“Ia na Nadi-ginina; ena ḡaukara na ḡoeva-dae; ena dala iboudiai na hahemaoro daladia [“hahemaoro maoromaoro daladia,” NWT].”—DEU. 32:4.

ANE: 2, 11

1. Edena dalai Abraham na ena hereva amo e hahedinaraia Iehova ena hahemaoro karana na maoromaoro? (Rau 18 ai laulau ba itaia.)

“TANOBADA idoinai ihahemaoro-henina Diravana basine kara maoro-maoro a?” (Gen. 18:25) Una henanadai amo Abraham ese e hahedinaraia, ia na mai dibana Iehova ese Sodom bona Gomora na baine hahemaoro henidia maoromaoro. Ia na e abia dae momokani Iehova ese “kara maoromaoro taudia bona kara dika taudia” na basine hamasedia hebou. Abraham na nega hata se lalo Iehova na baine hahemaoro kerere. Laḡani 400 muridiai, Iehova ese Mose e hamaoroa Ia na ini baine herevalaia toma: “Ia na Nadi-ginina; ena ḡaukara na ḡoeva-dae; ena dala iboudiai na hahemaoro daladia. Ia na heabidadama Diravana, asi ena kara dika; ia na momokani bona maoromaoro.”—Deu. 31:19; 32:4.

2. Dahaka dainai Iehova na basine hahemaoro kerere diba?

2 Dahaka dainai Abraham na e abia dae momokani Iehova ena hahemaoro na nega iboudiai maoromaoro? Badina Iehova na  hahemaoro maoromaoro bona kara maoromaoro Diravana. To, Heberu herevadia e hahanai “hahemaoro maoromaoro” bona “kara maoromaoro” na nega momo Heberu Revarevadia ai e ḡaukaralaidia heboumu. Unu hereva rua anidia na heḡereḡere. Taravatu maoromaorodia na Iehova sibona ese e ato dainai, ia na hanaihanai ḡau iboudiai e haero namonamomu. Danu, iena Hereva ai e torea heḡereḡerena, “Ia ese kara maoromaoro bona hahemaoro e ura henidiamu.”—Sal. 33:5.

3. Hari ina tanobada ai e varamu hahemaoro kerere karana ta mani a herevalaia.

3 Kudou-maoro taudia na e dibamu Iehova na hanaihanai e hahemaoro maoromaoromu neganai e moalemu, badina tanobada ai hahemaoro kerere na bada herea. Una dainai, taunimanima haida na dia idia ese e karamu kereredia daidiai dika bada herea e davarimu. Heḡereḡere, haida na asi edia kerere to e hahemaoro henidiamu bona e hadiburadiamu. To, teknoloji ai dala matamatadia e davarimu dainai taunimanima unu bamodia na laḡani momo muridiai dibura ruma amo e ruhadiamu, badina unu dala matamatadia amo e davarimu idia na asi edia kerere. Ena be asi edia kerere taudia ihadiburadia karana na mai lalohisihisina bona mai baduna, to Kristen taudia ediai hahemaoro kerere karana ma ta na mia, bona una ihaheaukalaina na auka.

KONGRIGEISEN LALONAI

4. Dahaka ese Kristen tauna ena abidadama baine tohoa diba?

4 Kristen taudia na mai dibadia Kristen kongrigeisen murimurina ai hahemaoro kereredia na bae vara diba. To, eda abidadama na be tohoa dibamu bema kongrigeisen lalonai hahemaoro kereredia baita itamu eiava baita davarimu. Oi be ede bo kara tomamu bema kongrigeisen lalonai haida ese bae kara auka henimu eiava tadikaka ta o taihu ta ese baine kara auka henimu? Una kara ese be hahekwakwanaimumu, eiava?

5. Dahaka dainai Kristen tauna ta na basine hoa bema kongrigeisen lalonai hahemaoro kerere baine itaia o bema ia enai baine vara?

5 Ita na dia ḡoevadae tauda bona baita kara dika dibamu dainai, ta dibamu kongrigeisen lalonai haida ese be hahemaoro henida kereremu eiava ita ese ma haida baita hahemaoro henidia kereremu. (1 Ioa. 1:8) Ena be una na se vara momomu, to abidadama Kristen taudia na una kara dainai basie hoa eiava basie hekwakwanai. Iehova na Baibul ai heduru herevadia e atodia, unu ese bae duruda kara maoromaoro baita badinaia hanaihanai, ena be tadikakada ese bae kara auka henida.—Sal. 55:12-14.

6, 7. Tadikaka ta enai be dahaka e vara? Bona ededia kara ese e durua e vara ḡauna e haheaukalaia?

6 Mani Willi Diehl enai e vara ḡauna aita laloa. Laḡani 1931 matamana ai, Tadikaka Diehl na mai ena abidadama ida Bern Betelena ai ḡaukarava, Switzerland ai. Laḡani 1946 ai, ia na Gilead Sikuli ena klas namba 8 ai e vareai, una na New York, U.S.A. ai. E gradueit murinai, ia na ela Switzerland ai seket ḡaukara e kara. Tadikaka Diehl na ena mauri sivaraina lalonai, e gwa: “May 1949 ai, lau ese Bern ai hedkwota na hadibadia lau na ba headavamu.” Edia haere be dahaka? “Hahenamo haida na baia kokimu to ba regula painia mo.” Tadikaka Diehl na ma e gwa: “Lau na e kougu tok basina heni . . . Momo ese asie hedavari henimaiva, vaitani ai na murimuri ai e atomai.”

7 Tadikaka Diehl be dahaka e kara? Ia na e gwa: “To, mai dibamai Baibul ese headava na se taravatua, una dainai baia lalogoada totona a ḡuriḡuri bona Iehova a abidadama henia.” Gabeai, tadikaka edia lalohadai kerere headava ai na e hamaoromaoro, bona Tadikaka Diehl ena hahenamo na ma  e henia lou. Iehova e badinaia dainai ahuna namona e abia. * Namona na siboda baita henanadai: ‘Ma haida ese bae hahemaoro henigu kerere neganai, lau danu unu ba kara tomamu, a? Lau be mai haheaukagu ida Iehova ena heduru baina naria, eiava sibogu egu diba ai e vara ḡauna baina hamaoromaoroa?’—Her. 11:2; Mika 7:7 ba duahia.

8. Dahaka dainai reana bo laloamu haida ese oi na e hahemaoro henimu kerere eiava kongrigeisen ai ta na e hahemaoro henia kerere?

8 Reana bo laloamu haida ese oi na e hahemaoro henimu kerere eiava kongrigeisen ai ta na e hahemaoro henia kerere. Una na baine vara diba badina ita na dia ḡoevadae bona ḡau haida na baita lalodia kerere dibamu, eiava e vara ḡaudia iboudiai na asi dibada. Herevana eda laloparara na maoro eiava kerere, to ḡuriḡuri karana amo Iehova enai baita tabekau, bona baita badinaia karana ese baine duruda Ia basita “lalo dika” henia totona.—Hereva Lada-isidia 19:3 ba duahia.

9. Ina stadi bona stadi gabena ai ededia sivarai baita herevalaimu?

9 Mani Baibul negadia ai Iehova ena taunimanima bogaraḡidia ai e vara hahemaoro kerere sivaraidia toi aita herevalai. Ina stadi ai, ita ese Abraham tubuna Iosef bona kakana veridia ese e hahisia sivaraina baita herevalaiamu. Stadi gabena ai, Iehova ese Israel Pavapavana Ahaba e kara henia sivaraina bona Suria Antioka ai aposetolo Petro enai e vara ḡauna baita herevalaimu. Unu sivarai baita herevalaimu neganai, namona na emu lauma dalana bona emu hetura karana Iehova ida baine hagoadaia daladia ba lalo. Una na mai anina bada bema o laloamu oi na haida ese e hahemaoro henimu kerere.

IOSEF NA E HAHEMAORO HENIA KERERE

10, 11. (a) Iosef enai be dahaka e vara? (b) Iosef na dibura ai e nohova neganai ienai be dahaka dala namona ta e hekeho?

10 Iosef, Iehova e abidadama heniava tauna, na dia idau taudia ese mo e hahemaoro henia kerere, to ia kakana korikoridia ese danu unu e kara henia toma. Iosef laḡanina kahirakahira 20 e abia neganai, ia kakana verina ese e abia bena hesiai tauna ta heḡereḡerena e hoihoilaia. Ena be ia na se urava, to Aigupto e laohaia. (Gen. 37:23-28; 42:21) Unuseniai laḡani haida e noho murinai, ia na e habadelaia koikoi bona asie kota henia bena dibura ruma ai e atoa. (Gen. 39:17-20) Ia na laḡani 13 lalodiai hesiai tauna ai ela bona dibura ruma ai e noho. Bema tadikakada ese bae hahemaoro henida kerere, edena dalai Iosef enai e vara ḡauna ese ita baine duruda diba?

11 Iosef na mai ena dala enai e vara ḡauna na ia ida e dibura hebou tauna ta enai baine gwauraia diba. Una dibura tauna na pavapava ena vine ranuna iseina memerodia e reḡudiava tauna. Una tau na Iosef ida dibura ruma ai e nohova negana ai, e nihi, bena Iosef ese una nihi anina na e gwauraia hedinarai. Iosef ese e hamaoroa ia na Farao ena ruma ai ena ḡaukara gunana ma baine karaia. Iosef na Dirava ena heduru amo una nihi anina e herevalaia neganai, ia ese enai e vara ḡauna danu e gwauraia hedinarai. Ita ese Iosef e gwaurai ḡaudia amo ḡau haida baita dibamu, bona ia ese se gwaurai ḡaudia amo danu.—Gen. 40:5-13.

12, 13. (a) Edena dalai Iosef ese vine ranuna iseina tauna enai e gwaurai herevadia ese e hahedinaraia ia na enai e vara ḡaudia na se moalelai? (b) Iosef ese vine ranuna iseina tauna enai be dahaka se herevalaia?

12 Genese 40:14, 15 ba duahi. Iosef na e gwa ia na ‘e abia mauri.’ Heberu gado ai una hereva anina na “e henaoa.” Una ese e hahedinaraiamu,  ia na e hahemaoro henia kerere. Danu Iosef ese e hahedinaraia ia na asi anina ai dibura ai e atoa badina ia na asi ena kerere. Una dainai, vine ranuna iseina tauna e noia Farao vairanai ia baine herevalaia. Dahaka dainai? Badina ia na e ura ‘dibura rumana amo bae hakaua lasi.’

13 Iosef ena hereva amo e hahedinaraia enai e vara ḡauna be e abia dae mo bona ḡau ta se karaia, a? Lasi. Iosef na mai dibana ia na e kara auka henia. Ia ese vine ranuna iseina tauna vairanai e vara ḡaudia iboudiai na e herevalai hedinarai, badina mai dibana una tau ese baine durua diba. To, Baibul ai na se hahedinaraia Iosef ese taunimanima ta—Farao danu—e hadibaia ia na kakana ese e abia mauri. Ia kakana na Aigupto ela bona Iosef ida e maino neganai, Farao ese e abidia dae bona e boiridia Aigupto ai bae noho bona “Aigupto tanona ena kohu namodia” bae moalelai.—Gen. 45:16-20.

Maumau karana ese hekwakwanai baine habadaia diba (Paragraf 14 ba itaia)

14. Dahaka ḡau ese baine gimada diba hereva kereredia basita gwaurai, ena be kongrigeisen ai haida ese bae hahemaoro henida kerere?

14 Bema Kristen tauna na e laloamu ia na e hahemaoro henia kerere, namona na baine henahua toho basine maumau. Momokani, dala maorona na elda taudia ediai heduru ba tahu bona ba hadibadia bema kongrigeisen tauna ta na kerere badana ta e karaia. (Lev. 5:1) To, bema kerere haida na dia kerere badadia, namona na sibomui ese ba hamaoromaoro bona taunimanima ta eiava elda taudia ediai basio herevalaia. (Mataio 5:23, 24; 18:15 ba duahi.) Namona na Baibul ena hahekau herevadia heḡereḡerena e varamu ḡaudia baita hamaoromaorodia. Nega haida, ita na baita lalopararamu ta ese na se hahemaoro henida kerere. Baita moalemu badina tadikakada na asita gwauraia dika unu amo hekwakwanai badana ta se vara. Ba helalotao, herevana ita na maoro eiava kerere, to hahehisi herevadia ese ḡau ta na basine hanamoa dibamu. Iehova bona tadikakada ibadinadia karana ese baine gimada kerere unu bamona ta basita karaia totona. Salamo itorena tauna ese “e raka ḡoevaḡoevamu” tauna na ini e herevalaia toma: “Ia malana amo  haida se hadikadiamu, turana ihadikana karana ta se karaiamu, bona dekena tauna ihadikana herevana ta se gwauraiamu.”—Sal. 15:2, 3; Iak. 3:5.

EMU HETURA KARANA NAMONA BA LALOATAO

15. Edena dala ai Iosef enai Iehova ihetura henina karana na hahenamo ta?

15 Mai anina bada ḡauna ta ta dibaiamu na, Iosef ena hetura karana Iehova ida. Iosef na laḡani 13 dibura ruma ai e nohova neganai, e hahedinaraia ḡau iboudiai lalodiai Iehova ena lalohadai e badinaia. (Gen. 45:5-8) Enai e vara ḡaudia daidiai gwau na Iehova se henia. Ena be e hahisia karadia na se lalodia boio, to unu na se badulai. Mai anina bada ḡauna na, haida edia lalohadai o kara kereredia ese ia na Iehova ena amo se hadaudaua. Iosef na Iehova e badinaia dainai, Iehova ese hahemaoro kereredia e hamaoromaorodia dalana e itaia, bona ia bona ena ruma bese na e hanamodia.

16. Bema kongrigeisen ai ta ese e hahemaoro henida kereremu, dahaka dainai Iehova baita raka henia kahi na namo?

16 Una heḡereḡerena, eda hetura karana Iehova ida baita laloa bada bona baita gimaia na namo. Namona na tadikakada edia kara kereredia ese ta lalokau heniamu bona ta tomadiho heniamu Diravana ena amo ita na basine bibida oho. (Roma 8:38, 39) To, bema tadikakada ta ese e hahemaoro henida kereremu, namona na Iosef baita tohotohoa bona Iehova baita raka henia kahi, baita hekwarahi Iena lalohadai heḡereḡerena ai ḡau baita kara. Bema edai e vara ḡaudia ihamaoromaorodia totona, Baibul ena hereva heḡereḡerena ḡau iboudiai ta kara, namona na Iehova imana ai baita rakatani, bona baita abia dae momokani ia ese ena nega bona dala heḡereḡerena ai baine hamaoromaorodia diba.

“TANOBADA IDOINAI IHAHEMAORO-HENINA DIRAVANA” BAITA ABIDADAMA HENIA

17. Edena dalai baita hahedinaraia ita ese “tanobada idoinai ihahemaoro-henina Diravana” na ta abidadama heniamu?

17 Ina nega oromana dikana ai ta nohomu dainai, edai hahemaoro kereredia na be vara dibamu. Nega haida, reana kongrigeisen lalonai hahemaoro kerere ta bo itaiamu o emu ai be varamu. Namona na una ese basine hahekwakwanaimu. (Sal. 119:165) To, mai edia abidadama ida Dirava e hesiai henia taudia heḡereḡeredia, Ia baita badinaia bona enai baita tabekau. Danu, namona na baita helalotao ita na e vara ḡaudia iboudiai asi dibada. Mai dibada ita na dia ḡoevadae dainai baita lalo kerere dibamu. Iosef sivaraina amo tame diba, asita uramu hereva kereredia baita gwaurai, badina mai dibada hereva unu bamodia ese hekwakwanai be habadamu. Dia namo edai e vara ḡauna na siboda ese baita hamaoromaoroa, to namona na Iehova baita badinaia bona mai haheaukada ida baita nari una baine hamaoromaoroa totona. Unu baita kara tomamu neganai Iehova ese be lalonamo henidamu bona be hanamodamu, Iosef enai e kara heḡereḡerena. Oibe, ta diba momokanimu Iehova, “tanobada idoinai ihahemaoro-henina Diravana,” na nega iboudiai e kara maoromaoromu, badina iena “dala iboudiai na hahemaoro maoromaoro daladia.”—Gen. 18:25; Deu. 32:4; NWT.

18. Stadi gabena ai dahaka baita herevalaimu?

18 Stadi gabena ai, ita ese Baibul negadia ai Iehova ena taunimanima ediai e vara hahemaoro kerere sivaraidia ma rua baita herevalaimu. Unu sivarai ese be hahedinaraimu edena dalai manau bona mai eda ura ida dika baita gwautao karana na Iehova ena hahemaoro maoromaoro ibadinana dalana.

^ par. 7 The Watchtower, November 1, 1991, rau 25-29 ai, Willi Diehl ena mauri sivaraina ba itaia.