LARTIK LETID 15
KANTIK 30 Mo Bondie, Mo Kamarad, ek Mo Papa
“Vinn Pros ar Bondie, Sa Li Bon” pou Nou!
“Pou mwa, vinn pros ar Bondie, sa li bon pou mwa.”—PS. 73:28.
PWIN PRINSIPAL
Dan sa lartik-la, nou pou gete kouma nou kapav vinn pli pros ar Zeova ek nou pou gete ki bann bienfe nou pou gagne.
1-2. (a) Ki bann zefor nou bizin fer pou nou vinn kamarad ar enn kikenn? (b) Ki nou pou examine dan sa lartik-la?
ESKI to ena enn bon kamarad? Ki to’nn bizin fer pou vinn kamarad avek li? Kitfwa to’nn pran letan pou aprann konn li, to’nn konn bann difikilte ki li’nn gagne, ek to’nn aprann osi bann kitsoz ki li kontan ek ki li pa kontan. To’nn trouv osi so bann zoli kalite ek kitfwa to’nn anvi imit so bann zoli kalite. Tou sa bann kitsoz-la inn fer ki to bien kontan to kamarad!
2 Sa demann letan ek zefor pou vinn enn bon kamarad avek enn kikenn. Li parey pou Zeova osi. Kan nou pran letan pou aprann konn Li, nou pou vinn pli pros ar Li. Dan sa lartik-la, nou pou gete kouma nou kapav vinn pli pros ar Zeova ek nou pou gete ki bann bienfe nou gagne kan nou fer sa. Me pou koumanse, anou gete kifer li bon ki nou vinn pros ar nou meyer Kamarad, Zeova.
3. Kifer li inportan ki nou reflesi lor kifer li bon ki nou vinn pros ar Zeova? Servi enn lexanp pou explike.
3 Li inportan ki nou pran letan pou reflesi lor kifer li bon ki nou vinn pros ar Zeova. Kifer? Parski kan nou fer sa, sa pou motiv nou pou kontign vinn pros avek Li. (Ps. 63:6-8) Anou pran enn lexanp pou explik sa. An zeneral, bann dimounn kone ki li bon ki nou manz bann manze ki bon pou lasante, ki nou fer lexersis, ki nou dormi bien, ek ki nou bwar ase delo toulezour. Me malerezman, boukou dimounn pa pran kont sa bann kitsoz-la. Akoz sa, zot ena enn move lasante. Selman, plis bann dimounn reflesi lor kouma sa bann kitsoz-la kapav ed zot pou res an bonn sante, plis zot anvi fer li. Dan mem fason, nou kone ki li bon ki nou vinn kamarad Zeova. Ek kan nou reflesi bien lor bann rezon kifer li bon ki nou vinn kamarad Zeova, nou pou anvi kontign vinn pros ar Li.—Ps. 119:27-30.
4. Ki kitsoz ekrivin Psom 73:28 ti dir?
4 Lir Psom 73:28. Ekrivin Psom 73 ti enn Levit ek li ti servi kouma mizisien dan tanp Zeova. Pandan plizir lane, li ti ador Zeova avek fidelite. Me kanmem sa, li ti trouv sa inportan ki li ek lezot osi rapel ki li bon ki zot “vinn pros ar Bondie.” Ki bann bienfe nou gagne kan nou aprann konn Zeova bien ek ki nou vinn pli pros ar Li?
KAN NOU “VINN PROS AR BONDIE,” SA RANN NOU ERE
5. (a) Kifer sa rann nou ere kan nou vinn pli pros ar Zeova? (b) Kouma sazes ki Zeova donn nou kapav ed nou ek protez nou? (Proverb 2:6-16)
5 Plis nou vinn pros ar Zeova, plis nou ere. (Ps. 65:4) Ena boukou rezon kifer nou kapav ere. Par exanp, kan nou lir seki Zeova dir nou dan Labib ek kan nou obeir Li, nou gagn lasazes. Sazes Zeova protez nou kont bann move linflians ek anpes nou fer bann pese grav. (Lir Proverb 2:6-16.) Se akoz sa ki Labib dir: “Ere enn kikenn ki trouv lasazes, ek enn kikenn ki gagn disernman.”—Prov. 3:13.
6. Kifer sa ekrivin psom la ti perdi so lazwa?
6 Selman, mem bann kamarad Zeova pas par bann sitiasion bien tris. Par exanp, ekrivin Psom 73 ti perdi so lazwa parski li ti pans lor bann kitsoz negatif. Li ti agase ek li ti zalou, parski pou li bann move dimounn ki pa ti pran kont Bondie ek So bann prinsip ti ena enn zoli lavi. Li ti panse ki bann dimounn violan ek gran-nwar ti kapav gagn seki zot anvi, zot ti ena enn bon lasante, ek zot pa ti soufer. (Ps. 73:3-7, 12) Sa sitiasion-la ti telman afekte sa ekrivin psom la, ki li ti koumans demann limem si li vo lapenn servi Zeova. Li ti telman tris, ki li ti dir: “Wi, se pou nanye ki mo finn pirifie mo leker, ek ki mo lav mo lame dan linosans.”—Ps. 73:13.
7. Ki nou bizin fer kan nou santi nou tris? (Get lor kouvertir.)
7 Mem si sa ekrivin psom la ti bien tris, li ti fer zefor pou sanz so fason panse. Kan li ti “rant dan gran tanp Bondie,” Zeova ti ed li pou koriz so fason panse. (Ps. 73:17-19) Zeova Li nou bon Kamarad ek Li kone kan nou tris. Alor, kan nou tris, nou bizin priye Li ek demann Li so led pou nou kapav kone seki nou bizin fer. Gras-a bann konsey ki ena dan so Parol ek lankourazman nou bann frer ek ser, nou kapav gagn lafors pou kontign servi Li, mem kan nou bien tris. Ek kan nou extra trakase ek nou pa kone seki nou bizin fer, Zeova pou rekonfort nou ek Li pou ed nou pou nou res kalm.—Ps. 94:19. a
Levit ki’nn ekrir Psom 73 pe debout devan “gran tanp Bondie” (Get paragraf 7)
KAN NOU “VINN PROS AR BONDIE,” NOU ENA ENN ZOLI LAVI EK ENN LESPWAR POU LAVENIR
8. Ki lezot bienfe nou gagne kan nou vinn pros ar Bondie?
8 Kan nou vinn pros ar Bondie, nou gagn de lezot bienfe. Premierman, nou ena enn zoli lavi depi aster-la mem. Ek deziemman, nou ena enn zoli lespwar pou lavenir. (Zer. 29:11) Aster-la, anou koz inpe plis lor sa de bienfe-la.
9. Kifer nou pli ere kan nou vinn pros ar Zeova?
9 Kan nou vinn pros ar Zeova, sa rann nou pli ere. Azordi, boukou dimounn dir ki Bondie Li pa existe. Akoz sa, zot pa kone pou ki rezon bann dimounn lor later ek zot panse ki dan lavenir bann dimounn pou nepli existe. Selman, kan nou’nn etidie Labib, nou’nn konpran ek nou’nn sir ki ena enn Bondie. Nou kone ki “li existe, ek ki li vinn sa kikenn ki rekonpans bann ki fer gran zefor pou rod li.” (Ebre 11:6) Anplis, Zeova finn kree nou pou ki nou servi Li. Alor, kan nou servi Li, nou pou vremem ere.—Det. 10:12, 13.
10. Ki promes Zeova inn fer pou bann ki ena konfians dan Li?
10 Azordi, boukou dimounn pena enn vre lespwar pou lavenir. Zot pans zis travay, marye, ena zanfan, ek ramas kas pou zot retret. Zot pa konn bann promes ki Bondie inn fer pou lavenir. Parkont, bann serviter Zeova, zot met zot lespwar dan Li. (Ps. 25:3-5; 1 Tim. 6:17) Nou ena konfians dan nou Bondie ek nou Kamarad, ek nou kone ki Li pou tini so bann promes. Dan lavenir, nou pou ena posibilite pou servi Li pou touletan dan Paradi.—Lir Psom 37:29.
11. Ki lezot bienfe nou gagne kan nou vinn pros ar Bondie, ek ki lefe sa ena lor Li?
11 Kan nou vinn pros ar Bondie, nou gagn boukou lezot bienfe ankor. Par exanp, kan nou repanti, Zeova promet ki Li pou pardonn nou bann pese. (Iza. 1:18) Gras-a sa, nou ena enn konsians kler ek nou pa bizin kontign trakase akoz bann pese ki nou’nn fer dan lepase. (Ps. 32:1-5) Ek kan nou fer Zeova plezir, sa rann nou ere. (Prov. 23:15) Biensir, ena ankor boukou lezot bienfe ki nou kapav gagne kan nou ena enn bon lamitie avek Zeova. Aster-la, anou gete kouma nou kapav vinn pli pros ar Li.
KOUMA NOU KAPAV KONTIGN “VINN PROS AR BONDIE”?
12. Ki bann zefor nou’nn bizin fer pou nou vinn pros ar Zeova?
12 Avan ki nou ti pran batem ek vinn enn Temwin Zeova, nou’nn bizin fer boukou kitsoz pou ki nou kapav vinn kamarad avek Zeova. Nou’nn aprann laverite lor Li ek lor Zezi, nou’nn repanti pou nou bann pese, nou’nn montre ki nou ena lafwa dan Zeova, ek nou’nn fer nou best pou nou obeir Li. Selman, pou nou vinn pli pros ar Zeova, nou bizin kontign fer sa bann kitsoz-la.—Kol. 2:6.
13. Sit trwa kitsoz ki kapav ed nou pou kontign vinn pli pros ar Zeova.
13 Ki kitsoz kapav ed nou pou vinn pli pros ar Zeova? (1) Nou bizin kontign lir ek etidie Labib, ek kan nou fer sa, fode pa nou zis aprann bann kitsoz lor Zeova. Nou bizin osi fer zefor pou konpran so fason panse, konpran seki Li anvi nou fer, ek viv dan enn fason ki fer Li plezir. (Efe. 5:15-17) (2) Nou bizin ogmant nou lafwa, kan nou reflesi lor kouma Li’nn montre so lamour pou nou dan diferan fason. (3) Nou bizin kontign deteste bann kitsoz ki Zeova deteste, ek fode pa nou frekant bann dimounn ki fer sa bann kitsoz-la.—Ps. 1:1; 101:3.
14. Ki nou kapav fer toulezour pou fer Zeova plezir? (1 Korintien 10:31) (Get zimaz osi.)
14 Lir 1 Korintien 10:31. Li bien inportan ki nou fer bann kitsoz ki fer Zeova plezir. Savedir ki nou bizin fer plis ki zis al renion ek sorti predikasion. Seki nou fer toulezour bizin fer leker Zeova kontan. Par exanp, kan nou onet dan tou kitsoz ek ki nou zenere ar lezot, nou fer Zeova plezir. (2 Kor. 8:21; 9:7) Li anvi osi ki nou montre rekonesans pou lavi ki Li’nn donn nou, ek nou fer sa kan nou fer bien atansion ar seki nou manze ek nou bwar, ek kan nou fer bann kitsoz ki ed nou pou ena enn bon lasante. Kan Zeova trouve ki nou pe fer zefor pou fer Li plezir, Li plis kontan nou ankor.—Lik 16:10.
Kan nou pridan lor larout, nou manz bann manze ki bon pou lasante, nou fer lexersis, ek nou montre lospitalite, sa fer Zeova plezir (Get paragraf 14)
15. Kouma Zeova anvi ki nou tret lezot?
15 Zeova Li bon ar tou dimounn, mem ar bann ki pa servi Li. (Mat. 5:45) Li anvi ki nou osi nou bon anver tou dimounn. Par exanp, nou bizin ‘pa koz an mal lor personn, ek pa rod lager.’ Nou bizin osi “touletan montre douser anver tou dimounn.” (Tit 3:2) Alor, mem si bann dimounn pa krwar dan Zeova, fode pa nou panse ki nou pli meyer ki zot. (2 Tim. 2:23-25) Pou nou vinn pli pros ar Zeova, nou bizin touletan tret tou dimounn avek bonte.
NOU KAPAV “VINN PROS AR BONDIE” MEM KAN NOU FER BANN ERER
16. Mem si sa ekrivin psom la ti pe servi Zeova depi plizir lane, ki li ti resanti?
16 Parfwa, nou kapav panse ki Zeova nepli pros ar nou akoz bann erer ki nou’nn fer. Se seki ekrivin Psom 73 ti panse. Li ti dir: “Mo lipie ti’nn preske pran enn lot direksion, ninport ki ti zafer ti kapav fer mwa tonbe.” (Ps. 73:2) Li ti rekonet ki li ti vinn “amer” ek “bet,” ek ki li ti vinn “kouma enn zanimo ki pena bon sans” devan Zeova. (Ps. 73:21, 22) Me akoz so bann erer, eski li ti panse ki Zeova ti nepli kontan li ek ki Li pa ti pou pardonn li?
17. (a) Kan sa ekrivin psom la ti dekouraze, ki li ti fer? (b) Ki leson nou aprann ar so lexanp? (Get zimaz osi.)
17 Si sa ekrivin psom la ti panse ki Zeova ti abandonn li, kitfwa li ti pans sa zis pou enn ti moman. Kifer? Parski mem kan li ti bien dekouraze, li ti kone ki li ti bizin vinn pli pros ar Zeova. Li ti dir: “Me mo avek twa [Zeova] touletan; to finn trap mo lame drwat. To pou gid mwa avek to konsey, ek apre sa, to pou amenn mwa ver laglwar.” (Ps. 73:23, 24) Ki leson nou aprann? Kan nou santi ki nou lafwa feb, ouswa kan nou santi nou dekouraze akoz nou bann erer, nou bizin demann Zeova so lafors. (Ps. 73:26; 94:18) Ek mem si nou’nn fer enn pese grav, nou kapav retourn ver Zeova. Nou sir ki Li ‘pre pou pardonn’ nou. (Ps. 86:5) Li bien inportan ki nou vinn pros ar Zeova, sirtou kan nou bien dekouraze.—Ps. 103:13, 14.
Kan nou santi ki nou lafwa feb ouswa kan nou dekouraze, nou bizin pli aktif dan nou bann laktivite spiritiel. Sa pou ed nou pou vinn pli pros ar Zeova (Get paragraf 17)
“VINN PROS AR BONDIE” POU TOULETAN
18. Kifer nou pou touletan kapav vinn pli pros ar Zeova?
18 Nou pou touletan kapav vinn pli pros ar Zeova, ek nou pou touletan kontign aprann konn Li. Se akoz sa ki Labib demande ‘kisann-la kapav vremem konpran’ Zeova so fason panse ek azir, so sazes, ek so konesans!—Rom. 11:33.
19. Dapre sa de verse Psom la, ki kitsoz nou kapav sir?
19 Psom 79:13 dir: “Nou, to pep ek troupo ki dan to patiraz, nou pou remersie twa pou touletan, ek nou pou loue twa zenerasion apre zenerasion.” Kan nou vinn pli pros ar Zeova, nou osi nou kapav sir ki nou pou gagn bann bienfe pou touletan, ek nou pou kapav dir: “Bondie Li enn ros ki soutenir mo leker ek Li mo par pou touletan.”—Ps. 73:26.
KANTIK 32 Pran Par pou Zeova!
a Bann dimounn ki extra trakase ouswa ki res tris pandan lontan, bizin rod led enn dokter. Pou konn plis lor la, get Latour Degard No. 1 2023.
