Kan eski nou pou aret pres bon nouvel?

Zezi ti dir: “Pou pres sa bon nouvel lor Rwayom la partou kot bann dimounn reste lor later kouma enn temwaniaz pou tou bann nasion, ek lerla lafin pou vini.” (Mat. 24:14) Dan sa verse-la, ek osi dan verse 6 ek 13, mo Grek ki’nn servi pou tradir “lafin” se teʹlos. Sa mo-la vedir lafin lemond Satan pandan lager Armagedon. (Rev. 16:14, 16) Savedir ki nou pou kontign pres bon nouvel ziska ki lager Armagedon koumanse. Sa nouvo lexplikasion-la sanz fason ki nou ti pe konpran sertin kitsoz dan lepase.

Avan, nou ti dir ki nou ti pou aret pres bon nouvel kan gran soufrans ti pou koumanse avek destriksion Gran Babilonn. (Rev. 17:3, 5, 15, 16) Nou ti panse ki kan gran soufrans ti pou koumanse, Zeova ti pou nepli donn bann dimounn lokazion pou sanze. Nou ti panse ki sa levennman-la ti pou lafin “lane kot Zeova montre so faver.” (Iza. 61:2) Nou ti panse osi ki bann dimounn ki ti pou sape pandan gran soufrans, ti pou bann ki ti pe deza servi Zeova avek fidelite avan ki gran soufrans koumanse. Nou ti konpar sa bann dimounn-la ar bann Zwif ki ti reisi sape kan Zerizalem ti detrir an 607 A.N.L. Avan destriksion Zerizalem, sa bann Zwif-la ti pe deza ador Zeova ek zot ti deteste lemal, ek se akoz sa ki zot ti gagn “enn mark lor [zot] fron” pou ki zot gagn lavi sov. (Eze. 5:11; 9:4) Selman, sa konparezon-la pa an-akor ar bann parol ki Zezi ti dir dan Matie 24:14. Kifer? Parski sa verse-la montre ki ziska ki Armagedon koumanse, bann dimounn pou ankor ena lokazion pou sanze gras-a bon nouvel.

Fason ki nou konpran Matie 24:14 aster-la, sanz osi fason ki nou konpran profesi ki trouv dan Revelasion 16:21, ki koz lor enn mesaz ki kouma “bann gro lagrel.” Apre bann resers ki nou’nn fer, nou’nn konpran ki sa de verse-la ena enn lien ar zot kamarad. Nou’nn konpran sa gras-a seki Labib dir lor fason ki bann dimounn reazir ar bon nouvel. Lapot Pol dir ki pou “bann ki pe gagn delivrans,” bon nouvel li kouma “enn parfin lavi.” Me pou bann lennmi Bondie, li enn move nouvel; li kouma “enn loder lamor.” (2 Kor. 2:15, 16) Zot deteste bon nouvel parski bon nouvel montre ki sa lemond ki zot kontan la, li move, li dirize par Satan, ek biento li pou detrir.—Zan 7:7; 1 Zan 2:17; 5:19.

Revelasion 16:21 dir ki sa lagrel sinbolik la pou “vremem bien gran.” Sa montre ki pandan gran soufrans, nou pou plis aktif dan predikasion ankor, pou ki maximum dimounn kapav tann koz lor nom Zeova. (Eze. 39:7) Sa lepok-la, setadir apre destriksion Gran Babilonn, eski sertin pou santi zot atire par bon nouvel, koumadir zot atire par “enn bon parfin”? Li posib. Kitfwa sa bann dimounn-la pou rapel ouswa pou aprann ki pandan plizir lane bann Temwin Zeova ti anonse ki fos relizion ti pou detrir.

Kitfwa sa pou parey ar seki ti arive kan Zeova ti avoy dis fleo lor Lezip. Apre ki Zeova “[ti] amenn enn zizman lor bann bondie Lezip,” “enn gran pep tou sort kalite dimounn” ti kit Lezip ansam ar bann Izraelit. (Ex. 12:12, 37, 38) Sa bann dimounn-la kitfwa ti koumans ena lafwa dan Zeova kan zot ti trouve ki tou seki Moiz ti dir konsernan sa dis fleo-la ti realize.

Apre destriksion Gran Babilonn, bann dimounn ki pou koumans ena lafwa dan Zeova pou gagn posibilite pou soutenir bann frer Zezi ki ankor lor later. Zot pou gagn lokazion fer bann kitsoz ki pou permet Zezi konsider zot kouma bann mouton. (Mat. 25:34-36, 40) Selman, sa posibilite-la pou fini kan bann frer Zezi ki ankor lor later, pou mont dan lesiel zis avan ki Armagedon koumanse.

Sa nouvo lexplikasion-la montre bien ki Zeova ena boukou lamour ek boukou mizerikord. Wi, Li “pa anvi ki personn detrir, me li anvi ki tou dimounn repanti.”—2 Pier 3:9.