PEROVETA tauna Daniel na laḡani 500 mai kahana, Iesu do se vara neganai, e nohova. To, Iehova ese Daniel enai, Iesu baine horoa bena Mesia eiava Keriso ai bainela negana na e gwauraia hedinarai. Daniel na e hamaoroa: “Taunabunai ba diba, lalomu  danu baine parara, Ierusalem ihanamo-louna bona ihaginina herevana baine hedinarai negana ela bona lohia ta, e horoa tauna, bainema na pura hitu. Bena pura tauratoi-ahui rua lalodiai bae haginia lou.”Daniel 9:25.

Mesia ena mai negana baita lalopararalaia totona, ḡau ginigunana na, una nega e matama ela bona Mesia baine hedinarai negana baita dibaia. Peroveta herevana heḡereḡerena, una na “Ierusalem ihanamo-louna bona ihaginina herevana” bae gwauraia negana amo baine matama. Una hereva be edena negai e gwauraia? Baibul itorena tauna Nehemia ena hereva heḡereḡerena, Ierusalem maḡuna ihagini louna herevana na “king  Aratasasta ena lohia laḡanina iharuahuina ai” e gwauraia. (Nehemia 2:1, 5-8) Histori e tore taudia ese e hamomokania laḡani 474 B.C.E. na Aratasasta e lohia matama laḡanina. Una dainai, laḡani 455 B.C.E. na iena lohia laḡanina namba 20. Hari da tame diba Daniel ese Mesia baine hedinarai e perovetalaia herevana na laḡani 455 B.C.E. amo e hematama.

Daniel ese pura hida bae ore bena “e horoa tauna” bainema na e hahedinaraia. Peroveta herevana na e gwa “pura hitu. Bena pura tauratoi-ahui rua”—anina na pura iboudiai 69. Una nega ena lata be ede daudauna? Baibul haida ese e hahedinaraiamu, una na dia pura ta mai ena dina hitu, to laḡani puradia. Una anina na, pura ta ese laḡani hitu e laulaulaia. Idaunegai Iuda taudia na una laḡani puradia, eiava laḡani hitu iduahidia karana na mai dibadia. Heḡereḡere, idia na laḡani ihahituna ai Sabati e hahelaḡaiava. (Esodo 23:10, 11) Una dainai, e perovetalai puradia 69 na nega 7 amo baita duahiamu neganai, laḡani iboudiai na 483.

Mani laḡani aita duahidia. Bema laḡani 455 B.C.E. amo laḡani iboudiai 483 baita duahimu, laḡani 29 C.E. baita davariamu. Una na Iesu e bapatiso bena Mesia ai ela laḡanina! * (Luka 3:1, 2, 21, 22) Una peroveta herevana e ḡuḡuru daladia iboudiai ese eda abidadama na e hagoadaiamu, ani?

^ par. 2 Laḡani 455 B.C.E. amo ela laḡani 1 B.C.E. na laḡani iboudiai 454. Laḡani 1 B.C.E. amo ela laḡani 1 C.E. na laḡani tamona (zero na asie duahiava). Bona laḡani 1 C.E. amo ela laḡani 29 C.E. na laḡani iboudiai 28. Unu namba toiosi (454+1+28) baita hagaudiamu neganai laḡani iboudiai na 483. Iesu na laḡani haida muridiai, laḡani 33 C.E. ai, e hamasea. (Daniel 9:24, 26) Daniela Ena Peroveta Herevana Oi Laloa Namonamo! bukana karoa 11, bona Insight on the Scriptures, Volium 2, rau 899-901 ba itadia. Iehova ena Witnes taudia ese e karadia.