“Memero na Iehova ena herahia.”Salamo 127:3

Natu ta e varamu neganai, tamana bona sinana na e moalemu bona e lalohekwarahimu. Umui na tama sina matamatadia dainai, emui nega bona goada na natumui inarinai bo haoreamu. Basio laḡa-ani namonamomu bona emui hemami be idaumu dainai, emui headava lalonai metau be varamu. Emui mauri daladia ba haidaudia, unu amo natumui ba naria bona emui headava baine namo. Edena dalai Baibul ena sisiba ese baine durumui ini lalohekwarahi ba hanamodia?

 1 NATU ESE MAURI E HAIDAUAMU BA LALOPARARALAIA

BAIBUL NA E GWAUMU: “Lalokau na e haheauka taritarimu; lalokau na mai ena heabi-dae.” Bona “sibona ena ḡau se tahumu; se badu haraḡamu.” (1 Korinto 13:4, 5) Oi na sina matamatana dainai vaia emu nega bada na natumu enai bo haoreamu. To, reana adavamu na be mamiamu ia na so laloamu, una dainai namona na basio helaloboio ia danu ba durua. Mai haheaukamu bona manaumu ida ba durua bena baine diba natumui inarinai ia danu mai ena kaha.

“Tatau e, . . . adavamui ida o noho heboumu dalana ba haeroa.” (1 Petro 3:7) Namona na ba laloparara adavamu ena nega bada na natumui enai be haoreamu. Ia na maduna matamatana be huaiamu dainai lalona na be hekwarahimu, be hesikumu eiava be metaumu. Nega haida be badu henimumu, to namona na basio badu, badina “badu ai e halahemu tauna ese goada tauna e hereaiamu.” (Hereva Lada-isidia 16:32) Ena kara na ba lalopararalaia bona ba durua.Hereva Lada-isidia 14:29.

BA KARA DIBA ḠAUDIA:

  • Tama e: Adavamu ba durua natumui ba naria, hanuaboi ai danu. Ḡau haida ikaradia negana ba hamaraḡia, unu amo nega bada adavamu bona natumu ediai ba haorea

  • Sina e: Bema adavamu na e uramu natumui baine naria, namona na ena heduru bavabia dae. Bema una ḡaukara na basine karaia namonamo, basio gwau henia, to mai manaumu ida ikarana dalana ba hadibaia

 2 HEADAVA BAINE GOADA

BAIBUL NA E GWAUMU: “Raruosi vada tamona na heto.” (Mataio 19:5) Ena be emui ruma bese lalonai natumui ta e vara, to ba helalotao oi bona adavamu na dounu “tamona na heto.” Namona na ba ḡaukara goada emui headava ba hagoadaia.

Hahine e, namona na adavamu ena heduru ba laloa bada. Emu tanikiu herevadia na “hahemauri” o heduru ḡauna. (Hereva Lada-isidia 12:18) Tau e, namona na adavamu ba hamaoroa o lalokau heniamu bona o laloa badamu. Ruma bese e nariamu dalana dainai ba hanamoa.Hereva Lada-isidia 31:10, 28.

“Ta sibona ena namo basine tahua, a dekena tauna ena namo danu baine tahua.” (1 Korinto 10:24) Hanaihanai adavamu ena namo ba tahua. Nega bavato raruosi ba herevahereva, hahenamo herevadia ba gwaurai, bona ba kamonai heheni. Mahuta hebou karanai sibomu emu namo basio tahua. Adavamu ena ura danu ba laloa. Baibul na e gwaumu: “Tau ese adavana ena headava karana baine henia; hahine danu adavana ena headava karana baine henia.” (1 Korinto 7:3-5) Una dainai raruosi ese mai momokanimui ida una kaha ba herevalaia. Emui haheauka bona laloparara karana ese emui headava baine hagoadaia.

BA KARA DIBA ḠAUDIA:

  • Basio helaloboio, nega bavato raruosi emui

  • Namona na ḡau maraḡidia haida ba kara, bena adavamu na baine mamia ia na o lalokau heniamu, heḡereḡere revareva kwadoḡina ta eiava harihari ḡauna maraḡina ta ba henia

 3 NATUMU BA HADIBAIA

BAIBUL NA E GWAUMU: “Maraḡimu negana ema, revareva helaḡadia vada o manadalai; idia ese bae ha-aonegamu ela bona hahemauri ba davaria.” (2 Timoteo 3:15) Natumu ihadibana daladia ba palanilai. Ena be ia na do se vara, to diba iabina karana ienai na mia. Bogai dounu noho lalonai, gadomui be dibadiamu bona emui hemami heḡereḡerenai be mareremu. Ia dounu karukarunai buka ba duahi henia. Ena be o duahiamu ḡauna na se lalopararalaiamu, to be badamu neganai, duahiduahi karana na be moalelaiamu.

Ena be natumu na maraḡi, to vairanai Dirava ba herevalaia. Namona na baine kamonai oi ese Iehova o ḡuriḡuri heniamu. (Deuteronomi 11:19) O gadara heboumu negadiai danu, Dirava ese e kara ḡaudia ba herevalai. (Salamo 78:3, 4) Natumu e bada e laomu lalonai, Iehova o lalokau heniamu karana be itaiamu bona ia ese danu Iehova be lalokau heniamu.

BA KARA DIBA ḠAUDIA:

  • Dirava ba ḡuriḡuri henia aonega baine henimu natumu ba hadibaia totona

  • Natumu enai hereva bona lalohadai badadia ba gwaurai loulou, unu amo maraḡinai diba baine abia