage nou zordi? (Gen. 7:1; Prov. 10:16; Is. 26:7)