1. Daika ese Baibel e havaraia?

Baibel ai e hetore sivarai namodia amo ta dibamu, taunimanima na tano bae noholaia hanaihanai. (Salamo 37:29) Buka maraḡidia 66 na Baibel lalonai baita davaridiamu. Dirava ese ia e abidadama heniava taudia 40 heḡereḡeredia e ḡaukaralaidia, Baibel bukadia e toredia. Mose ese Baibel ena buka ginigunadia faiv be laḡani 3,500 gunanai e toredia. A aposetolo Ioane ese Baibel ena buka ginigabena be laḡani 1,900 mai kahana gunanai e torea. Baibel e torea taudia be daika ena lalohadai e tore? Dirava na Baibel itorena taudia ida e herevaherevava. Ia ese ena lalohadai na idia lalodiai e atova. Ia ese aneru bona matahanai amo Baibel itorena taudia haida e hereva henidiava. (Apokalupo 1:1) Nega haida, Dirava ese Baibel itorena taudia e hamaorodiava dahaka bae tore. Una dainai, Baibel e havaraia Diravana na Iehova.​—Esodo 34:27; 2 Timoteo 3:16; 2 Petro 1:20, 21 duahidia.

2. Ede bamona baita diba Baibel ena hereva na mamaoro bona momokani?

Dibada, Baibel na Dirava ese e havaraia, badina nega vairai bae vara ḡaudia na e gwauraidia ḡoevaḡoeva. To, taunimanima ta ese nega vairai bae vara ḡaudia, na unu basie gwauraidia toma diba. (Iosua 23:14) Herea Mikamika Diravana sibona mo mai dibana, dahaka be taunimanima edia vaira negana ai bae vara.​—Isaia 42:9; 46:10 duahidia.

Momokani, Baibel na idau herea. Baibel bilioni momo na gado handred momo ai vada e hahanaidia bona e halasidia. Ena be ia na idaunega bukana ta, bona dia tanobada ena sikuli teks bukana ta, to Baibel ese Dirava e kara ḡaudia​—tanobada bona ma ḡau momo​—e herevalai daladia na  mamaoro. Danu, Baibel e torea taudia 40 amo, ta ese ma ta ena hereva na se hakoikoia. * Ma danu, Baibel ese lalokau e herevalaiamu dalana amo ta dibamu, ia na lalokau Diravana ese e havaraia bukana, bona doini mai siahuna taunimanima edia mauri baine haidaudia bona baine hanamodia. Unu iboudiai daidiai, taunimanima milioni momo ese e abia daemu, Baibel na Dirava ena Hereva.​—1 Tesalonika 2:13 duahia.

3. Baibel amo dahaka baita dibamu?

Baibel ena sivarai namodia amo ta dibamu, Dirava na e uramu taunimanima idurudia karana ta baine karaia. Matamana negana ai paradaiso tanobadana e boio dalana bona nega vairai paradaiso tanobadana ma baine vara lou dalana, na Baibel ese e herevalaia.​—Apokalupo 21:4, 5 duahidia.

Baibel ai danu Dirava ena taravatu, hahekau herevadia, bona sisiba baita davarimu. Ma danu, Dirava ese kara namo taudia bona kara dika taudia ede e kara henidia toma sivaraidia, na Baibel ai baita duahi diba​—unu sivarai amo Dirava ena kara baita dibadia. Momokani, Baibel ese oi baine durumu diba, Dirava ba diba totona. Dirava turana ai baola dalana na Baibel ese be hadibamumu danu.​—Salamo 19:7, 11; Iakobo 2:23; 4:8 duahidia.

4. Baibel be ede ba lalopararalaia toma?

Ina buklet na oi be durumumu, Dirava ena Hereva anidia bo lalopararalaidiamu. Ina buklet na Iesu ese taunimanima e hadibadiava dalana heḡereḡerena ai e torea. Heḡereḡere, Iesu na “Buka Helaḡa” e duahiava negadiai, “anina” danu e herevalai namonamova.​—Luka 24:27, 45 duahidia.

Dirava ena sivarai namodia ese ḡau ma haida e hereadia. Una dainai, ena be haida ese unu sivarai namodia basie abi dae, bona ma haida bae daḡedaḡe, to basio lalomanoka. Badina mauri hanaihanai iabina dalana binai: Oi ese Dirava ba dibaia.​—Ioane 17:3 duahia.

 

^ par. 3 Iehova ena Witnes taudia ese Hiri Motu gado ai e printaia bukana ladana, Baibel be Dahaka Ia Hadibaia? ena rau 20 ba itaia.