•  Ũrĩa ũbuĩrĩte kũmenya

•  Ũrĩa ũũmba kũthithia

•  Ũrĩa antũ ba nthukĩ yaaku baugaga

 Ũrĩa ũbuĩrĩte kũmenya

•   Gũtĩ ũcoore bũtĩthagĩrwa na mathĩĩna. Tontũ tũtĩũjũri, kinya mũcoore ũrĩa wonaga arĩ wa akuĩ, no athithie kana akauga ũntũ bũũmba gũkũthũũria. Kinya, ũgwe ũtĩũjũri. Kwou rĩ, no ũriikane ĩgiita rĩrĩa wanathũũria muntũ ũngĩ?—Jakubu 3:2.

•   Mũtandao no jũtũme ũkathũũra na mpwĩ. Ngerekano, David ũrĩa ũrĩna mĩaka 15 ariuga ũjũ: “Rĩrĩa ũgũtumĩra mĩtandao na wona mbica cia mũcoore waaku arĩ kĩathone, no ũciũrie nĩkĩ ũtĩretĩrwe kĩathone kĩu. Rĩu ũkambĩria kwigua bũbũũĩ nkorone.”

•   No wiritane ũrĩa ũũmba kũthithia rĩrĩa ũntũ ta bũu bwaumĩra.

 Ũrĩa ũũmba kũthithia

 Icũnkũũne wengwa. Bibiria yugaga: “Ukathũũrangaga, nĩũntũ biaa nĩbio biĩkaga mũthũũro.”—Mutumiiria 7:9; Kimeru Bible, 2010.

 “Nyumene, magiita jamwe no wone ũntũ bũrĩa bũgũtũmĩte ũthũũra bũtĩgũkari bũbũnene mono.”—Alyssa.

 Ũntũ bwa kũthũgaanĩria: Rĩ, nũthũũrangaga na mpwĩ mono? Rĩ, no ũciũmie kũũmĩria gũtaũkĩrwa kwa bangĩ?—Mutumiiria 7:21, 22.

 Thũgaanĩria baita cia kũrekanĩra. Bibiria yugaga: “Kurekera mangaratania niku ukumio” bwa muntũ—Njuno 19:11.

 “Kinya kethĩra nĩ watĩritue, nĩ ũntũ bũbwega kũrekera kuuma nkorone, kũu nĩ kuuga menya ũkara ũkĩrikanagia mũntũ maatia jaawe, na gũtũma aromba ũrekeri o ĩgiita rĩonthe rĩrĩa warĩĩria ũntũ bũu. Rĩrĩa warekera, menya warĩĩria ũntũ bũu kaĩrĩ.”—Mallory.

 Ũntũ bwa kũthũgaanĩria: Rĩ, ũntũ bũu neka bũrĩ bũbũnene mono? Rĩ, no ũrekere nĩkenda bwĩthĩrwa na thĩĩrĩ?—Akolosai 3:13.

 Thũgaanĩria mũcoore waaku. Bibiria yugaga: “Gũkagĩta mũntũ ũcwaa kũgunĩka we wenka ĩndĩ nĩ acwaage ũrĩa kinya bangĩ bagunĩka.”—Afilipi 2:4; Kimeru Bible, 2010.

 “Rĩrĩa bũrĩ na wendo na gĩtĩĩo kĩrĩ ũcoore bwenu, nĩ buciũmagia kũthiria mathĩĩna na mpwĩ rĩrĩa jaumĩra. Tontũ nĩbũjũkĩtie kagiita gwaka ũcoore bwenu na bũtĩenda bũthira.”—Nicole.

 Ũntũ bwa kũthũgaanĩria: Rĩ, no ũciũmie kwona weega kĩrĩ ũntũ bũrĩa mũcoore waaku akwarĩĩria?—Afilipi 2:3.

 Ũntũ bwa gĩtũmi: Kũmenya ũrĩa ũbuĩrĩte kũthithia rĩrĩa wathũũrua, nĩ ũtea bũrĩa bũũmba gũgũtethia mono kinya rĩrĩa ũkaa muntũ ũmũnene. Rĩ, no wende kwiritana ũtea bũu nandĩ?