“Ũntũ bũrĩa bwarĩ bũbũũmũ kĩrĩ ni rĩrĩa ndetĩte na mbere gũkũra, nĩ gũkucĩĩrua nĩ antũ ba mũthemba jũmwe. Ndathũgaanagia ũntũ bũu bũgakũrũka, ĩndĩ kinya nandĩ ũntũ bũu nĩbũcumbũraga.”—David, 23.

 David nĩ Mũkristũ ũkwenda kũgwĩria Mũrungu. Rĩ, kwombĩka no agwĩrie Mũrungu, ĩndĩ na o ĩgiita rĩu agĩkucagĩĩrua nĩ antũ ba mũthemba jũmwe? Rĩ, nĩatĩa Mũrungu aigagua bwegie kũmenyana kĩmwĩrĩ kwa antũ ba mũthemba jũmwe?

•  Nĩatĩa Bibiria yugaga?

•  Rĩ, kũu nĩ kuuga atĩ . . . ?

•  Ĩndĩ a gũkeja kwĩthĩrwa . . . ?

 Nĩatĩa Bibiria yugaga?

 Mwonere jwa antũ jwegie antũ ba mũthemba jũmwe kũmenyana kĩmwĩrĩ, no jũgarũke nyuma ya ĩgiita kana kuuma gũntũ kũmwe na kũngĩ. Ĩndĩ Akristũ batĩtongagĩĩrua nĩ maoni ja antũ babaingĩ kana kinya “kugurukagua tukigerangagwa ni moritani kinya jariku.” (Aefeso 4:14) Mwanya nou, bwegie antũ ba mũthemba jũmwe kũmenyana kĩmwĩrĩ (kana kinya mwĩtĩre jũngĩ jũrĩa jũkũngʼuanana na mantũ ta jau) Akũũji ba Jehova batongagĩĩrua nĩ ithimi bia wagĩru birĩa birĩ Bibiriene.

 Ithimi birĩa bĩrĩ Bibiriene biegie antũ ba mũthemba jũmwe kũmenyana kĩmwĩrĩ, nĩbiijĩkene buru. Bibiria yugaga ũjũ:

•  “Ukamaama na muntu-murume ja uria aka bamaamagwa nabo.”—Mantu ja Alawi 18:22.

•  “Murungu arabanenkanira kiri mantu jaria mathuuku, batue kuthithagia mantu jaria nkoro ciao ciiriragiiria . . . arabanenkanira mantune ja kwiririiria kwa mantu jaria mathuuku jaria jari nthao; tontu aka bao ibaagarurire mukarie juria jwao jwa mbere, barajukuurania na mantu jangi jati ja mutugo.”—Aroma 1:24, 26.

•  “Imenyeereni butikeeje kwairua: amaramari kana baria barombaga ming’uanano, kana athungiiri ba arume kana ba aka, antu ba mithuuro, kana aamba, kana aiririiria, kana oogiti, kana arumani, kana atunyani, batigakuruka unenene bwa Murungu.”—1 Akorintho 6:9, 10.

 Kamma ithimi bia Jehova bia wagĩru, biegie antũ bonthe, kwĩthĩrwe nĩ barĩa bamenyanaga kĩmwĩrĩ na antũ ba mũthemba jwao kana barĩa bakucagĩĩrua kĩwendo nĩ antũ ba mũthemba jũngĩ. Ũmma bwa mantũ nĩ atĩ, twinthe nĩtũbuĩrite kwirigĩĩria bwegie mĩtugo ĩrĩa ĩtĩgwĩragia Mũrungu.—Akolosai 3:5.

 Rĩ, kũu nĩ kuuga atĩ . . . ?

 Rĩ, kũu nĩ kuuga atĩ Bibiria neka ĩmenagĩĩria antũ ba mũthemba jũmwe barĩa bamenyanaga kĩmwĩrĩ?

 Arĩ. Ũmma bwa mantũ nĩ atĩ, Bibiria ĩtĩmenagĩĩria muntũ kinya ũrĩkũ kinya antũ ba mũthemba jũmwe barĩa bamenyanaga kĩmwĩrĩ. Kinya Bibiria ĩtwĩraga ‘tũciũmagie gũkara na thĩĩrĩ na antũ bonthe’ ĩtĩkũmakania ũrĩa mũtũũrĩre jwao jũkari. (Ahibirania 12:14) Kwou, bwegie antũ ba mũthemba jũmwe barĩa bamenyagana kĩmwĩrĩ, tũtĩbuĩrite kũbathagĩkia, kũbameneria kana kinya kũbainyĩĩria.

 Rĩ, kũu nĩ kuuga atĩ Akristũ nĩbabuĩrĩte kũregana na mawaatho jarĩa jagwĩtĩkĩĩria ngũrano gatĩgatĩ ka antũ ba mũthemba jũmwe?

 Bibiria yonanagia ithimi bia Jehova biegie ngurano bibuĩrite kwĩthĩrwa birĩ gatĩgatĩ ka muntũ mũrume na muntũ mũka akĩ. (Mathayo 19:4-6) Amwe nou, ndwaria ciegie mawatho ja ngũrano gatĩgatĩ ka antũ ba mũthemba jũmwe, nĩ mantũ ja gĩsiasa, na tĩ ja gũteteera mĩtugo ĩmĩega. Bibiria ĩraaga Akristũ baciebanie na mantũ ja gĩsiasa. (Johana 18:36) Kwou, tũtĩbuĩrĩte gũteteera kana kinya kũregana na mawaatho ja thirikarĩ jegie ngũrano gatĩgatĩ ka antũ ja mũthemba jũmwe kana kinya mĩtĩĩre yaao ĩrĩa ĩtĩagĩrĩte.

 Ĩndĩ a gũkeja kwĩthĩrwa . . . ?

 Rĩ, a gũkeja kwĩthĩrwa muntũ ũũ naitonyithĩtie kĩrĩ mĩtugo ĩu ya waganu ya kũmenyana kĩmwĩrĩ gatĩgatĩ ka antũ ba mũthemba jũmwe? Rĩ, kwombĩka akagarũka?

 Ĩi. Bamwe nĩbaathithagia mĩtugo ĩu karine ya mbere! Nyuma ya kũgweta antũ ba mũthemba jũmwe kũmenyana kĩmwĩrĩ batĩona Ũnene bwa Mũrungu, Bibiria yugaga atĩ: “Bamwe benu niu bwakari.”—1 Akorintho 6:11.

 Rĩ, kũu nĩ kuuga atĩ antũ barĩa baatiganĩre na mĩtugo ya kũmenyana kĩmwĩrĩ gatĩgatĩ ja antũ ja mũthemba jũmwe batakucĩĩrua kaĩrĩ gũcookera mĩtugo ĩu? Arĩ. Bibiria yugaga ũjũ: ‘Bwĩkĩre mwĩrĩ jũngĩ jũmwerũ jũrĩa jwerũĩtue nĩ ũmenyo na jwaethua jũmwerũ.’ (Akolosai 3:10) Kũgarũka nĩ ũntũ bwa gwĩta na mbere.

 Rĩ, a gũkeja kwĩthĩrwa muntũ nakwenda kũthingata ithimi bia Mũrungu, na ĩgiita o rĩu arĩ na mairĩrĩria ja kwenda kũmenyana kĩmwĩri na antũ ba mũthemba jũmwe?

 O ta mairĩrĩria jangĩ jonthe, muntũ no athuure kũrega kũjakũria kana kinya kũrega kũjathithia. Nĩatĩa ũũmba kũthithia ũu? Bibiria yugaga ũjũ: “Itageni butongeeretue ni Kirundu, nirio butigita mantu jaria mwiri jwiriragiiria.”—Agalatia 5:16.

 Ona atĩ mũstaarĩ jũu jũtĩkuuga atĩ, muntũ atĩthĩrwa na mairĩrĩria ja mwĩrĩ. Ĩndĩ, muntũ akethĩrwa arĩna rũmenyerĩa rũrwega rwa gĩkĩrundu rwa kũthooma Bibiria na kũromba, akagĩa na inya ya kũrigĩĩria mairĩrĩria jau.

 O ta David ũrĩa ũgweterwe mwambĩrĩrione jwa kĩthoomo gĩkĩ, naaciũkĩrwe nĩ ũmma bwa ũntũ bũu, monomono rĩrĩa aarĩrie na aciari baawe Akristũ bwegie ũntũ bũu aakũrũkagĩĩra. Aaugĩre ũjũ: “Jwarĩ mũrigo jũmũrito jũrĩa jwebererue maturone jaakwa, na ndĩgĩgwĩrĩrua wĩthĩ bwakwa nkũruki kethĩra ndĩngĩkwaria na aciari baakwa kũrĩo.”

 Nĩtwĩthagĩrwa na kũgwĩrua mono rĩrĩa twathingata ithimi biu bia Jehova. Nĩtwĩthagĩrwa na mma atĩ, “moritani ja Mwathani ni jamaagiru, najo jakagwiragia nkoro,” na “kujamenyeera kuri itui riinene mono.”—Zaburi 19:8, 11.