Ũrĩa Bibiria yugaga

 Tũbuĩrĩte kũromba Mũrungu gũkũrũkĩĩra riĩtwene rĩa Jesũ tontũ ĩũ nĩyo njĩra ĩrĩa yonka Mũrungu atweete ya kũmũkinyĩra. Jesũ aaugĩre: “Nini njira, na nini umma bungwa, nani ndi mwoyo; guti muntu wijikia kiri Baaba atiijiirite kirini.” (Johana 14:6) Jesũ kinya neerĩre aritwa baawe ũjũ: “Ni mma ni mma gankubwira atiri, Kethira bukaromba Baaba untu, akabunenkera riitwene riakwa.”—Johana 16:23.

Itũmi bingĩ bĩa kũromba gũkũrũkĩĩra riĩtwene rĩa Jesũ

•   Nĩ njĩra ĩmwe ya kwonania gĩtĩĩo kĩrĩ Ĩthe, Jehova Mũrungu na kinya Jesũ wengwa.—Afilipi 2:9-11.

•   Nĩtwonanagia nkaatho cietũ tontũ bwa gĩkuũ kĩa Jesũ kĩrĩa Mũrungu aathuranĩĩre nĩkenda twonokua.—Mathayo 20:28; Mathithio 4:12.

•   Nĩtwonanagia nĩtũkũmenya ngũgĩ ya Jesũ ĩrĩa nene ya kwigithania antũ na Mũrungu.—Ahibirania 7:25.

•   Nĩtwonanagia nĩtũgũtĩĩa ngũgĩ ya Jesũ arĩ Mũthĩnjĩri Ũrĩa Mũnene, ũrĩa ũtũtethagia kwĩthĩrwa na mũrũngamo jũmwega mbere ya Mũrungu.—Ahibirania 4:14-16.