Wĩyia Nĩmbi?
Ĩcookio rĩa Bibiria
Wĩyia nĩ mathithio, kana mathũgaanio jarĩa jatĩgwĩtanĩria na ithimi bia Mũrungu. Wĩyia kinya nĩ kuuna mawaatho ja Mũrungu na njĩra ya kũthithia ũũĩ, kana kinya kũthithia mantũ ja waganu methone ja Mũrungu. (1 Johana 3:4; 5:17) Bibiria yũgaga, wĩyia nĩ kũrega kũthithia mantũ jameega na ũkĩmenyaga nũbuĩrĩte kũjathithia.—Jakubu 4:17.
Kĩrĩ mĩgambo ĩrĩa yaandĩkĩre Bibiria rĩa mbere, kiugo wĩyia kĩonanagia nĩ “gwatia,” ta rĩrĩa muntũ aratha na mĩgwĩ, na aremwa kũmunta arĩa akwendaga. Ngerekano, gĩkundi kĩa asikarĩ kĩa Isiraeli nĩbamenyeretie kũgera maiga na gĩkũtha batĩgwatia. Biugo biu rĩrĩa bitaũri ĩmwe kwa ĩmwe nĩ kuuga, “atiatie.” (Aathurani 20:16) Kwou, wĩyia nĩ gwatia gũkinyĩĩra ithimi bia Mũrungu bia wagĩru.
Arĩ Mũũmbi weetũ, Mũrungu nĩwe ũkwagĩra gũtwĩkĩĩra ithimi birĩa tũkathingatĩĩra. (Kugwurirwa 4:11) Agatũgambithia tontũ bwa mantũ jarĩa tũkũthithia.—Aroma 14:12.
Rĩ, no kũmbĩke muntũ akethĩrwa atĩkwĩyia buru?
Arĩ. Bibiria yugaga ũjũ “ni untu antu bonthe nibeitie na bararemwa ni gukinyira mwago jwa Murungu.” (Aroma 3:23; 1 Anene 8:46; Mutumiiria 7:20; 1 Johana 1:8) Nĩkĩ gũkari ũu?
Antũ barĩa boombĩrwe mbere bataarĩ na meeyia, tontũ boombi na mũngʼuanano jwa Mũrungu, kwou baarĩ baboojũru. (Kiambiriria 1:27) Amwe nou, nĩbaregere kwathĩkĩĩra Mũrungu na baratonya meeyiene. (Kiambiriria 3:5, 6, 17-19) Rĩrĩa baagĩre aana, nĩbabagwatithĩrie meeyia, ta mũrimo jwa ntiganĩro. (Aroma 5:12) O ta ũrĩa Mũnene Daudi aaugĩre, “Ni ndaciariirwe uthuukune.”—Zaburi 51:5.
Rĩ, meeyia jamwe nĩ jamathũũku nkũrũki ya jangĩ?
Ĩi. Ngerekano, Bibiria yugaga antũ arume ba Sodoma baarĩ “babai mono” na meeyia jaao jaarĩ “jamaingi mono.” (Kiambiriria 13:13; 18:20) Cũnkũũna mantũ jathatũ jarĩa jonanagia ũrito bwa wĩyia.
Ũrĩa bũngʼana. Bibiria nĩtwĩraga tũciebanie na meeyia ta, mĩtugo ya waganu ya kũmenyana kĩmwĩrĩ, kũthathayia mĩngʼuanano, wamba, kwogita, ũtunyani, kũũragana na kwaranĩria na irundu bithũũku. (1 Akorintho 6:9-11; Kugwurirwa 21:8) Bibiria nĩyonanagia meeyia jangĩ jatĩ ja ntabarako, ta biugo kana mathithio jarĩa jakũthũũria antũ bangĩ. (Njuno 12:18; Aefeso 4:31, 32) O na gũkari ũu, Bibiria nĩtwĩkagĩra inya tũciebanie na meeyia kinya jarĩkũ, tontũ no jatũtongeerie kĩrĩ meeyia jamanene ja kuuna mawaatho ja Mũrungu.— Mathayo 5:27, 28.
Gĩtũmi. Meeyia jamwe jathithagua tontũ bwa kũũthia mawaatho ja Mũrungu. (Mathithio 17:30; 1 Timotheo 1:13) Kinya kethĩra Bibiria teka yũthagia meeyia ta jau, nĩyonanagia jarĩ na mwanya na jarĩa ja kuuna mawaatho ja Mũrungu, muntũ akĩendaga. (Gutara 15:30, 31) Meeyia ja ntabarako jaumanagia na “nkoro iria nthuku.”—Jeremia 16:12.
Maita jangʼana. Bibiria kinya nĩyonanagia mwanya jwa kũthithia wĩyia rĩa mbere, na kũmenyeria kũthithia meeyia maita jamaingĩ. (1 Johana 3:4-8) Barĩa bathithagia meeyia ja “ntabarako,” kinya nyuma ya kwiritana mantũ jameega jarĩa babuĩrĩte kũthithia, bakagambithua nĩ Mũrungu.—Ahibirania 10:26, 27.
Barĩa bathithĩtie wĩyia bũũrito no baigue baremeri nĩ mũrigo jũu. Ngerekano, Mũnene Daudi aandĩkĩre ũjũ: “Nikwithirwa mathukia jakwa nijambititie mwanka mutwe jwakwa; jakundituira jakuruka murigo juria murito mono.” (Zaburi 38:4) Amwe nou, Bibiria nĩtwejaga wĩrĩgĩĩro bũbũ: “Muntu uria mui natigane na miitire yawe, na muntu uria utiagirite nate mathuganio jawe; nacoke kiri Mwathani, nawe akamwigiriua kiao, acoke kiri Murungu wetu, nawe akamurekera buru.”—Isaya 55:7.
