Ũrĩa Bibiria yugaga

 Antũ bonthe nĩbethagĩrwa na mariĩtwa. Rĩ, kwombĩka Mũrungu arĩna riĩtwa? Nĩ ũntũ bwa gĩtumi kwĩthĩrwa na mariĩtwa na kũjatumĩra, rĩrĩa antũ barĩ na ũcoore. Rĩ, tou kũbuĩrĩte kwĩthĩrwa gũkari kĩrĩ ũcoore bwetũ amwe na Mũrungu?

 Mũrungu augĩte ũjũ Bibiriene: ‘Nĩni Jehova, riu nĩrĩo riĩtwa rĩakwa.’ (Isaya 42:8) Kĩnya kethĩrwa arĩna mariĩtwa jamaingĩ ja gĩtĩĩo ta, “Mũrungu mwene inya yonthe,” “Mwathani Mũrungu,” na “Mũũmbi,” naete athathayia baawe wendeeri bũũnene na njĩra ya gwĩtĩkĩĩria batumĩra riĩtwa rĩu rĩawe.—Kiambiriria 17:1; Mathithio 4:24; 1 Petero 4:19.

 Bibiria inyingĩ iria itaũri nĩ itumĩrĩte riĩtwa ria Mũrungu kĩrĩ Kuuma 6:3. Mũstarĩ jũjũ jugaga: “Ni Ni ndeejiriire Iburahimu, na Isaaka, na Jakubu; ndi Murungu Mwene inya yonthe; indi-ri, ntamenyerwe nibo riitwa ri riakwa Jehova.”

 Riĩtwa Jehova nĩrĩthĩrĩtwe rĩgĩtũmĩĩrua mĩaka ĩmingĩ kwonania riĩtwa rĩa Mũrungu. Amwe nou, athoomi babaingĩ nĩbarĩandĩkaga na ntemwa iji “Yahweh,” Jehova nĩrĩo riĩtwa rĩrĩa rijĩkene mono nthĩgũrũne yonthe. Gĩcuuncĩ kĩa mbere kĩa Bibiria kĩandĩkĩrwe na Kĩhibirania na tĩ gĩcũũnkũ, mũgambo jũrĩa jũthomagwa kuuma ũmotho gwĩta ũrio. Kĩrĩ mũgambo jũu, riĩtwa rĩu rĩtheru rĩrĩna ntemwa inya, יהוה. Ntemwa iu inya cia Kĩhibirania rĩrĩa ciataũrwa nĩ YHWH—na kinya ciĩtagwa Tetragramatoni.