Ũrĩa Bibiria yugaga

 Nĩkenda tũmenya nĩrĩ mũthiro jwa nthĩgũrũ jũgakinya, nĩtũkũbatara gũciũkĩrwa nĩ ũrĩa Bibiria ĩtumagĩra kiugo “nthĩgũrũ.” Riĩtwa rĩa Kĩgiriki koʹsmos, rĩrĩa rĩtauragwa “nthĩgũrũ,” kaingĩ rĩonanagia antũ, monomono barĩa batĩathĩkagĩra Mũrungu na wendi bwawe. (Johana 15:18, 19; 2 Petero 2:5) Magiita jamwe, koʹsmos yonanagia into birĩa antũ barĩ nabio na birĩa bathingatagĩĩra ũtũũrone.—1 Akorintho 7:31; 1 Johana 2:15, 16. a

“Muthiro jwa nthiguru” nĩmbi?

 Kiugo “muthiro jwa nthiguru,” kĩrĩa kĩonekanaga kĩrĩ Bibiria inyingĩ, kĩomba kinya kwonania “mũthiro” jwa mũtaratara jũju jwa mantũ, kana “mũthiro” jwa kagiita kau. (Mathayo 24:3; English Standard Version) Kiugo kĩu gĩtĩonanagia atĩ Mũrungu akathiria nthĩgũrũ yo yongwa kana antũ bonthe ĩndĩ birĩa akathiria nĩ ngũgĩ ĩnthũũku na kinya antũ babaaĩ.—1 Johana 2:17.

 Bibiria ĩritanaga atĩ “baria bathithagia bui bakeebua” nĩkenda antũ babeega bagwĩrĩrua ũtũũro nthĩgũrũne. (Zaburi 37:9-11) Kũthirua gũkũ gũgakarĩka ĩgiita rĩa “ukia bubwingi,” bũrĩa bũgakinya mũthia ĩgiteene rĩa ndwa ya Amagedon.—Mathayo 24:21, 22; Kugwurirwa 16:14, 16.

Nĩrĩ mũthiro jũjũ jũkeeja?

 Jesũ aaugĩre ũjũ: “Mantu ja ntuku iu kana igiita riu gutiwe wiji, kinya araika baria bari Iguru, kana Mutana, indi no Ithe wenka.” (Mathayo 24:36, 42) Nkũrũki, aaugĩre ũjũ bwegie mũthiro jwa nthĩgũrũ, “untu ni igiita riria butiiji Mutana-wa-muntu akeeja.”—Mathayo 24:44.

 Kinya kethĩrwa tũtiijĩ ntukũ kana ĩgiita rĩongwa, Jesũ naaejanĩre “rwano,” kana makarĩka, jarĩa jarĩngĩ kwonania ĩgiita rĩongwa rĩa mũthiro jwa nthĩgũrũ. (Mathayo 24:3, 7-14) Bibiria ĩtaaga ĩgiita rĩu, “igita ria muthiro,” “ntukũne cia mũthia,” na “matukune ja muthiro.”—Danieli 12:4; 2 Timotheo 3:1-5.

Rĩ, kũrĩ gĩntũ kĩgatigara nyuma ya mũthiro jwa nthĩgũrũ?

 Ĩĩ, nthĩgũrũ ĩgatũũra o tontũ Bibiria yugaga ũjũ: “Nayo itikoroebaeba kenya na kenya.” (Zaburi 104:5) Na nthĩgũrũ ĩkoojũra antũ, o ta ũrĩa Bibiria yugĩĩte: “Baria aagiru nibo bakaa eene rugai rwa nthi, na batuurage ku magita jonthe.” (Zaburi 37:29) Nyumene Mũrungu akareta mantũ jarĩa jonthe aabangĩte kuuma kĩambĩrĩria:

•   Paradiso.—Isaya 35:1; Luka 23:43.

•   Thĩĩrĩ na itharimo bibingĩ.—Mika 4:4.

•   Kũgwĩragĩrua ngũgĩ cia njara matukũ jonthe.—Isaya 65:21-23.

•   Akeberia mĩrimo na ũkũrũ.—Ayubu 33:25; Isaya 33:24.