Ũrĩa Bibiria yugaga

 Tĩ wĩyia kũnyua ncoobi ĩndĩ nũkũbatara kũmĩthimĩra. Bibiria yugaga ndibei nĩ kĩewa kuuma kĩrĩ Mũrungu, kĩrĩa gĩtũmaga muntũ agwĩrua. (Zaburi 104:14, 15; Mutumiiria 3:13; 9:7) Kinya Bibiria nĩyonanagia atĩ ndibei nĩtumagĩrwa ta ndawa.—1 Timotheo 5:23.

 Jesũ nanyuĩre ndibei rĩrĩa arĩ aja nthĩgũrũne. (Mathayo 26:29; Luka 7:34) Na kĩrĩ bimwe bia biama biawe, Jesũ naagarũrĩre rũũjĩ rũraa ndibei ĩrĩa yaarĩ kĩewa kĩa bata mono kĩrĩ antũ mũranũne.—Johana 2:1-10.

Mogwati ja kũnyua ncoobi nkũrũki ya kĩthimi

 Kinya kethĩra Bibiria nĩgwetaga mantũ jameega jegie ncoobi, nĩkanũkagia muntũ kũnyua ncoobi nkũrũki ya kĩthimi o amwe na mbogita. Kwou, Mũkristũ ũrĩa ũnyunyaga ncoobi abuĩrĩte kũthithia ũu na kĩthimi. (1 Timotheo 3:8; Tito 2:2, 3) Bibiria nĩyejanaga itũmi bibiingĩ bia gũciebania na kũnyua ncoobi nkũrũki ya kĩthimi.

•   Nĩthũkagia ũũmbi bwetũ bwa kũthũgaania na gũtua matua. (Njuno 23:29-35) Muntũ ũrĩa wogiti atĩũmba kũũjũria wĩrane bũbũ bwa Bibiria, “bwinenkanire miiri yenu yee kigongwana kiria kiri mwoyo, na kiria kitheru na kiria Murungu eetikirikia, o ta uria bwagiri ni kugitaga.”—Aroma 12:1.

•   Kũnyua nkũrũki ya kĩthimi nĩgũtũmaga muntũ akathĩra nthoni na ‘nĩbio bithiragia wendi bwa kũthithia mantũ jarĩa jaagĩrĩte.’—Hosea 4:11; Aefeso 5:18.

•   No ĩtũme muntũ akathĩĩna na akagwatwa nĩ mĩrimo ĩmĩthũũku.—Njuno 23:21, 31, 32.

•   Mĩtugo ya kũnyua ncoobi nkũrũkĩ ya kĩthimi na mbogita, nĩthũũragia Mũrungu.—Njuno 23:20; Agalatia 5:19-21.

Nĩrĩ tũũmba kuuga atĩ muntũ nanyuĩte ncoobi nkũrũki ya kĩthimi?

 Nĩ rĩrĩa muntũ aanyua ncoobi aciĩkĩra wee na ekĩra antũ bangĩ ũgwatine. Kũringana na Bibiria, mbogita ĩmenyekanaga tĩ rĩrĩa muntũ amaama ĩndĩ nĩ rĩrĩa mĩtugo ya muntũ yagarũka ta kwangaratana rwariene rwawe na kinya gũtang’atang’a, gũteta na kwĩthĩrwa na rwaria rũthũũku. (Ayubu 12:25; Zaburi 107:27; Njuno 23:29, 30, 33) Kinya barĩa bageragia kwebera kũnyua ncoobi ĩnyingĩ ‘no mbogite’ na kwou bakagwatwa nĩ maumĩĩra jatĩbui.—Luka 21:34, 35.

Gũtigana nayo buru

 Bibiria nĩtaragĩĩria magĩĩta jarĩa Mũkristũ abuĩrĩte gũciebania na kũnyua ncoobi buru, najo nĩ:

•   Kethĩra kũthithia ũu nĩ gũkwigithia bangĩ bũbũĩ.—Aroma 14:21.

•   Kethĩra kũnyua ncoobi nĩgiutatĩ na mawatho ja narĩa ũgũtũũra.—Aroma 13:1.

•   Kethĩra muntũ atĩkũũmba kũthimĩra ncoobi ĩrĩa akũnyua. Barĩa bethagĩrwa na mathĩna jaumanĩtie na mbogita na kũnyua ncoobi nkũrũki ya kĩthimi nĩbabuĩrĩte kũjũkia ĩtua rĩa gũtigana nayo.—Mathayo 5:29, 30.