Skip to content

Skip to table of contents

Zistoire 1: Bondié commence crée

Zistoire 1: Bondié commence crée

Bondié inn crée tou kitsoz. Li ti faire soleil pou donne nou la lumiere li-jour, ek la lune ek bann zetoile pou ki nou kapav gagne la lumiere la nuit. Bondié ti aussi faire la terre pou nou vive.

Mais soleil, la lune, zetoile ek la terre zot pa bann premier kitsoz ki Bondié ti faire. Eski to koné ki kitsoz Bondié ti faire en premier? Li ti faire bann creature invisible pareil couma Li-mem. Nou pa kapav trouve sa bann creature-la pareil couma nou pa kapav trouve Bondié. Dan la Bible, appel zot bann ange ek Bondié ti faire zot pou ki zot reste avek Li dan le ciel.

Premier ange ki Bondié ti faire, ti bien special. C’est premier Garson Bondié, ek li ti travail avek so Papa. Li ti aide Bondié pou faire tou lezot kitsoz, couma par exemple soleil, la lune, bann zetoile ek aussi nou la terre.

Couma la terre ti été sa lepok-la? Dan commencement, personne pa ti kapav vive lor la terre, parski partout ti couvert avek de l’eau. Mais Bondié ti envie ki bann dimoune vive lor la terre. Alors Li finn commence prepare la terre pou ki nou kapav vive lor la. Ki Li ti faire?

D’abord, la terre ti bizin la lumiere. Alors, Bondié ti faire la lumiere soleil eclaire nou planete, ek lerla finn commence ena la nuit ek li-jour. Apré sa, Bondié ti faire certain partie la terre monte pli haute ki l’ocean.

Dan commencement pa ti ena nanyin lor la terre. Li ti pareil couma sa zimage ki to trouvé-la. Pa ti ena ni fleur ni pié ni zanimo. Pa ti ena mem enn poisson dan la mer. Bondié ti ena encore beaucoup travail pou faire avant ki la terre vinn enn joli l’endroit kot bann zanimo ek bann dimoune kapav resté.

Jérémie 10:12; Colossiens 1:15-17; Genèse 1:1-10.

Enn la terre ki pa produire nanyin


Question

  • Kisannla ki ti crée tou kitsoz? Cite enn l’exemple.
  • Ki premier kitsoz Bondié ti crée?
  • Kifer premier ange ki Bondié ti crée ti special?
  • Couma la terre ti été au commencement? (Guette zimage.)
  • Couma Bondié finn commence prepare la terre pou bann zanimo ek bann dimoune?

Bann question en plus

  • Lire Jérémie 10:12.

    Ki bann qualité ki Bondié ena ou trouvé a travers so creation? (Is. 40:26; Rom. 11:33)

  • Lire Colossiens 1:15-17.

    Ki role Jésus finn ena dan creation, ek ki l’effet sa bizin ena lor fason ki nou considere li? (Col. 1:15-17)

  • Lire Genèse 1:1-10.

    Couma la terre finn existé? (Gen. 1:1)

    Ki finn arrivé pendant premier jour creation? (Gen. 1:3-5)

    Raconte seki finn arrivé pendant deuxieme jour creation. (Gen. 1:7,8)