“Tauhalo Diravana. Emai hisihisi iboudiai lalodiai ia ese taumai e halodiamu.”​—2 KOR. 1:3, 4.

ANE: 38, 6

1, 2. Edena dala ai Iehova ese eda hisihisi lalodiai tauhalo e henidamu, bona ena Hereva amo dahaka hahegoada herevana e henidamu?

SINGUL tadikakana ta ladana Eduardo, ese ena lalohekwarahi na headava elda tauna ta, Stephen, e hamaorolaia. Eduardo ese 1 Korinto 7:28 ena hereva e laloa, una siri na e gwaumu: “Headava . . . taudia na hisi do bae ani.” Ia ese Stephen e nanadaia: “Ina ‘hisi’ anina be dahaka, bona bema baina headava neganai, edena dalai baina haheaukalaia diba?” Stephen ese una henanadai do se haerelaia neganai, ia ese Eduardo e hamaoroa aposetolo Paulo ena hereva ma ta baine laloa, Iehova na “tauhalo Diravana,” Ia ese eda hisihisi iboudiai lalodiai tauda e halodiamu.​—2 Kor. 1:3, 4.

2 Momokani Iehova na Tama lalokauna ta, bona hekwakwanai ta davarimu negadiai ia ese tauhalo e henidamu. Reana emu mauri ai nega momo Dirava ese ena Hereva amo e durumu bona e hakaumu. Ta diba momokanimu Dirava ese idaunegai ena  hesiai taudia e durudia heḡereḡerena, ita danu be durudamu.​—Ieremia 29:11, 12 ba duahi.

3. Ededia henanadai baita herevalaimu?

3 Bema eda hekwakwanai o hisihisi e varamu badidia baita dibamu, una ese be durudamu baita haheaukalaidiamu. Headava bona ruma bese ai e varamu hisihisidia lalodiai una na mai anina bada. To, Paulo ese e gwauraia hisihisina ese baine havara ḡaudia haida be dahaka? Baibul negadiai bona hari ina negai, ededia haheitalai ese bae duruda diba goada baita abi totona? Unu baita dibamu neganai be durudamu baita haheaukamu.

HEADAVA LALONAI E VARAMU HEKWAKWANAIDIA

4, 5. Headava lalonai e varamu hekwakwanaidia haida be dahaka?

4 Dirava ese tau bona hahine ginigunadia e karadia neganai, eto: “Tau ese tamana sinana baine rakatanidia, adavana baine badinaia, raruosi na anidia tamona ai baela.” (Gen. 2:24) Iehova ese una hereva na tau bona hahine ginigunadia e haheadavadia neganai e gwauraia. To, ita na dia ḡoevadae tauda dainai, ta e headavamu neganai ruma bese lalonai hekwakwanai na e varamu. (Roma 3:23) Kekeni ta e headavamu neganai, ia na da dia tamana bona sinana edia siahu henunai to adavana ena siahu henunai. Tau na Dirava ese maoro e henia adavana kwaranai bainela. (1 Kor. 11:3) Headava matamata taudia momo ediai una sisiba ibadinana na auka. Dirava ena Hereva heḡereḡerena, namona na hahine na baine abia dae hari ia na adavana ena hahekau henunai, dia tamana bona sinana edia hahekau henunai. Nega momo headava matamata taudia na ravadia bona ihadia ida asie ḡaukara heboumu dainai hekwakwanai e davarimu.

5 Lalohekwarahi ma haida danu ma be varamu, bema hahine na e rogorogo. Nega momo ena be natu ihavarana na moale ḡauna, to una moale na rogorogo negana lalonai bona gabeai bae vara metaudia ese be hamaraḡiamu. Danu idia ese una nega lalonai bona gabeai bae nege monidia daidiai be lalohekwarahimu. Natu be varamu neganai ḡau momo na be idaumu. Sina ena nega bada na natuna inarina ai be haoreamu. Nega haida tau na be mamiamu hahine ese na se laloamu, badina hahine ese nega bada na natuna inarina karanai be haoreamu. Danu, tau ese maduna matamatadia ma haida be huamu. Tau ena maduna na be badamu badina ia ese tauani dalanai natuna be nariamu.

6-8. Edena dalai natu ihavarana urana se ḡuḡurumu karana ese lalohekwarahi baine havaraia diba?

6 Headava taudia haida ese na hekwakwanai idauna ma ta e davariamu. Ena be e uramu natu bae havara, to natu na basie havara dibamu. Hahine na se rogorogomu neganai be lalometaumu. Headava bona natu ihavaradia na mai madunadia, to haida ediai natu ihavaradia urana se ḡuḡurumu neganai e lalohisihisimu. (Her. 13:12) Baibul negadiai, bema hahine ta na gabani una na hemarai ḡauna. Iakobo adavana, Rahela na e lalohisihisiva badina kakana na natu e havarava to ia be lasi. (Gen. 30:1, 2) Tano haida ai momo na e laloamu natu momo bae havara na namo, una dainai misinari taudia na e nanadaidiamu dahaka dainai idia na asi natudia. Ena be una henanadai na e haerelai namonamomu, to momo na e gwaumu: “Daimui ai baia ḡuriḡuri!”

7 Mani England ai e nohomu taihuna ta a laloa, ia na e ura dikadikava natuna ta baine havaraia to una na se vara. Ia na e diba ina nega oromana ai bese na basine havara  diba dainai ia na e lalohisihisi bada. Una dainai idia ese heubu ta e naria. To, ia na e gwa: “Dounu na lalohisihisiva. Badina mai dibagu heubu iabina bona natugu korikori ihavarana na dia heḡereḡere.”

8 Baibul na e gwa Kristen hahine na “natuna iabina ai mauri baine davaria.” (1 Tim. 2:15) Una anina na dia ta na natu ihavarana karana eiava iabina karana dainai baine mauri hanaihanai. To, una siri anina na hahine na natuna inaridia karana bona ruma ḡaukaradia ikaradia karana dainai, ia na asi ena nega ma haida baine maumauraidia bona basine udu mauri. (1 Tim. 5:13) To, momokani headava bona ruma bese maurina ai hekwakwanai na dounu be davarimu.

Ta na ena lalokau tauna e masemu neganai, edena dalai baine haheauka diba? (Paragraf 9, 12 ba ita)

9. Edena dalai ta adavana e masemu na hahetoho ḡauna?

9 Headava ai bae vara hekwakwanaidia ta herevalaimu neganai, ita ese ina hekwakwanai na asita laloamu. Eda lalokau tauna ta ena mase. Oibe, momo na adavadia lalokaudia e masemu neganai una na hahetoho ḡauna. Una hahetoho na reana vabu eiava doḡae ese guna se laloa ina negai baine haheaukalaia ḡauna. Kristen taudia na Iesu ese e gwauraia toreisi lou gwauhamatana e abia dae momokanimu. (Ioa. 5:28, 29) Una helaro ese vabu eiava doḡae be ede e durudia tomamu? Una ese tauhalo e henidiamu. Tamada lalokauna na ena Hereva amo hekwakwanai e davarimu taudia e durudiamu bona tauhalo e henidiamu. Mani Iehova ese ena hesiai taudia haida ediai hahenamo bona tauhalo e heni daladia aita ita.

HEKWAKWANAI NEGADIA AI TAUHALO TA ABIMU

10. Edena dala ai Hana na tauhalo e davari? (Rau 4 ai laulau ba itaia.)

10 Elkana adavana lalokauna, Hana enai hahetoho ta e vara. Ia na gabani to Elkana adavana ma ta Penina na natuna e havarava. (1 Samuel 1:4-7 ba duahi.) Una dainai “laḡani iboudiai” lalodiai Hana na Penina ese e hauraiava. Una ese Hana lalona na e hahisia badava bona e lalometauva. Ia ese ena lalometau na Iehova enai e ḡuriḡurilai. Oibe, ia na e ḡuriḡuri daudau “Iehova vairanai.” Hana be e abia dae Iehova ese ena noinoi na baine haerelaia, a? Oibe. Badina e ḡuriḡuri murinai, ia na vairana na ma “se huaia lou.” (1 Sam. 1:12, 17, 18) Ia na e diba momokani Iehova ese ena noinoi ḡauna na baine henia eiava dala ma ta ai tauhalo baine henia.

11. Edena dala ai ḡuriḡuri karana amo tauhalo baita abi diba?

11 Hahetoho bona hekwakwanai na doini be varamu, badina ita na dia ḡoḡoevadae bona Satana ese e biaguamu tanobadana ai ta nohomu. (1 Ioa. 5:19) To, ta moalemu badina mai dibada Iehova na “tauhalo Diravana”! Eda hekwakwanai o hahetoho baita haheaukalaidia dalana ta na ḡuriḡuri karana. Hana ese ena lalohekwarahi ḡauna na Iehova enai e gwauraia. Una heḡereḡerena, hisihisi ta davarimu negadiai, eda metau na Iehova enai baita gwauraia. To dia una mo, namona na Ia baita noia goadagoada, bona mai kudouda idoinai ida eda hemami baita gwaurai.​—Fili. 4:6, 7.

12. Dahaka ese Ana e durua dainai e moale?

12 Ena be ta na gabani eiava adavana e mase dainai be lalohisihisimu, to tauhalo na be abi dibamu. Iesu ena negai, peroveta hahinena Ana na e headava bona laḡani 7 murinai adavana e mase. Baibul ese na se hahedinaraia ia be mai natuna eiava lasi. Ana laḡanina 84 neganai, ia be dahaka e karava? Luka 2:37 na e gwaumu: “Ia ese Dubu Helaḡa se rakataniava, Dirava e  toma henia dihova, e ḡuriḡuriva, e anivagava.” Oibe, Ana na Iehova itomadiho henina karana amo tauhalo e abia bona e moale.

13. Edena dalai tura korikoridia ese bae hagoadamu diba? Haheitalai ta a gwauraia.

13 Eda tadikaka bona taihu ta bamodiamu neganai, ita na tura korikoridia bona bamo namodia ta davarimu. (Her. 18:24) Paula na laḡanina 5 ai sinana ese hereva momokani e rakatania neganai, e lalometau. Una hekwakwanai baine hahanaia na auka. To, kongrigeisen ai painia taihuna ta ladana Ann ese e hagoadaia bona e durua. Paula na eto: “Ena be Ann na dia lau varavaragu, to lau na e lalogu bada bona una ese lau na e hagoadagu, Iehova baina hesiai henia hanaihanai totona.” Paula na doini Dirava e hesiai heniamu. Bona e moalemu badina sinana na kongrigeisen e lou henia bona ia ida Dirava e hesiai heniamu. Ann danu e moalemu badina Paula e durua lauma dalanai baine goada.

14. Ma haida baita hagoadadiamu neganai dahaka hahenamo baita davarimu?

14 Bema mai eda lalokau ida ma haida baita durudiamu, eda hekwakwanai na baita lalodia boio dibamu. Headava eiava singul taihudia na mai dibadia, sivarai namona iharorolaina ḡaukarana amo moale be davarimu. Idia na e uramu Dirava ena ura bae karaia amo Ia bae hanamoa.  Ma haida ediai haroro ḡaukara na heduru ḡauna namona. Momokani, ita ese kongrigeisen taudia bona eda teritori ai e nohomu taudia baita lalodia badamu neganai, kongrigeisen ai hetadikaka karana baita hagoadaiamu. (Fili. 2:4) Aposetolo Paulo na haheitalai namona. Tesalonika kongrigeisen taudia ediai ia na “natuna e ubudia hahinena na heto”; bona ia na tama ta heḡereḡerena e karava.​—1 Tesalonika 2:7, 11, 12 ba duahi.

RUMA BESE ESE TAUHALO BAE ABI

15. Natu ediai hereva momokani ihahedibalaina be daidia edia maduna?

15 Ruma bese taudia baita hagoadaia bona baita durudia na namo. Nega haida, kamonai taudia matamatadia ese lo tadikaka o taihu be noidiamu natudia na hereva momokani bae hadibadia, bona idia ida Baibul bae stadilaia. To Baibul ese e hahedinaraiamu, natu ihadibadia karana na tama sina edia maduna. (Her. 23:22; Efe. 6:1-4) Ena be nega haida ma haida ese heduru bae heni na namo, to tama sina ese natudia na dounu bae hadibadia. Hanaihanai ruma bese lalonai herevahereva karana na mai anina bada.

16. Natu idurudia karana ai, dahaka baita laloatao na namo?

16 Bema tama sina na e uramu ta ese natudia baine stadi henidia, unu natu baine stadi henidia tauna ese tama sina edia maduna na basine hua toho. Nega haida reana hereva momokani asie laloa badamu tama sina natudia na Witnes tauna ese be stadi henidiamu. To, Witnes tauna na baine helalotao, unu natu e stadi henidiamu neganai, ia na idia tamadia bona sinadia heḡereḡeredia basine kara na namo. Bona unu natu edia stadi na tamadia bona sinadia ruma ai nohodiai baine karaia, eiava lo tadikaka o taihu ta ida bae karaia, o taunimanima ese bae itadia diba gabudiai bae stadi diba. Unu amo taunimanima na lalohadai kereredia basie abi. Reana gabeai, tama sina na Dirava ese e henidia maduna bae huaia bona natudia bae hadibadia diba.

17. Edena dala ai memero kekeni ese ruma bese bae hagoadaia diba?

17 Dirava momokanina e lalokau heniamu bona ena haheḡani e badinamu memerodia bona kekenidia ese edia ruma bese be hagoadaia dibamu. Idia ese tamadia sinadia be matauraidiamu bona tauani dalanai be durudiamu. Danu idia ese Dirava be badinaiamu neganai, ruma bese na be moalemu. Abata do se vara neganai, Set tubuna Lamek na Iehova e tomadiho heniava. Lamek ese natuna Noa na ini e herevalaia toma: “Iehova ese vada e hadikaia tanona amo ina mero ese baine harohoda mauri, imada ḡaukaradia bona eda hekwarahi amo baita laḡa ani.” Iehova ese tano e hanamoa neganai, una peroveta herevana na e ḡuḡuru. (Gen. 5:29; 8:21) Hari ina negai danu, memero kekeni ese tomadiho momokani bae badinaia neganai edia ruma bese na be hagoadaiamu, bona be durudiamu hari bona vaira negai bae vara hahetohodia bae haheaukalai.

18. Dahaka ese baine duruda diba ta davarimu hekwakwanaidia baita haheaukalaidia totona?

18 Ḡuriḡuri karana, Baibul sivaraidia ilalodia dobu karana, bona Iehova ena taunimanima ibamodia karana ese hari ina negai momo e durudiamu, edia hisihisi iboudiai lalodiai tauhalo bae abi totona. (Salamo 145:18, 19 ba duahi.) Ta dibamu Iehova na tauhalo e henimu Diravana dainai, una ese e durudamu hari bona vaira negai baita davarimu hekwakwanaidia baita haheaukalai totona.