Mo’nn ne an 1951 dan Vienne, dan Lotris. Mo fami ti enn fami Katolik. Mem si mo ti timid, mo ti krwar dan Bondie ek mo ti priye Li souvan. Kan mo ti ena nef an, mo papa ti koumans etidie Labib ar bann Temwin Zeova, ek inpe apre, mo mama osi ti koumans etidie.

Bien vit, nou ti koumans asiste renion dan Lasanble Döbling, dan Vienne. Nou ti fer boukou kitsoz an fami. Par exanp, nou ti lir ek etidie Labib, nou ti asiste bann renion, ek nou ti servi kouma volonter pandan bann lasanble. Depi ki mo tipti, mo papa inn ed mwa pou ogmant mo lamour pou Zeova. Li ti touletan priye pou ki mo ser ek mwa nou vinn pionie. Me sa lepok-la, sa pa ti mo lobzektif.

MO RANT DAN SERVIS APLINTAN

Mo ti ena 14 an kan mo ti pran batem an 1965. Selman, mo ti trouv sa bien difisil pou pres ar bann dimounn ki mo pa ti kone. Mo ti panse osi ki bann lezot zenn ti pli bon ki mwa, alor mo ti touletan anvi ki zot aksepte mwa. Akoz sa, inpe apre mo batem, mo ti koumans vinn bien pros ar mo bann kamarad ki pa ti servi Zeova. Mem si mo ti kontan  frekant zot, mo konsians ti fatig mwa parski mo ti pe pas tro boukou letan ar bann dimounn ki pa Temwin. Selman, mo pa ti ena lafors pou aret frekant zot. Ki kitsoz inn ed mwa pou aret frekant zot?

Sa lepok-la, enn zenn tifi ki ti ena 16 an ek ki ti apel Dorothée, ti vinn dan nou lasanble. Kan mo ti trouve ki kantite li ti kontan prese lakaz-lakaz, sa ti vremem inpresionn mwa. Mo ti inpe pli gran ki li, me mo pa ti souvan dan predikasion. Lerla, mo ti dir ar momem: ‘Mo bann paran zot bann Temwin, me Dorothée so fami pa dan laverite. Li res ar so mama ki bien malad, me kanmem sa li touletan dan predikasion.’ Lexanp Dorothée ti motiv mwa pou fer plis pou Zeova. Bien vit, Dorothée ek mwa nou ti koumans fer pionie ansam. O-koumansman, nou ti fer pionie tanporer. Sa lepok-la, ti apel sa pionie vakans. Apre sa, nou ti pran servis pionie permanan ansam. Dorothée ti bien kontan predikasion, ek gras-a sa mo’si mo’nn koumans kontan predikasion. Anplis, li ti ed mwa pou koumans mo premie letid Labib. Avek letan, mo ti koumans trouv sa pli fasil pou koz ar bann dimounn lakaz-lakaz, lor sime, ouswa dan lezot plas.

Pandan premie lane ki mo ti fer pionie permanan, enn zenn frer ki apel Heinz, ti vinn dan nou lasanble. Li ti gagn laverite dan Kanada kan li ti al kot so frer ki ti enn Temwin. Heinz ti enn pionie spesial ek so lafektasion ti nou lasanble dan Vienne. Deswit mo ti tom amoure ar li. Selman, li ti anvi vinn misioner, me mwa mo pa ti anvi servi kouma misioner. Alor, o-koumansman mo pa ti dir li seki mo ti resanti pou li. Me avek letan, Heinz ek mwa nou’nn koumans frekante, nou’nn marye, ek nou’nn fer pionie ansam dan Lotris.

MO KOUMANS ENA DEZIR POU SERVI KOUMA MISIONER

Heinz souvan ti dir mwa ki kantite li ti anvi vinn misioner. Zame li pa ti met presion lor mwa, me souvan li ti ed mwa pou reflesi kan li ti poz mwa bann kestion kouma, “Nou pena zanfan, eski to panse nou kapav fer plis pou Zeova?” Mo ti per pou vinn enn misioner parski mo ti timid. Li vre ki mo ti enn pionie, me kan mo ti mazinn seki enn misioner ti bizin fer, mo ti trouv sa tro difisil pou mwa. Selman, Heinz ti ena boukou pasians, ek li ti kontign ed mwa pou reflesi lor servis misioner. Li ti osi ankouraz mwa pou pa konsantre mwa tro lor momem, me pou reflesi lor kouma mo kapav ed lezot. Sa konsey-la ti bien ed mwa!

Avek letan, mo ti koumans ena dezir pou vinn enn misioner, alor nou ti ranpli enn form pou fer Lekol Galaad. Selman, frer ki ti responsab biro nasional sa lepok-la, ti dir mwa ki li ti pou pli bon ki mo aprann koz Angle pli bien avan. Mo ti fer zefor pou amelior mo Angle, ek apre trwa-z-an, nou ti etone kan bann frer ti demann nou pou al servi dan enn lasanble Serbo-Kroat, dan Salzbourg, dan Lotris. Nou ti servi dan sa teritwar-la pandan set an, ek enn an ladan nou ti fer servis sirkonskripsion. Lang Serbo-Kroat ti bien difisil, me kanmem sa nou ti ena boukou letid Labib.

 An 1979, bann frer ti demann nou pou al Bilgari ek zot ti dir nou fer koumadir nou ti an vakans parski nou laktivite ti interdi laba. Mem si nou pa ti pou prese laba, zot ti demann nou pou amenn bann tipti piblikasion pou sink ser ki ti res dan Sofia, kapital Bilgari. Mo ti gagn extra per, me Zeova ti ed mwa. Kan mo ti trouv lazwa ek kouraz ki sa bann ser-la ti ena, mem si zot ti riske al dan prizon parski zot ti pe servi Zeova, sa ti ankouraz mwa ek mo ti bien deside pou fer tou seki lorganizasion Zeova ti demann mwa pou fer.

Apre inpe letan, nou ti re-ranpli nou form pou fer Lekol Galaad, ek sann fwa-la nou ti reisi gagn lekol-la. Nou ti panse ki nou ti pou fer lekol-la an Angle dan Letazini. Me an Novam 1981, nou lorganizasion ti koumans fer bann klas Lekol Galaad dan Lalmagn. Ek parski klas-la ti an Alman, li ti pli fasil pou mo konpran. Ki lafektasion nou ti gagne apre sa?

NOU AL SERVI DAN ENN PEI KOT ENA LAGER

Nou lafektasion ti Kenya! Selman, biro nasional Kenya ti demann nou si nou ti dakor pou al servi dan Ouganda. Apepre di-z-an avan, Idi Amin, enn zeneral dan larme Ouganda, ti pran pouvwar ek ti met gouvernman deor. Pandan ki li ti pe dirize, li’nn fer touy bann milye dimounn ek li’nn rann lavi bann milyon dimounn bien difisil. Me an 1979, bann opozan Idi Amin ti met li ek so gouvernman deor. Zot konpran kifer mo ti per pou al dan enn pei koumsa! Selman, Lekol Galaad ti prepar nou pou fer Zeova konfians. Alor, nou ti aksepte pou al Ouganda.

Lavi dan Ouganda ti bien difisil. Gouvernman pa ti pe reisi donn bann kitsoz ki inportan, kouma par exanp delo ek kouran. Telefonn pa ti pe marse. Bann dimounn ti pe tir kout bal lor lezot ek ti pe kokin zot, sirtou aswar. Alor, kouma ti koumans fer nwar, personn pa ti sorti deor. Tou dimounn ti res kot zot ek zot ti priye ki personn pa vinn kot zot pou kokin zot ouswa pou touy zot. Me malgre tou sa bann difikilte-la, bann frer ek ser dan Ouganda ti pe kontign servi Zeova ar lazwa!

An 1982, Heinz ek mwa nou ti ariv dan Kampala, kapital Ouganda. Nou sink premie mwa laba, nou ti res kot Sam ek Christina Waiswa, ansam ar zot sink zanfan ek kat lezot manb zot fami. Frer ek ser Waiswa ek zot fami bien souvan ti manz zis enn sel repa par zour. Zot lospitalite ti vremem extraordiner! Kan nou ti pe res laba, Heinz ek mwa nou’nn aprann bann leson ki’nn ed nou dan nou servis misioner. Par exanp, nou ti aprann pou bengn zis ar de-trwa lit delo, ek apre pou re-servi sa delo-la dan twalet. An 1983, nou ti reisi gagn enn lakaz dan enn landrwa ki inpe plis an sekirite dan Kampala.

Nou ti bien kontan prese dan Kampala. Mo rapel ki enn mwa nou ti plas plis ki 4,000 magazinn! Me seki nou ti plis kontan laba, se pou trouve kouma bann dimounn ti interese ar laverite. Zot ti ena enn gran respe pou Bondie ek zot ti kontan koz lor Labib. Heinz ek mwa nou ti ena apepre 10 a 15 letid Labib sakenn. Nou ti osi aprann bann zoli leson ar nou bann etidian Labib. Par exanp, mem si zot ti bizin marse sak semenn pou vinn renion, zame zot pa ti plengne ek zot ti touletan ere.

 An 1985 ek 1986, ti ena ankor de lager dan Ouganda. Souvan nou ti trouv bann zanfan avek bann gro-gro fizi. Zot ti pe servi kouma solda, ek kan ti ena bann baraz lor sime, se zot ki ti pe kontrol sa bann baraz-la. Pandan sa bann lane-la, souvan nou ti priye Zeova pou ki nou pa per, pou ki Li donn nou sazes, ek pou ki nou reisi evit bann danze kan nou prese. Ek Zeova ti reponn nou bann lapriyer! Bien souvan, kan nou ti zwenn enn kikenn ki ti anvi aprann plis lor Zeova, nou laper ti fonn.

Nou ti bien kontan pres ar bann etranze osi. Par exanp, nou ti etidie Labib ar Murat ek Dilbar Ibatullin, enn koup ki ti sorti Tatarstan, ki trouv dan sant Larisi. Murat ti enn dokter. Toule-de ti pran batem, ek zot ankor pe servi Zeova avek fidelite ziska azordi. Apre sa, mo ti zwenn enn madam ki ti sorti Ikrenn ek ki ti apel Tatiana Vileïska. Sa lepok-la, li ti pe fer enn depresion ek li ti anvi swiside. Me avek letan, Tatiana ti pran batem, li ti retourn Ikrenn, ek li ti osi servi kouma tradikter pou nou bann piblikasion. a

ENN NOUVO LAFEKTASION

An 1991, kan Heinz ek mwa nou ti an vakans dan Lotris, biro nasional Lotris ti ekrir nou enn let pou dir nou ki nou ti gagn enn nouvo lafektasion. Nou ti bizin al servi dan Bilgari. Sa ti fer plizir lane ki nou laktivite ti interdi dan sertin pei dan Lerop. Me sa ti pe koumans sanze, ek bann Temwin Zeova ti gagn drwa prese dan sertin sa bann pei-la, ek Bilgari ti enn parmi zot. Kouma mo ti dir taler-la, Heinz ek mwa nou ti amenn bann piblikasion an sekre dan Bilgari kan nou laktivite ti interdi laba. Me aster-la, nou pe al laba pou prese.

Bann frer ti dir nou al direk Bilgari ek pa retourn Ouganda. Alor, nou pa ti retourn laba pou ramas nou bann zafer ouswa pou dir orevwar nou bann kamarad. Olie sa, nou ti al Betel Lalmagn, bann-la ti donn nou enn loto, ek nou ti al Bilgari. Laba, nou ti al servi dan lavil Sofia, dan enn ti group kot ti ena apepre 20 proklamater.

Nou ti gagn bann lezot difikilte dan Bilgari. Pou koumanse, nou pa ti koz Bilgar. Anplis, ti ena zis de piblikasion dan sa lang-la: La vérité qui conduit à la vie éternelle ek Mo Liv Zistwar Labib. Nou ti trouv sa bien difisil osi pou koumans bann letid Labib. Selman, malgre sa bann difikilte-la, nou ti group ti bien kontan prese. Legliz Ortodox ti remark sa, ek se lerla mem ki nou’nn koumans gagn bann problem!

An 1994, gouvernman Bilgari ti nepli konsider bann Temwin Zeova kouma enn relizion, ek akoz sa, boukou dimounn dan Bilgari ti panse ki nou ti enn sekt bien danzere. Sertin frer ti mem al dan prizon. Dan lagazet ek lor televizion, bann dimounn ti pe koz manti lor nou. Zot ti dir ki bann Temwin Zeova ti anvi ki zot zanfan mor parski zot pa les zot zanfan met disan, ek ki bann Temwin ti ankouraz bann lezot Temwin pou swiside. Alor, ti koumans vinn bien difisil pou prese dan Bilgari. Kan nou ti al prese, souvan bann dimounn ti maltret nou, zot ti apel lapolis, ouswa zot ti avoy bann kitsoz lor nou. Ti nepli kapav fer bann piblikasion rant dan Bilgari, ek ti vinn bien difisil pou lwe bann lasal pou fer bann renion. Lapolis ti mem aret enn nou bann lasanble rezional. Heinz ek mwa, nou pa ti abitie trouv bann dimounn ena sa kantite laenn-la anver nou. Zot ti bien diferan ar bann abitan Ouganda, ki ti dispoze pou etidie Labib avek nou. Ki kitsoz ti ed nou pou nou pa dekouraze?

Nou ti pas letan ar nou bann frer ek ser, ek sa ti fer nou gagn boukou lazwa. Zot ti vremem kontan laverite ek zot ti rekonesan ki nou ti avek zot. Sakenn ti soutenir ek ti pran swin so kamarad. Heinz ek mwa nou’nn aprann ki, pou ki nou ere dan nou lafektasion, nou bizin kontign mazinn bann dimounn olie ki nou mazinn nou bann problem.

Avek letan, ti koumans vinn pli fasil pou prese dan Bilgari. An 1998, gouvernman ti rekoumans konsider bann Temwin Zeova kouma enn relizion, ek nou ti koumans tradir boukou piblikasion dan lang Bilgar. Apre sa, an 2004, enn nouvo batiman biro nasional ti ouver dan Bilgari. Azordi, ena 57 lasanble dan Bilgari ek 2,953 proklamater. Ek lane 2024, 6,475 dimounn ti asiste Komemorasion Lamor Zezi. Enn lepok, ti ena zis sink ser dan Sofia, me aster-la ena nef lasanble laba. Nou’nn vremem trouv “seki tipti . . . vinn enn milye.”—Iza. 60:22.

 NOU GAGN BANN PROBLEM PERSONEL

Mo finn gagn boukou problem lasante. Bann dokter plizir fwa ti trouve ki mo ti ena bann timer. Mo ti mem ena enn timer dan mo latet. Mo ti swiv enn tretman bien difisil pou fer sa timer-la vinn tipti, ek mo ti al Lenn pou fer enn loperasion 12 er-tan pou ki tir maximum dan sa timer-la. Apre sa, mo ti al repoze dan biro nasional Lenn, ek kan mo ti santi mwa pli bien, nou ti retourn dan nou lafektasion dan Bilgari.

Heinz ti gagn enn maladi erediter ki bien rar. Akoz sa maladi-la, li ti gagn difikilte pou koze, pou marse, ek pou kontrol so bann mouvman. Plis so leta ti pe anpire, plis li ti bizin depann lor mwa. Parfwa, mo ti telman fatige ki mo ti trakase tansion mo nepli kapav okip li. Erezman, enn zenn frer ki apel Bobi, ti invit Heinz souvan pou al prese ansam avek li. Bobi pa ti gagn onte ki Heinz ti gaga ouswa ki li pa ti kapav kontrol so bann mouvman. Li ti touletan la pou ed mwa kan mo pa ti kapav okip Heinz. Mem si Heinz ek mwa nou ti desid pou pa gagn zanfan pou ki nou kapav fer plis dan nou servis pou Zeova, pou nou, Bobi ti koumadir enn zanfan ki Zeova ti donn nou!—Mark 10:29, 30.

Heinz ti osi gagn enn kanser, ek mo leker ti bien fermal kan li ti mor an 2015. Li mank mwa boukou. Se li ki ti touletan ed mwa pou mo pa trakase. Sa finn pran boukou letan pou ki mo abitie ar so labsans. Selman, mo pans li souvan, se koumadir li ankor vivan pou mwa! (Lik 20:38) Toulezour, mo rapel bann bon konsey ek bann zoli kitsoz ki li ti abitie dir mwa. Mo bien rekonesan anver Zeova ki Heinz ek mwa nou’nn kapav servi Li pandan tou sa bann lane-la.

MO REMERSIE ZEOVA PARSKI LI’NN SOUTENIR MWA

Zeova inn ed mwa pou andir tou mo bann difikilte. Li’nn osi ed mwa pou vinn enn misioner ki kontan bann dimounn, mem si mo bien timid. (2 Tim. 1:7) Gras-a Zeova, mo ti ser ek mwa nou toule-de dan servis aplintan aster-la. So misie ek li dan servis sirkonskripsion, ek zot vizit diferan lasanble dan Lerop kot koz lang Serb. Mo papa plizir fwa ti priye pou ki so de tifi vinn pionie, ek Zeova inn reponn so lapriyer!

Sak fwa ki mo etidie Labib, mo santi ki Zeova donn mwa so lape. Dan bann moman difisil, mo’nn aprann pou “fer bann lapriyer ankor pli profon,” parey kouma Zezi ti fer. (Lik 22:44) Enn fason ki Zeova reponn mo bann lapriyer, se gras-a lamour ek zantiyes ki mo bann kamarad dan mo lasanble ena pou mwa. Souvan zot invit mwa dan bann ti program, ek zot dir mwa ki kantite zot kontan mwa. Sa vremem rann mwa zwaye!

Souvan mo reflesi lor lesperans rezireksion. Mo mazinn mo bann paran devan nou lakaz. Zot zenn ek zoli, parey kouma zot ti ete kan zot ti fek marye. Mo mazinn mo ser ki pe kwi manze, ek mo trouv Heinz ki pe debout akote ar so seval. Kan mo mazinn sa bann kitsoz-la, sa donn mwa boukou lazwa. Sa ed mwa osi pou andire ek pou ena boukou rekonesans anver Zeova.

Kan mo mazinn tou bann bon kitsoz ki Zeova inn donn mwa dan mo lavi, ek tou bann bon kitsoz ki Li pou donn mwa dan lavenir, mo ena mem santiman ki David, ki ti dir dan Psom 27:13, 14: “Kot mo ti pou ete si mo pa ti ena lafwa ki mo pou trouv bonte Zeova dan pei bann vivan? Met to lespwar an Zeova; pran kouraz ek gard enn leker for. Wi met to lespwar an Zeova.”