“Baita helalolai heheni . . . , baita hahealo heheni; oibe, ina kara baita habadaia, badina be, o itaiamu, dina badana eme kahikahi.” ​—HEB. 10:24, 25.

ANE: 5320

1. Dahaka dainai aposetolo Paulo ese Heberu Kristen taudia e haḡanidia hahealo heheni karana ‘bae habadaia’?

DAHAKA DAINAI iseda hahealo o tauhalo karadia baita habada? Aposetolo Paulo ese Heberu Kristen taudia e tore henidia revarevana lalonai badina e gwauraia. Eto: “Baita helalolai heheni, bena baita hahealo heheni. Lalokau bona kara namodia baita havara. Eda hegogo karadia danu basita nege, haida ese e nege heḡereḡerena, a baita hahealo heheni; oibe, ina kara baita habadaia, badina be, o itaiamu, dina badana eme kahikahi.” (Heb. 10:24, 25) Laḡani 5 do se ore neganai, Ierusalem ai e nohova Iuda Kristen taudia ese “Iehova ena dina” ena mai na e itaia bona Iesu ese e gwauraia toa e lalopararalaia bena una hanua amo e heau. (Kara 2:19, 20; Luka 21:20-22) Iehova ena dina na laḡani 70 C.E. ai e kau, una negai Iehova ena hahemaoro herevana heḡereḡerena Roma taudia ese Ierusalem e hadikaia.

2. Dahaka dainai hari ina negai hahealo heheni karana baita habadaia na namo?

2 Hari ina negai, mai dibada Iehova ena “dina badana mai garina”  na vada e kahikahimu. (Ioel 2:11) Peroveta tauna Sefania na eto: “Iehova ena dina badana vada eme kahikahi, e kahira-kahiramu, e mai haraḡamu!” (Sef. 1:14) Hari ina negai danu una peroveta herevana na mai anina bada. Iehova ena dina e mai haraḡamu dainai, Paulo ese e haḡanidamu, “baita helalolai heheni, bena baita hahealo heheni, lalokau bona kara namodia baita havara.” (Heb. 10:24) Una dainai, tadikakada baita lalodia bada, unu amo bae dara doko negadiai baita hagoadadia diba.

DAIDIA ESE TAUHALO BAE ABI NA NAMO?

3. Paulo ese haida ihagoadadia karana be ede e herevalaia toma? (Rau 20 ai laulau ba itaia.)

3 “Lalo-hekwarahi ese tau ta e hametauamu, a hereva namona ese e hamoaleamu.” (Her. 12:25) Una na momokani. Nega haida ma haida ese tauda bae halodia na namo. Paulo ese e hahedinaraia ma haida e hagoadadiamu tauna na nega haida tauhalo baine abi na namo. Paulo ese Roma Kristen taudia e tore henidia, eto: “Na ura lalo-dikamu baina itamui, bona Lauma ena harihari ḡauna baina henimui, bena ba gini tutuka-tutuka. Bona na tomamu umui bona lau eda heabidadama dainai baita hahealo heheni.” (Roma 1:11, 12) Oibe, ena be Paulo ese haida e hagoadadiava, to nega haida e urava ma haida ese ia tauna bae haloa.​—Roma 15:30-32 ba duahi.

4, 5. Hari ina negai daidia taudia baita halodia na namo, bona dahaka dainai?

4 Edia mauri ai ḡau haida e dadaraia taudia na baita hanamodia. Idia haida na painia taudia. Idia momo na edia ura ḡaudia haida e dadarai painia ḡaukarana bae karaia totona. Misinari taudia, Betele taudia, seket taudia mai adavadia ida, bona remote transleisen ofesi (RTO) ai e ḡaukaramu taudia danu unu e kara tomamu. Ḡaukara helaḡana ikarana totona sibodia edia ura ḡaudia haida e dadarai. Una dainai, baita hagoadadia na namo. Bona guna ful-taim hesiai ḡaukaradia e karava taudia danu baita hagoadadia, badina ena be edia mauri e idau dainai ful-taim hesiai ḡaukara na do e hadokoa to kudoudia ai una ḡaukara urana na doini mia.

5 Tadikaka bona taihu haida na do asie headava badina Baibul ena sisiba, “Lohiabada lalonai mo ba headava,” na e badinaiamu; idia danu baita hagoadadia na namo. (1 Kor. 7:39) Tatau ese adavadia bae hanamodia danu edia ḡaukara namodia daidiai. (Her. 31:28, 31) Danu, daḡedaḡe eiava gorere e haheaukalaimu Kristen taudia baita hagoadadia na namo. (2 Tes. 1:3-5) Iehova bona Keriso ese unu abidadama hesiai taudia na taudia e halodiamu.​—2 Tesalonika 2:16, 17 ba duahi.

ELDA ESE MA HAIDA BAE HAGOADADIA

6. Isaia 32:1, 2 ese e gwauraidia elda taudia edia ḡaukara be dahaka?

6 Isaia 32:1, 2 ba duahi. Iesu Keriso ese “lohia” eiava elda taudia​—e horodia tadikakadia bona mamoe idaudia​—amo lalometau bona lalomanoka taudia e hagoadadiamu bona e hakaudiamu. Unu elda taudia ese eda abidadama na asie “biaguamu” to idia na eda “moale ikahana” taudia.​—2 Kor. 1:24.

7, 8. Edena dala ai elda taudia ese edia hereva bona kara amo ma haida bae hagoadadia?

7 Ita ese aposetolo Paulo ena haheitalai baita haḡoia na namo. Ia ese Tesalonika ai daḡedaḡe e davariva Kristen taudia e hamaorodia: “Unu a ura henimui tomava dainai, lalomai e urava dia Dirava ena sivarai namo mo baiama henimui, a laumamai danu; badina be a lalokau henimuiva.”​—1 Tes. 2:8.

8 Nega haida tauhalo herevadia baita gwaurai mo na dia heḡereḡere, Paulo ese  Efeso elda taudia e haḡanidia: “Manoka-manoka taudia ba kahadia; bona Lohiabada Iesu ena hereva ba laloa tao, eto ‘Ḡau ihenina be namo bada, ḡau iabina be namo maraḡi.’” (Kara 20:35) Paulo na mai ena ura ida tadikakana mo se hagoadadia, to idia daidiai ‘ena kohu baine ha-ore bona tau-anina danu baine ha-orea.’ (2 Kor. 12:15) Una heḡereḡerena, elda taudia ese tadikaka na dia hereva ai mo bae hagoadadia, to edia kara amo danu bae hahedinaraia edia namo na e lalo badamu.​—1 Kor. 14:3.

9. Edena dala ai elda taudia na hahegoada dalana ai sisiba bae heni diba?

9 Elda taudia ese ma haida ihagoadadia totona sisiba bae heni na namo, to namona na Baibul ai e gwaurai haheitalaidia amo sisiba ihenidia daladia bae badina. Iesu e mase bona e toreisi lou murinai, sisiba ihenina karana ai haheitalai hereadaena e hahedinaraia. Ia ese Asia Minor ai kongrigeisen haida na e sisiba auka henidia, to e sisiba henidia dalana mani a laloa. Do se sisiba henidia neganai, ia ese Efeso, Peregamo, bona Tuatira kongrigeisen na e hanamodia. (Apok. 2:1-5, 12, 13, 18, 19) Ia ese Laodikea kongrigeisen e hamaoroa: “Na ura henidiamu taudia na sisiba henidiamu bona na dadabadiamu; taunabunai, lalomu ba hasiahua, ba helalo kerehai.” (Apok. 3:19) Elda taudia ese ma haida bae sisiba henidia neganai, Keriso ena haheitalai bae tohotohoa na namo.

DIA ELDA TAUDIA MO EDIA ḠAUKARA

Tama sina e, natumui o hadibadiamu haida bae hagoadadia, a? (Paragraf 10 ba itaia)

10. Edena dala ai ita iboudai baita hahegoada heheni diba?

10 Ma haida ihagoadadia karana na dia elda taudia mo edia ḡaukara. Paulo ese Kristen taudia e hagoadadia: “Hereva namodia ba gwaurai, taunimanima lalodia ba hapararalai, bena bae kamonai taudia ese harihari-bada bae abia.” (Efe. 4:29) Ita ta ta ese ma haida idurudia daladia baita diba na namo. Paulo ese Heberu Kristen taudia e haḡanidia: “Imamui eme heveri ba toi roro, bona aemui eme pada ba hahedai.  Aemui edia dala maoromaorodia ba kara, bena ae-hedairike na basine heride, a baine namo.” (Heb. 12:12, 13) Ita iboudai, matamata taudia danu, baita hahegoada heheni diba.

11. Marthe e lalometauva negana ai heduru be ede e abia toma?

11 Marthe, * guna e lalometauva taihuna ta, na eto: “Dina ta tauhalo iabina totona na ḡuriḡuriva ai, taihu burukana ta ida a hedavari bona ia ese lalokau bona hebogahisi karana e hahedinarai henigu, una na heduru na urava baina abia negana korikorina. Danu, ia ese sibona enai e vara lalohisihisina na egu ai e gwauraia, unu amo na diba haida danu e lalometaumu, dia lau mo sibogu.” Reana taihu burukana na asi dibana iena tauhalo herevana ese Marthe na e hagoadaia.

12, 13. Ededia dala namodia ai Filipi 2:1-4 ena sisiba baita badinaia?

12 Paulo ese Filipi kongrigeisen na ini e sisiba henidia toma: “Taunabunai, Keriso ena lalo-hakeru bema mia, uraheni ena tauhalo bema mia, Lauma ena hetura-heheni bema mia, hebogahisi bona hekaha bema mia, umui ese egu moale boma haḡuḡurua, lalomui boma hatamona, emui ura heni boma hatamona, emui lalo-hadai boma hatamona. Ḡau ta basio karaia heiri-heiri dainai eiava hekokoruku dainai; a ta ta sibomui ba hahemanau, bamomui ba imodaidia. Bona ta ta ena namo ena namo basio tahu, a bamomui edia namo ba tahu.”​—Fili. 2:1-4.

13 Oibe, ita iboudai ese ma haida edia namo baita tahu na namo, ita ese “ura heni ena tauhalo,” “Lauma ena hetura-heheni,” bona “hebogahisi bona hekaha” karadia na tadikakada ediai baita hahedinaraidia na namo.

HAIDA BAITA HAGOADADIA

14. Dahaka sivaraidia ese tadikaka eiava taihu ta baine hagoadaia diba?

14 Guna ta durudia taudia edia abidadama sivaraidia ese ita baine hagoadada, aposetolo Ioane enai e vara heḡereḡerena, eto: “Moale bada-herea egu ai badina binai: natugu haridia na kamonaimu, idia be hereva momokani dalanai e rakamu.” (3 Ioa. 4) Painia taudia momo na e gwaumu, laḡani momo gunadia ai idia ese e durudia taudia edia abidadama na doini e hahedinaraimu bona idia haida na painia taudia ai ela sivaraidia ese e hagoadadiamu. Bema e lalomanoka painia tauna ta enai guna ta moalelaiava sivaraidia baita herevalaimu neganai, una ese tauna baine haloa diba.

15. Edena dala ma ta ai hesiai ḡaukara namodia e karamu taudia baita hagoadadia?

15 Seket taudia momo na eto kongrigeisen ta ta e vadivadidiava muridiai, idia bona adavadia na haida ese e henidia tenkiu revarevana ese e hagoadadia. Ita ese elda taudia, misinari, painia, bona Betele taudia edia ḡaukara namona dainai eda tenkiu karana baita hahedinaraiamu neganai, una ese be hagoadadiamu.

BAITA HAHEALO HEHENI DALADIA

16. Edena dala ai ma haida taudia baita halodia?

16 Bema ita na hemarai tauda dainai baita laloamu basita hahealo heheni diba, una na lalohadai kererena. Taunimanima taudia ihalodia daladia na dia auka​—baita hedavari henidia negadiai baita kiri na namo. Bema idia na basie kiri, reana idia na mai edia hekwakwanai, bona edia hereva ikamonai henina karana ese taudia baine halodia.​—Iak. 1:19.

17. Tadikaka ta darana e doko neganai, heduru be ede e abi toma?

17 Henri, eregabe tadikakana ta, na varavarana haida, bona tamana, elda tauna  namona ta, ese hereva momokani e rakatania neganai, darana na e doko. Seket tauna ta ese tauna ihalona totona café rumana ta e laohaia kofi bae inu bona ena lalometau herevana baine kamonai totona. Edia herevahereva murinai, Henri na e laloparara ena abidadama ai baine gini tutuka-tutuka na namo, una ese ena ruma bese be durudiamu hereva momokani bae lou henia totona. Danu Salamo 46; Sefania 3:17; bona Mareko 10:29, 30 e duahi neganai una ese tauna e haloa.

Ma haida baita hagoadadia diba (Paragraf 18 ba itaia)

18. (a) King Solomon ena aonega herevana ta be dahaka? (b) Aposetolo Paulo ena heduru herevana be dahaka?

18 Marthe bona Henri edia sivarai ese e hahedinaraimu, tadikakada eiava taihuda ta darana e dokomu neganai tauna baita haloa diba. King Solomon na eto: “Nega korikorina ai e gwauraiamu herevana be daka namo! Mata diaridia ese tau lalona e hamoaleamu, bona hari namodia ese turia e ha-aukadiamu.” (Her. 15:23, 30) Danu e lalohisihisimu tauna na Gima Kohorona eiava eda websait ai e duahimu ḡaudia ese tauna bae haloa diba. Paulo ese hahedinaraia Basileia anedia iabidia karana ese laloda baine hagoadaia diba. Ia na eto: “Salamo ai, ane ai, lauma anedia ai, ba hahediba heheni bona ba hahealo heheni. Dirava ihanamolaina anedia bavabi mai lalomui ida.”​—Kol. 3:16; Kara 16:25.

19. Dahaka dainai hahealo heheni karana baita habadaia na ḡau badana, bona dahaka baita kara na namo?

19 Iehova ena dina “eme kahikahi” dainai, hahealo heheni karana baita habadaia na ḡau badana. (Heb. 10:25) Paulo ese ena negai Kristen taudia e haḡanidia heḡereḡerena, “ba hahealo heheni, ba hahegoada heheni, ina harihari o karamu heḡereḡerena.”​—1 Tes. 5:11.

^ par. 11 Lada haida na a haidau.