Nja inyiingĩ nĩciĩthagĩrwa na mawaatho. Ngerekano, nĩkwĩthagĩrwa na mawaatho jegie mathaa ja gũcookeera nja ũgoro, ũtumĩri bwa tekinolojĩ, mĩtugo ĩrĩa ĩbuĩrĩte kũthingatĩĩrwa na mantũ jangĩ jamaingĩ.

 Nĩatĩa ũũmba kũthithia rĩrĩa wauna waatho bwa mũciari? Ũtĩũmba kũgarũra mantũ jarĩa jakarĩkĩte, ĩndĩ no ũrigĩĩrie jatĩkathũũke nkũrũki. Kĩthoomo gĩkĩ gĩgagũtethia kwona ũrĩa ũũmba kũthithia.

•  Jarĩa ũtĩbuĩrĩte kũthithia

•  Njĩra ĩrĩa njega ya kwagĩrithia mantũ

•  Ũrĩa antũ ba nthukĩ yaaku baugaga

 Jarĩa ũtĩbuĩrĩte kũthithia

•   Kethĩra aciari baaku batĩkũmenya nuunĩte waatho bũnna, no wigue teka ũbuĩrĩte kwitha ĩatia rĩaku.

•   Kethĩra nĩbakũmenya nuunĩte waatho bũnna, no wigue teka ũbuĩrĩte kũbaa itũmi kana kinya kwaandĩĩra muntũ ũngĩ.

 Iu tĩ njĩra injega cia kũthiria thĩĩna ĩu. Nĩkĩ? Kũgeria kwitha ĩatia kana kũrita itũmi bia gwiteteera nĩ wanonyi. Nĩ ta kwĩra aciari baaku nũkũbatara gũkũra nkũrũki.

 “Kwaria ũrongo gũtĩtethagia. Tontũ nyuma ya ĩgiita ũmma bũkaumĩra, na ĩkanũkia no rĩthĩrwe rĩnenei nkũrũki ya ũrĩngĩbeera ũmma kuuma mwambĩrĩrione.”—Diana.

 Njĩra ĩrĩa njega ya kwagĩrithia mantũ

•   Ĩtĩkĩĩria ĩatia rĩaku. Bibiria yugaga ũjũ: “Uria withaga irema riawe atikatharimwa.” (Njuno 28:13) Aciari baaku nĩbaijĩ ũtĩũjũri. Ĩndĩ kĩũria nĩ rĩ, no wĩthĩrwe ũrĩ muntũ mwĩtĩkĩkua?

   “Aciari baaku no bakũrekere na kinya bagagwĩtĩkia nkũrũki, rĩrĩa wabeera ũmma.”—Olivia.

•   Romba ũrekeri. Bibiria yugaga ũjũ: “Karageni bwikundikite gintu kiria giitagwa kwinyiyia.” (1 Petero 5:5) Nkuma ya kwinyiia nĩyo ĩtũtethagia kũromba ũrekeri tũtĩgwiteteera.

   “Rĩrĩa antũ kaingĩ bakara bakĩritaga itũmi bia kũthithia wĩyia bũnna, nĩbaremagwa kwona ũrito bwa ũntũ bũrĩa bathithĩtie. Nyumene, batiigagua bagĩcuumbũka nkorone kinya rĩrĩa baatia.”—Heather.

•    Ĩtĩkĩĩria maumĩĩra. Bibiria yugaga ũjũ: “Uria witikagiiria ikaanukia akaa umuciuku mantune.” (Njuno 15:5) Menya ũthũũra, na ĩtĩkĩĩria mĩkaana yonthe ĩrĩa aciari baaku bagũkwa.

   “Weta na mbere kũnungʼuna tontũ bwa ĩkanukia rĩrĩa waewa, mantũ jageeta jakĩthũũkaga kinya nkũrũki. Ĩtĩkĩĩria mantũ jarĩa ũkanĩtue, na menya ũthũgaanĩrĩa mono mantũ jarĩa ũkwaaga.”—Jason.

•   Ciũmie kwĩthĩrwa ũrĩ mwĩtĩkua kĩrĩ aciari baaku nĩkenda bagwĩtĩkia kaĩrĩ. Bibiria yugaga ũjũ: “Ni kaba butige miitire iria yenu ya karaja, na bwebaebie mwiri jwenu jwa mberene.” (Aefeso 4:22) Ambia gũtua matua jameega nĩkenda aciari baaku bagwĩtĩkia kaĩrĩ.

   “Wethĩrwa na rũmenyeria rwa gũtua matua ja ũũme, na wonia aciari baaku atĩ ũtĩthithia ĩatia rĩu kaĩrĩ, mũthiene bagagwĩtĩkia.”—Karen.

 ŨNTŨ BWA KŨTHITHIA: Thithia mantũ kinya nkũrũki ya jarĩa bakwĩrĩte, nĩkenda ũrikithĩria aciari baaku atĩ ũrĩ mwĩtĩkua. Ngerekano, rĩrĩa ũkabanga gwĩta kũriũnga kaĩrĩ, ringĩra aciari baaku thimũ ũbamenyithie atĩ ũrĩ njĩrene ũcookete nja, kinya kethĩra nũkwona teka ũtĩcererwa. Kũthithia ũu, gũkaboonia atĩ nũkwenda bagwĩtĩkia kaĩrĩ.