MARCH 26, 1937 ai, tatau rarua na edia motuka amo Sydney, Australia ela. Idia na laḡani ta lalonai hanua e rakatania, bona motuka amo kilomita 19,300 bamona e heau, ororo bona gunika gabudia e hanaidia. Idia na dia loaloa eiava gabu itana ela. Arthur Willis bona Bill Newlands na painia goadadia bona idia na lalodia e hadai Dirava ena Basileia sivaraina namona na Australia ena gunika hanuadia ai bae harorolaia totona.

Laḡani 1920 lalodiai, Australia ai Bible Student taudia * haida na kone hanuadia bona taoni ai e harorova. Gunika kahana ai taunimanima na gabu ta ta ai e nohomu, una gabu kaukauna ena bada na United States tanona kahana ta heḡereḡerena. To, tadikaka na mai dibadia Iesu murinai e rakamu taudia ese ia sivaraina na “tanobada heḡeḡe-madai” bae harorolaia, anina na Australia ena gunika gabudia ai danu. (Kara 1:8) To una ḡaukara badana be ede bae karaia toma? Idia na e abia dae momokani Iehova ese edia hekwarahi na be hanamoamu, una dainai lalodia e hadai una ḡaukara bae karaia.

PAINIA TAUDIA ESE HARORO ḠAUKARA E MATAMAIA

Laḡani 1929 ai, Queensland bona Western Australia kongrigeisen taudia na motuka haida e abi, unu amo gunika gabudia ai bae haroro. Unu motuka na painia taudia ese e taridiava, idia na unu gunika daladia iheaudia mai dibadia bona motuka bae dika neganai bae hanamodia diba. Unu painia taudia ese guna asie haroro henidia gabudia momo e vadivadidia.

Painia taudia haida na asi edia motuka dainai baskele amo gunika gabudia e laova. Heḡereḡere, laḡani 1932 ai, Bennett Brickell, laḡanina 23, na Rockhampton, Queensland amo ela not kahana ena gunika gabudia, unuseniai hua 5 bamona e haroro. Iena baskele ai na, hetaru, dabua, aniani bona buka momo e uda. Ena baskele taeadia e dika neganai, una ese ia na se koua, badina dibana Iehova ese be duruamu. Ia na kilomita 320 ena baskele e toia ela bona e kau. E hanaidia gabudia haida ai guna taunimanima na ranu lasi dainai e mase.  Laḡani 30 mai kahana lalodiai, Tadikaka Brickell na baskele, motubaeke bona motuka amo Australia ena gabu idauidau ela. Ia ese dala e kehoa Aborigine taudia e haroro henidia, bona ena heduru amo kongrigeisen matamatadia e haginidia, bona momo ese e dibaia bona e matauraia.

HEKWAKWANAI HAIDA E HAHANAIDIA

Tanobada heḡeḡemadai, Australia ena popiuleisen na dia bada, bona ena gunika gabudia ai momo edia noho gabudia na mai padadia. Una dainai, Iehova ena taunimanima na lalodia e hadai gunika gabudia ai taunimanima bae tahudia.

Painia tadikakadia rarua Stuart Keltie bona William Torrington na lalodia e hadai gunika gabudia ai bae haroro. Laḡani 1933 ai, idia na Simpson Desert e hahanaia bena ela Alice Springs taonina ai bae haroro. Edia motuka e dika neganai, unuseniai ai e raktania. Tadikaka Keltie na kamelo ta e ḡaukaralaia dounu baine haroro totona—ia aena kahana na au amo e karaia ḡauna ta e atoa. Unu painia edia hekwarahi amo anina namona e vara, idia ese William Creek ai hotel ta biaguna e davaria. Una hotel biaguna Charles Bernhardt, na gabeai hereva momokani e abia dae, ena hotel e hoihoilaia, bona laḡani 15 lalodiai Australia ena gunika gabudia ai e haroro.

Arthur Willis na e heḡaeḡaemu Australia ena gunika gabudia ai baine haroro totona.—Perth, Western Australia, 1936

Unu painia taudia na bae boga-auka bona bae haheauka na namo unu amo e davari hekwakwanai idauidau bae hahanaidia. Matamanai ta herevalaidia tadikakadia rarua, Arthur Willis bona Bill Newlands na Australia ena gunika gabudia ai e harorova neganai, idia na wiki rua lalonai e hekwarahi kilomita 32 bae laolao, badina medu bada dainai kopukopu na bada. Nega haida idia na dina siahu lalonai mai varahudia ida edia motuka e toiava, deset ororodia, nadi kouradia bona sinavai badidia amo e hanaiva. Nega momo edia motuka e dikava neganai, idia na dina haida lalodiai aedia amo eiava baskele amo taoni kahikahidia e laova, bona unuseniai wiki haida e nariva motuka kohudia (parts) bae abi totona. Ena be unu hekwakwanai na e vara to idia na e haheauka. Arthur Willis na Golden Age magasin ese e herevalaia herevana ta e gwauraia, eto: “Ḡau ta ese Iena witnes taudia se koudia.”

Laḡani daudau e painia tauna, Charles Harris na e gwauva, gunika gabudia ai sibona e haroro bona e davari metau idauidau ese ena hetura karana Iehova ida na e hagoadaia. Ma eto: “Bema ta ena kohu na dia momo, una na mauri namona. Nega haida Iesu na mai moalena ida murimuri ai e mahutava, ita danu bema asi eda mahuta gabuna dounu baita moale na namo.” Bona painia momo na unu e kara toma. Idia baita hanamodia badina edia ḡaukara goada dainai taunimanima momo ese sivarai namona e kamonaia bona Dirava ena Basileia e durua.

^ par. 4 Laḡani 1931 ai Bible Student ese ina lada Iehova ena Witnes e abia.Isa. 43:10.