BAIBUL e torea gadodia ginigunadiai, Heberu gado herevana sheʼohlʹ bona Grik gado herevana haiʹdes na nega 70 mai kahana e torea. Unu hereva ruaosi na mase ida e herevalaidia hebou. Baibul haida ai be “gara,” “hel,” eiava “guri” e torea. To, gado momo ai ini Heberu bona Grik herevadia anidia korikori ihahedinaradia herevadia na lasi. Una dainai New World Translation ai ini hereva “Sheol” bona “Hades” na futnout ai e atodia. Ini hereva ruaosi anidia korikori be dahaka? Baibul siridia haida ese unu hereva e ḡaukaralaidia dalana mani aita itaia.

Kohelete 9:10 na e gwaumu: “O lao heniamu gabuna, mase taudia edia gabu, lalonai na asi ḡaukara ta, asi lalo-hadai ta, asi lalo-parara ta, bona asi aonega ta.” Una anina be Sheol be mase tauna igurina gabuna e herevalaiamu, a? Lasi. Baibul ese mase taudia e guridiamu gabuna korikorina eiava gara gabuna e herevalaia neganai, Heberu eiava Grik herevadia ma haida e ḡaukaralai, to dia sheʼohlʹ bona haiʹdes. (Genese 23:7-9; Mataio 28:1) Danu, Baibul ese gabu tamonai mase taudia haida e guridia gabuna, heḡereḡere bese ta ena gara gabuna e herevalaia neganai, “Sheol” na se ḡaukaralaia.​—Genese 49:30, 31.

“Sheol” be da dahaka? Dirava ena Hereva ese e hahedinaraiamu “Sheol,” eiava “Hades” na dia mase taudia e guridiamu gabuna mo e herevalaia. Heḡereḡere, Isaia 5:14 na ini e gwau tomamu Mase Gabuna, eiava Sheol na “e gadomu, bona uduna e haḡaia badabadamu.” Laulau dalanai, Sheol na taunimanima momo de hadonodia, to dounu e hitoloa. (Hereva Lada-isidia 30:15, 16) Gara gabuna korikorina ai na haida mo e guridiamu, to “Mase gabuna (eiava Sheol)” na se honumu. (Hereva Lada-isidia 27:20) Una anina na Sheol na asi hetoana. Una dainai “Sheol,” eiava “Hades,” na dia gabu korikorina ta e herevalaia. To, mase taudia iboudiai edia mahuta gabuna e laulaulaia.

Baibul ena hahediba herevana toreisi lou ai ese be durudamu “Sheol” bona “Hades” anidia baita lalopararalai  namonamomu. Dirava ena Hereva ese e hahedinaraiamu “Sheol” bona “Hades” ai nonoho mase taudia na bae toreisi lou. * (Iobu 14:13; Kara 2:31; Apokalupo 20:13) Danu, Dirava ena Hereva ese e hahedinaraia, “Sheol,” eiava “Hades” ai nonoho mase taudia na Iehova e hesiai henia taudia bona asie hesiai henia taudia. (Genese 37:35; Salamo 55:15) Una dainai, Baibul na e gwa: “Mase taudia do bae tore isi lou, kara maoromaoro taudia bona asi edia kara maoromaoro taudia.”​—Kara 24:15.

^ par. 1 Baibul ese e hahedinaraiamu, basie toreisi lou taudia na dia “Sheol,” eiava “Hades” ai, to “Gehena ai.” (Mataio 5:30; 10:28; 23:33) “Sheol” bona “Hades” heḡereḡeredia, Gehena danu dia gabu korikorina ta.