MĨSTAARĨ YA BIBIRIA ĨTAARĨĨRĨTUE
Jeremia 29:11—“Nĩkwĩthĩrwa ni nĩ Mbijĩ Mĩbango Ĩrĩa Mbũbangĩrĩte”
“Untu ninkumenya mathuganio jaria mbuthuganagiria, niu Mwathani auga, ni mathuganio ja thiiri, ti mathuganio jamathuuku; nikenda mbwikira wirigiro matukune jenu ja muthia.”—Jeremia 29:11; The Bible in Kimeru.
“Nĩkwĩthĩrwa ni nĩ mbijĩ mĩbango ĩrĩa mbũbangĩrĩte. Mĩbango ya kũbũreetera wega na tĩ ũthũũku. Mĩbango ya kũbwaa ũtũũro bũbwega bwa nyumeene na wĩrĩgĩĩro nĩu ũũni MWATHANI nkuuga.”—Jeremia 29:11; Kimeru Bible, 2010.
Jeremiah 29:11 yonanagia atĩa?
Jehova Mũrungu neerĩre athathayia baawe atĩ nabathũganagĩĩria ĩgiita rĩĩjĩte rĩrĩ na thĩĩrĩ. Kinya kethĩra mũstaarĩ jũjũ jwandĩkĩrwe tontũ bwa Akristũ barĩa batũũraga karaaja, biugo biu kinya narua nĩbitũgunaga. Nĩwe “Mũrungu ũrĩa ũrĩ kaumo ka wĩrĩgĩĩro bunthe.” (Aroma 15:13; Kimeru Bible, 2010) Eekĩre mawĩrane jau Bibiriene nĩkenda “tukaraga na wirigiiro” bwa ĩgiita rĩĩjĩte.—Aroma 15:4.
Jarĩa Jathiũrũkĩrĩte Jeremia 29:11
Biugo bibi nĩ gĩcuncĩ kĩa barũga irĩa ciatũmĩĩrwe Aisiraeli barĩa barĩ narĩa Babiloni, barĩa baarĩ atae kuuma Jerusalemu. a (Jeremia 29:1) Mũrungu neerĩre barĩa baarĩ ũtaene atĩ barĩngĩkara nao ĩgiita rĩraaja, na atĩ babuĩrĩte gwaka nyomba cia gũkara, bakarĩma mĩzabibũ miundene yaao na kinya bakarerera aana baao nao. (Jeremia 29:4-9) Amwe nou, Mũrungu aaugĩre ũjũ nkũrũki: “Miaka mirongo mugwanja yathira buri Babiloni, nirio nkeeja kubutwikiria, mbukinyirie ruteto rwakwa ruria rwega, ntume bucoka guntu guku [Jerusalemu].” (Jeremia 29:10) Mũrungu naabarikithĩĩrie atĩngĩũrĩrũa nĩbo buru, na wĩrĩgĩĩro bwao bwa atĩ ntukũ ĩmwe bagacoka Jerusalemu bũrĩngĩũjũra.—Jeremia 31:16, 17.
Mũrungu noojũũrĩrie wĩrane bwawe kwerekera Aisiraeli. O ta ũrĩa kwaroretue Bibiriene, Babiloni nĩyaaciindĩrwe nĩ Kurusu Mũnene wa Ajemi. (Isaya 45:1, 2; Jeremia 51:30-32) Nyumene, Kurusu neetĩkĩrĩrie Ayahudi bacoke ntũũra yaao. Nyuma ya mĩaka mĩrongo mũgwaja ya ũtae, nĩbacokere Jerusalemu.—2 Mantu ja Karaja 36:20-23; Ezra 3:1
Kũũjũrua kwa ũroria bũrĩa bũrĩ kĩrĩ Jeremia 29:11, nĩbũrikithagĩria barĩa beerĩgagĩĩra mawĩrane ja Mũrungu betĩkie atĩ nĩ ja mma. Mawĩrane jau nĩ amwe na thĩĩrĩ nthĩgũrũne yonthe, gũkũrũkĩĩra Ũnene bwa Mũrungu rungu rwa wathani bwa Kristũ Jesũ.—Zaburi 37:10, 11, 29; Isaya 55:11; Mathayo 6:10.
Ũrongo bwegie Jeremia 29:11
Ũrongo: Mũrungu arĩ na “mũbango” jwa o muntũ o mũntũ.
Ũmma: Mũrungu arekagĩĩria antũ baciathũrĩra ũrĩa bagatumĩra ũtũũro bwao. Biugo bia Jeremia 29:11 biandĩkĩĩrwe Aisiraeli barĩa baarĩ Babiloni barĩ gĩkundi, na nabathũganagĩĩria ĩgiita rĩĩjĩte rĩrĩ na thĩĩrĩ. (Jeremia 29:4) Amwe nou, Mũrungu neetĩkĩrĩrie o muntũ aithurĩra kethĩra akagunĩka kuumania na mawĩrane jau jaawe kana arĩ. (Kuriikanithia Maathana 30:19, 20; Jeremia 29:32) Barĩa baathuurĩre gũcwaa Mũrungu baathithĩrie ũu na njĩra ya maromba, na barĩna thamiri injega.—Jeremia 29:12, 13.
Ũrongo: Mawega jarĩa Mũrungu akaa athathayia baawe nĩ ũtonga.
Ũmma: Kiugo “kũbũreetera wega” kĩrĩa kĩonekaga Bibiriene imwe kĩrĩ Jeremia 29:11, kiumanĩtie na kiugo kĩa Kĩhibirania kĩrĩa gĩtaũragwa “thĩĩrĩ na ũgima bwa mwĩrĩ.” Kũringana na jarĩa jathiũrũkĩrĩte ĩandĩko rĩu, Mũrungu naaere Aisiraeli barĩa barĩ ũtaene wĩrane atĩ akabaa thĩĩrĩ na ũgima bwa mwĩrĩ, ĩndĩ tĩ ũtonga. Mũgongo jũu jũrĩngĩĩta na mbere kwĩthĩrwa jũrĩ o, na ntukũ ĩmwe barĩngĩcoka Jerusalemu.—Jeremia 29:4-10.
Thooma Jeremia mũrango jwa 29 na kinya nteto irĩa itaarĩrĩĩtue au gaiti, tũcuncĩ tũrĩa tũgũtaarĩĩria mantũ nkũrũki, na kinya mbica.
a Bwegie Jeremia 29:11, The Expositor’s Bible Commentary yugaga ũjũ: “Nĩ ũntũ bũbũũmũ kwona wĩrane bũbwega ta bũbũ gũntũ kũngĩ Bibiriene, bũrĩa bwonanagia kĩao kĩa Yahweh [Jehova] kwerekera atae bau, na nyumene kũbaa itũmi bia kwĩthĩrwa na wĩrĩgĩĩro.”—Iuku rĩa 7, karataci ka 360.
You May Also Like
MORITANI JA BIBIRIA
Into bia Gũtũtethia Kwiritana Bibiria
Thuura into bia gũgũtethia kwiritana Bibiria birĩa bigatũma ũgwĩrĩrua na ũgunĩka kinya nkũrũki.
MORITANI JA BIBIRIA
Ambĩĩria Kwiritana Bibiria na Batwĩ
Ritanwa Bibiria ĩmwe kwa ĩmwe nĩ mwarimũ waku ũtĩkũrĩa.
