Nĩkĩ bũrĩ ũntũ bwa kwigithia bũbũũĩ

 Nguutũ imwe nĩ inthũũku mono—ngerekano, ta ũrongo bũrĩa bwaragua nĩkenda bũthũũkĩria muntũ riĩtwa. Ĩndĩ, kinya gũkethĩrwa nguutũ itĩthũũki mono, muntũ no aigue bũbũũĩ—monomono rĩrĩa ĩtambĩtue nĩ mũcoore wa akuĩ!—Zaburi 55:12-14.

 “Nĩndamenyere atĩ mũcoore waakwa naaragia mantũ jaakwa akiugaga atĩ, ntĩmakagĩra antũ bangĩ. Ũntũ bũu nĩbwambigithĩrie bũbũũĩ mono! Ntamenyaga nĩkĩ aaragia mantũ jamathũũku ũu jambegie.”—Ashley.

 Ũmma bwa mantũ: Kinya gũkethĩra muntũ ũrĩa agũkũguuta nĩ mũcoore waaku kana arĩ, nĩ ũntũ bwigithagia ũrũrũ mono kwigua antũ bakĩaria mantũ jamathũũku jakwegie.

 Tũtĩũmba kũrigĩĩria antũ batĩgatũguute

 Antũ bomba kwaria mantũ jakwegie tontũ bwa itũmi ta bibi:

 Nĩ wĩthĩre antũ kwenda kũmenya mantũ ja bangĩ. Antũ nĩbendete gũtuma ũcoore, kwou nĩkĩo baragia mantũ jegie antũ bangĩ. Kinya Bibiria nĩtwĩkagĩra inya tũmakĩre antũ bangĩ.—Afilipi 2:4.

 “Kwaria mantũ jegie antũ bangĩ nĩkũngwĩragia mono!”—Bianca.

 “Nĩ mma, nĩmpendete mono kũmenya mantũ ja antũ bangĩ na kwaria bũbegie. Ntijĩ nĩkĩ, ĩndĩ nĩngwĩragĩrua ũntũ bũu mono.”—Katie.

 Kwaga ũntũ bwa kũthithia. Ĩgiitene rĩa Bibiria, nĩkwarĩ na antũ “bataari na untu bungi buria baathithagia tiga gutinda baatindaga mithenya yonthe bakiejanaga mantu jameru, kana kwigua jakiejanwa.” (Mathithio 17:21) Kinya narua, nou gũkari!

 “Rĩrĩa gũtĩna ũntũ bwa kwarĩĩria, antũ nĩbatungaga mantũ jaao ja kwaria.”—Joanna.

 Gũciona ũtĩ wa gĩtumi. Bibiria nĩtũkaanagia tũtige kwing’uanithania na bangĩ. (Agalatia 6:4) Ĩndĩ, ũntũ bwa kũrigarania nĩ atĩ, antũ bamwe barũjaga na ũntũ bwa kwigua batĩ ba gĩtũmi na njĩra ya gũtambia nguutũ inthũũku ciegie antũ bangĩ.

 “Nguutũ inthũũku nĩcionanagia mantũ jamaingĩ jegie mũguutani. Kaingĩ nĩcionanagia atĩ, muntũ ũrĩa ũkũguutana nakwigĩĩrua muntũ ũu akũguuta rũritho. Batambagia nguutũ nĩkenda baigua bwega, na bairikithĩria atĩ barĩ ba gĩtũmi nkũrũki ya muntũ ũu bakũguuta.”—Phil.

 Ũmma bwa mantũ: Wende kana ũrege, antũ bakaria mantũ jegie antũ bangĩ na kinya jaaku.

 Ũntũ bwa kũgwĩria nĩ atĩ, to mwanka nguutũ ikuune nkoro

 Ũtĩũmba kũrigĩĩria antũ bakũguuta, ĩndĩ no ũthuure ũrĩa ũkathithia waigua nguutũ ĩkĩarua. Rĩrĩa waigua mantũ jakwegie jakĩarua, no ũjũkie matagaaria jaja jaĩrĩ.

 ĨTAGAARIA RĨA 1: Menya ũrekeeria nguutũ igũcumbũra. Njĩra ĩrĩa njega, menya ũrekeeria nguutũ igũcumbũra—monomono kethĩra tĩ cia gĩtũmi. Thingatĩĩra ũtaaro bũbũ bwa Bibiria: “Ugatanukanga kwimbatara nkorone ni muthuuro.”—Mutumiiria 7:9.

 “Nguutũ nĩciatambĩre atĩ ndĩna ũcoore na mũtaana ũmwe—muntũ kinya ntamwijĩ! Ndĩkwigua ũntũ bũu, neka ndathekere.”—Elise.

 “Kwĩthĩrwa na riĩtwa rĩrĩega nĩyo njĩra ĩnjega ya gũciinda nguutũ. Kinya rĩrĩa ũntũ bwaku bũthũũku bwarua na nwithithĩrĩtie riĩtwa rĩrĩega, nĩ antũ bakai mono bageetĩĩkia. Ũmma bũkwegie bũgaciinda nguutũ iu.”—Allison.

 Ũrĩa ũũmba kũthithia: Andĩka (1) nteto ciaku irĩa ciarĩtue na (2) ũrĩa ciatũmĩre wigua. Nyuma ya gũncũũkũna mantũ na ‘nkoro’ yaaku, bũkethĩrwa bũrĩ ũntũ bũbũũthũ kũjarekeeria.—Zaburi 4:4.

 ĨTAGAARIA RĨA 2: Ĩta warie na muntũ ũrĩa wambĩrĩrie nguutũ iu. Magiita jamwe, no kwĩthĩrwe nguutũ nĩ indito na nũkũbatara kwaria na muntũ ũrĩa waciambĩrĩrie.

 “Ũkeeja kwaria na muntũ ũrĩa wakũguutĩre, nyumene akairitana atĩ nguutũ iu nĩciagũkinyĩĩre. Kũthithia ũu, no gũtũme agatiga gũtambia nguutũ.”—Elise.

 Mbere ya gwĩta kwaranĩria na muntũ ũrĩa ũkũguutĩte, cũnkũũna moritani jaja ja Bibiria na ũciũrie biũria bibi.

•   “Ni waa na nthoni kiri muntu uria ucokagia kiuria atikiigitue.” (Njuno 18:13) ‘Rĩ, kamma nĩnkũmenya mantũ jonthe? Rĩ, no kũũmbĩke muntũ ũrĩa ũrambĩrĩrie nguutũ iu neka ataigĩtue mantũ bwega?’

•   ‘Gĩtaga mpwĩ cia kũthikĩĩra, ĩndĩ ũtige mpwĩ cia kwaria kana kũthũũranga ntũti.’ (Jakubu 1:19) ‘Rĩ, rĩrĩ nĩrĩo ĩgiita rĩrĩega rĩa gwĩta kwaria na mũguutani? Rĩ, ndĩna mma atĩ mworoto jwakwa nĩ jũmwega rĩrĩa nkwaria na muntũ ũjũ? Kana rĩ, nĩnkũbatara ĩgiita rĩkũrũka, nĩkenda mũthũũro jwakwa jwĩthĩrwa jũkũnyiia?’

•   “O uu mantu jonthe jaria bukwenda antu babuthithagiria bwi, kinya bo bathithagirieni jo.” (Mathayo 7:12) ‘Gũkeja kwĩthĩrwa nĩni mbarĩtie nguutũ iu, nĩatĩa mpeenda kũthithĩrua? Nĩ na njĩra ĩrĩku ndĩngĩenda twarĩa mantũ jau? Nĩ mathithio na biugo birĩkũ birĩngĩĩthĩrwa na maumĩĩra jameega?’

 Ũrĩa ũũmba kũthithia: Mbere ya gwĩta kwaria na mũguutani, andĩka mantũ jarĩa ũkũbanga kuuga. Nyumene, eteera kiuma kĩmwe kana biĩrĩ, rĩu ũthoome kaĩrĩ mantũ jarĩa waandĩkĩre na wone kethĩra nũkũbatara kũthithia ũgarũrũku. Kinya no warĩĩrie mantũ jau wandĩkĩte na mũcoore ũmũgimaru gĩkĩrundu, kana mũciari waaku na ũmũũrie ũtaaro.

 Ũmma bwa mantũ: O ta ũrĩa ũtĩũmba kũrigĩĩria mantũ jamaingĩ ũtũũrone, kinya nguutũ nĩ ũntũ ũtĩũmba kũrigĩĩria. Ĩndĩ tĩ kuuga nguutũ ĩgũtongeerie!