“Umui danu ba haheauka.”​—IAK. 5:8.

ANE: 35, 7

1, 2. (a) Dahaka badi dainai baita henanadaimu: “Edena nega ai”? (b) Dahaka dainai idaunega abidadama taudia edia haheitalai ese e hagoadadamu?

“EDENA nega ai?” Una henanadai na peroveta taudia Isaia bona Habakuku ese e heni. (Isa. 6:11; Hab. 1:2) King David ese Salamo 13 e torea neganai, ia danu nega hani e henanadai: “Edena nega ai?” (Sal. 13:1, 2) Bona eda Lohiabada Iesu Keriso ese danu asi edia abidadama taudia e hereva henidia neganai, una henanadai tamona e gwauraia. (Mat. 17:17) Una dainai basita hoa bema ita na nega haida unu ta henanadai tomamu.

2 Dahaka badi dainai baita henanadaimu: “Edena nega ai?” Reana ita danu haida ese e hahemaoro henida kerere. O ta burukamu bona ta goreremu, eiava ina “dina gabedia ai” e varamu “nega dikadia” daidiai ta lalohekwarahimu. (2 Tim. 3:1) Eiava dekeda taudia edia kara kereredia dainai ta hesikumu o ta lalo manokamu. Herevana dahaka badi daidiai una henanadai baita henimu, to ta moalemu badina idaunegai Iehova e hesiai heniava taudia danu ita heḡereḡereda una henanadai na e heni, to Dirava ese na se gwau henidia!

3. Hekwakwanai badadia ta davarimu neganai dahaka ese baine duruda diba?

 3 To, hekwakwanai badadia ta davarimu neganai dahaka ese baine duruda diba? Hahediba tauna Iakobo, Iesu tadikakana, na eto: “Ba haheauka, ela bona Lohiabada na baine gini dae.” (Iak. 5:7) Oibe, baita haheauka na namo. To, baita haheauka totona dahaka baita kara na namo?

HAHEAUKA ANINA BE DAHAKA?

4, 5. (a) Haheauka anina be dahaka? (b) Iakobo ese haheauka karana anina baine hahedinaraia totona edena haheitalai e ḡaukaralaia? (Rau 3 ai laulau ba itaia.)

4 Baibul ena hereva heḡereḡerena, haheauka na lauma helaḡa huahuana ta; bema dia ḡoevadae tauda ese Dirava ena heduru basita abiamu, hekwakwanai negadiai na basita haheauka dibamu. Haheauka karana na Dirava ena harihari ḡauna ta, bona ta haheaukamu neganai, eda lalokau Ienai bona ma haida ediai ta hahedinaraiamu. Bema hanaihanai basita haheaukamu, eda lalokau na basine goadamu, to haheauka karana ese be hagoadaiamu. (1 Kor. 13:4; Gal. 5:22) Haheauka karana ese Kristen kara namodia ma haida danu e havaramu. Heḡereḡere, haheauka karana dainai baita boga-aukamu, una ese be durudamu hekwakwanai negadiai baita lalo maoromaoro dibamu. (Kol. 1:11; Iak. 1:3, 4) Danu haheauka karana dainai ena be bae hahisida to dika davana basita halouamu, bona hekwakwanai negadiai baita ginigoadamu. Danu, Baibul ese e haḡanidamu namona na mai eda haheauka ida baita nari. Una na Iakobo 5:7, 8 ai e herevalaia (Ba duahi.)

5 Dahaka dainai mai eda haheauka ida baita nari na namo Iehova ese kara ta baine karaia totona? Iakobo ese edai e varamu ḡauna na biru tauna ena ḡaukara ida e haheḡereḡerea. Ena be biru tauna na e ḡaukara goada uhe baine hado totona, to ia ese nega (weather) bona aniani edia tubu dalana na basine biagua diba. Ia ese nega na basine haharaḡaia diba. To mai ena haheauka ida “ena biru anina” baine naria. Una heḡereḡerena, ita na Iehova ena gwauhamata baine haḡuḡuru negana ta nariamu lalonai, ḡau momo na basita biagudia dibamu. (Mar. 13:32, 33; Kara 1:7) Biru tauna heḡereḡerena, namona na mai eda haheauka ida baita nari.

6. Peroveta tauna Mika ena amo dahaka ta dibamu?

6 Hari ina negai e varamu ḡaudia na peroveta tauna Mika ena nega heḡereḡerena. Mika na King dikana Ahasa e lohiava negana lalonai e nohova, una negai kara havara na bada herea. Taunimanima na “kara dika ikarana” ai vada e manada. (Mika 7:1-3 ba duahi.) Mika na mai dibana e varava ḡaudia na basine haidaudia diba. Una dainai dahaka e kara? Ia na eto: “Lau ese Iehova baina haḡerea, ihamaurigu Diravana baina naria; egu Dirava ese baine kamonai henigu.” (Mika 7:7) Mika heḡereḡerena, ita danu “baita nari” na namo.

7. Dahaka dainai Iehova ese ena gwauhamata baine haḡuḡuru negana baita naria mo na dia heḡereḡere?

7 Bema eda abidadama na Mika ena heḡereḡerena, mai eda ura ida Iehova baita nariamu. Ita na dia dibura ruma ai e nohomu bona ihamasena negana e nariamu tauna heḡereḡerena. Ena be se uramu ihamasena negana baine kau, to ia na baine nari. To ita na dia unu bamona! Ita na mai eda ura ida Iehova ta nariamu, badina mai dibada Ia na nega korikori ai ena gwauhamata heḡereḡerena mauri hanaihanai baine henida! Una dainai namona na baita ‘haheauka  bona baita boga auka mai moaleda ida.’ (Kol. 1:11, 12) Bema ta narimu lalonai baita maumaumu badina baita laloamu Iehova na kara ta se karaia haraḡamu, Ia na basine moalemu.​—Kol. 3:12.

E HAHEAUKA TAUDIA EDIA HAHEITALAI

8. Idaunega abidadama taudia edia haheitalai ta lalodia dobumu neganai, dahaka baita lalotao na namo?

8 Idaunega abidadama tatau bona hahine na Iehova ese ena gwauhamata baine haḡuḡurudia totona e nariva mai haheaukadia ida. Edia haheitalai ese be durudamu mai eda ura ida baita nari totona. (Roma 15:4) Edia haheitalai ta lalodia dobumu neganai, namona na idia e nari ena daudau, dahaka dainai mai edia ura ida e nari, bona edia haheauka karana dainai e davari hahenamodia baita lalodiatao.

Abraham na laḡani momo e nari murinai, tubuna Esau bona Iakob e vara (Paragraf 9, 10 ba ita)

9, 10. Abraham bona Sara be ede daudauna e nari bena Iehova ena gwauhamata haida e ḡuḡuru?

9 Abraham bona Sara edia haheitalai mani aita laloa. Idia na “edia abidadama bona edia haheauka daidiai ahudia vada e abi.” Baibul na e gwa, Abraham na e ‘haheauka taritari’ murinai, Iehova ese e hanamoa bona garana e hahutumadia. (Heb. 6:12, 15) Dahaka dainai Abraham baine haheauka na namo? Badina una gwauhamata na laḡani haida muridiai baine ḡuḡuru. Iehova bona Abraham e karaia gwauhamatana na Nisan 14, 1943 B.C.E. ai e ḡuḡuru matama. Una na Abraham, Sara bona edia ruma taudia ese Eufrate Sinavaina e hanaia bona Gwauhamata tanona ai e vareai negana ai. Bena Abraham na ma laḡani 25 e nari ela bona laḡani 1918 B.C.E. ai natuna Isaak e vara, bona  ma laḡani 60 e nari ela bona tubuna Esau bona Iakob na laḡani 1858 B.C.E. ai e vara.​—Heb. 11:9.

10 Abraham ese e abia tanona ena bada be ede bamona? Baibul na e gwa, Iehova ese “tano sisina taina se henia; oibe, aena ihadaina gabuna taina asine henia. Ḡau tamona, e gwau henia hamata do baine henia, bona ia [Abraham] murinai garana danu baine henidia. Una negana ai Abraham na asi natuna.” (Kara 7:5) Abraham na Eufrate Sinavaina amo e hanai bena laḡani 430 muridiai, iena bese na bese badana ai ela bona una tano e noholaia.​—Eso. 12:40-42; Gal. 3:17.

11. Dahaka dainai Abraham na mai ena ura ida Iehova e naria, bona ena haheauka karana dainai dahaka hahenamo be moalelaimu?

11 Abraham na mai ena ura ida e nari, badina Iehova e abidadama henia. (Heberu 11:8-12 ba duahi.) Ia na mai moalena ida e nari, ena be Dirava ese e gwauhamatalai ḡaudia iboudiai e ḡuḡuru na se ita. To tanobada paradaisona ai Abraham be toreisi loumu neganai, be abiamu moalena mani a laloa. Ia na be moalemu badina ia bona ena bese sivaraidia na Baibul lalonai e tore. * Danu, be moalemu badina be dibamu ia ese Iehova ena ura, gwauhamata garana enai, na e durua! Momokani, ia na be moalemu badina e nari dainai, unu hahenamo e davari.

12, 13. Dahaka dainai Iosef baine haheauka na namo, bona ena kara namona be dahaka?

12 Abraham tubuna Iosef danu mai ena ura ida e haheauka. Ia na haida ese e hahemaoro henia kerere. Matamanai, ia laḡanina e 17 neganai, tadikakana ese hesiai tauna ta heḡereḡerena e hoihoilaia. Gabeai, haida ese e hahebadelaia koikoi, e gwa ia na biaguna adavana e ura baine reipia, una dainai dibura ruma ai e atoa. (Gen. 39:11-20; Sal. 105:17, 18) Iena kara maoromaoro dainai, haida ese e hahisia to asie hanamoa. To laḡani 13 muridiai, ḡau momo na e idau. Ia na dibura ruma amo e ruhaia bona Aigupto ai lohia tauna iharuana ai ela.​—Gen. 41:14, 37-43; Kara 7:9, 10.

13 Una hahemaoro kererena dainai Iosef be e badu, a? Eiava iena Dirava, Iehova, be se abidadama henia, a? Lasi. Dahaka ese Iosef e durua dainai e nari mai haheaukana ida? Iehova iabidadama henina karana ese e durua. Iehova ese e durua dalana na e itaia. Tadikakana e hamaorodia herevana amo una e hahedinaraia, eto: “Basio gari; lau be Dirava ibolona a? Umui emui lalo-hadai be ba hadikagu o tomava, to Dirava ese anina namona e havaraia; anina na hari dina ai o itaiamu taunimanima hutuma vada na hamauridiamu.” (Gen. 50:19, 20) Gabeai, Iosef na e diba e nari dainai hahenamo e davari.

14, 15. (a) Dahaka dainai David ena haheauka karana na haheitalai namona? (b) Dahaka ese David e durua e haheauka?

14 King David danu haida ese e daḡedaḡe heniava. Ena be merona ai Iehova ese e horoa Israel edia king ai bainela totona, to ia na laḡani 15 heḡereḡerena e nari murinai, iena iduhu e lohiaia. (2 Sam. 2:3, 4) Una nega lalonai, King Saulo na David ihamasena daladia e tahuva. * Una dainai, David na gabu idauidau ai e nohova, nega haida idau tano ai bona ma nega haida tano ḡaḡaena ena kohua lalodiai e nohova. Gabeai, Saulo na tuari lalonai e mase neganai, David na  ma laḡani 7 e nari, bena Israel besena e lohiaia.​—2 Sam. 5:4, 5.

15 Dahaka dainai David na e nari mai haheaukana ida? Haerena na Salamo bukana ai baita davariamu, una buka ai ia na nega hani e henanadai: “Edena nega ai?” Ia na eto: “A lau na emu hebogahisi vada na abidadama henia; lau lalogu ese emu hahemauri baine moalelaia. Ane baina abia, Iehova ena; badina be ia ese ena harihari-bada ai vada e hanamogu.” (Sal. 13:5, 6) David ese Iehova ena hebogahisi karana na e abidadama henia. Ia na mai moalena ida hahemauri negana e nariava, bona Iehova ese e durua daladia e lalo. Oibe, David na e diba ia na e nari dainai hahenamo baine abi.

Iehova ese ita na se noidamu ia se uramu baine karaia ḡauna ta baita karaia

16, 17. Edena dala ai Iehova Dirava bona Iesu Keriso e nari karana na haheitalai namona?

16 Iehova ese ita na se noidamu ia se uramu baine karaia ḡauna ta baita karaia. Haheauka karana ai Ia na haheitalai hereadaena. (2 Petro 3:9 ba duahia.) Iehova na laḡani momo lalodiai e nari mai haheaukana ida, unu amo Eden imeana ai e vara hepapahuahuna baine hamaoromaoroa. Danu, Ia na ladana baine hahelaḡaia negana ‘e nariamu’ mai haheaukana ida. Una nega ai, mai edia ura ida “ia e nariamu taudia iboudiai” na hahenamo bae abi.​—Isa. 30:18.

17 Iesu danu mai ena ura ida e narimu. Ena be tanobada ai ena abidadama itohona ḡaudia e hahanaidia bona laḡani 33 C.E. ai, ena mauri idavalaina boubouna e heni, to ia na e nari ela bona laḡani 1914 ai e lohia matama. (Kara 2:33-35; Heb. 10:12, 13) To ia na dounu baine nari ela bona ena Laḡani Daha ta Lohia Negana baine ore murinai, inaina iboudiai na bae ore vaitani. (1 Kor. 15:25) Momokani, Iesu na nega daudau lalonai be narimu, to una ese ḡau namodia momo be havaramu.

DAHAKA ESE BAINE DURUDA?

18, 19. Dahaka ese baine duruda mai eda haheauka ida baita nari totona?

18 Namona na ita ta ta na mai eda haheauka ida baita nari. To dahaka ese baine duruda unu baita kara toma? Dirava ena lauma helaḡa baita noia. Ba helalotao, haheauka na lauma huahuana ta. (Efe. 3:16; 6:18; 1 Tes. 5:17-19) Una dainai Iehova ba noia baine durumu ba haheauka totona.

19 Danu ba helalotao, Abraham, Iosef, bona David na Iehova e abidadama henia bona e abia dae Ia ese baine durudia dainai, mai haheaukadia ida Iehova ena gwauhamata bae ḡuḡuru negana e naria. Idia na dia sibodia edia namo eiava edia ura ḡaudia mo e lalo badava. Ediai e vara ḡau namodia baita lalomu neganai, be hagoadadamu mai eda haheauka ida baita nari totona.

20. Namona na laloda baita hadai dahaka baita kara?

20 Ena be hahetoho idauidau ta davarimu, to laloda baita hadai mai haheauka ida baita nari totona. Oibe, nega haida na reana baita gwaumu: “[Iehova] e, ela bona edena nega ai?” (Isa. 6:11) To Dirava ena lauma helaḡa ese baine hagoadada, bena Ieremia heḡereḡerena baita gwa diba: “Iehova na lau ahugu; una dainai ia baina laroa.”​—Rohe. 3:21, 24.

^ par. 11 Genese bukana ena karoa iboudiai 15 heḡereḡeredia ese Abraham ena sivarai e herevalaia. Danu, Kristen Grik Revarevadia e tore taudia ese Abraham na nega 70 mai kahana e herevalaia.

^ par. 14 Ena be Saulo na laḡani rua e lohia murinai Iehova ese e dadaraia, to laḡani 38 ma e lohia ela bona e mase.​—1 Sam. 13:1; Kara 13:21.