Ĩcokio rĩa Bibiria

 Jesũ noonokerie antũ barĩa eetĩkĩkua rĩrĩa aaritĩre mwoyo jwawe jũrĩ ĩkũũri. (Mathayo 20:28) Kwou, nĩkĩo gĩtũmi Bibiria ĩmwĩtaga, ‘Mwonokia wa nthĩgũrũ.’ (1 Johana 4:14) Kinya yugaga ũjũ: ‘Na wonokio butĩonora kĩrĩ ũngĩ kinya ũrĩkũ; nĩ ũntũ rĩ, gũtĩ riĩtwa rĩngĩ kinya rĩrĩkũ gũkũ nthĩ, rĩrĩa rĩeei antũ, rĩrĩa rĩagĩrĩte rĩa gũtwonokia.’—Mathithio 4:12.

 Jesũ ‘naacemere gĩkuũ antũ a kĩrĩndĩ kĩonthe,’ kĩrĩa kĩonanagia wĩtĩkio kũmwerekera. (Ahibirania 2:9; Johana 3:16) Nyumene, ‘Mũrungu naamũriũkĩrie kuuma kĩrĩ akuũ,’ nawe naacokere ĩgũrũ arĩ kĩũmbe gĩa gĩkĩrundu. (Mathithio 3:15) Jesũ arĩ kũu ĩgũrũ, ‘oomba kwonokia antũ mma barĩa bathengagĩĩria Mũrungu bakũrũkĩĩrĩte kĩrĩ We, nĩ ũrĩa We atũũraga mwoyo ntukũ cionthe akĩbarombagĩra.’—Ahibirania 7:25.

Nĩkĩ tũkũbatara Jesũ atwerecanĩĩra kĩrĩ Mũrungu?

 Twinthe tũrĩ eeyia. (Aroma 3:23) Wĩyia nĩbũtwathũranaga na Mũrungu, na nyumene nĩbũretaga gĩkuũ. (Aroma 6:23) Ĩndĩ Jesũ natumĩkaga arĩ ‘ũmwe ũrĩa ũtwerencanagĩĩra kĩrĩ baaba,’ kĩrĩ barĩa bonanagia wĩtĩkio kwerekera ĩkũũri rĩawe. (1 Johana 2:1) Naberencanagĩĩra kĩrĩ Mũrungu akĩrombaga Jehova aigue maromba na abarekere meeyia jaao gũkũrũkĩĩra ĩkũũri. (Mathayo 1:21; Aroma 8:34) Mũrungu nathikagĩĩra maromba jau, tontũ nĩjagwĩtanĩria na wendi bwawe. Mũrungu naatũmĩre Jesũ aja nthĩgũrũne, nĩkenda antũ ‘boonokue nĩ ũntũ bwawe.’—Johana 3:17.

Rĩ, gwĩtĩkia Jesũ nĩku akĩ tũkũbatara nĩkenda twonokua?

 Arĩ. Kinya kethĩra no mwanka twĩtĩkie Jesũ nĩkenda twonokua mantũ jangĩ jamaingĩ nĩjakũbatarĩka. (Mathithio 16:30, 31) Bibiria yugaga ũjũ: ‘O ja urĩa mwĩrĩ jũrĩa jũtĩ na kĩrundu jũkuĩte, no ta uu wĩtĩkio bũrĩa bũtĩ na mathithio bũkuĩte.ʼ (Jakubu 2:26) Nĩkenda twonokua no mwanka:

•   Twiritane bwegie Jehova na Jesũ.—Johana 17:3.

•   Tũkũrie wĩtĩkio kũberekera.—Johana 12:44; 14:1.

•   Twonanie wĩtĩkio bwetũ na njĩra ya kwathĩkĩra mawatho jaao. (Luka 6:46; 1 Johana 2:17) Jesũ aaritanĩre atĩ, tĩ o muntũ wonthe ũrĩa ũmwĩtaga “Mwathani” ũkoonokua, ĩndĩ no ũrĩa ‘ũthithagia ũrĩa Baaba ũrĩa ũrĩ ĩgũrũ eendaga.’—Mathayo 7:21.

•   Ĩta na mbere kwonania wĩtĩkio kinya rĩrĩa ũgũkũrũkĩĩra mathĩĩna. Jesũ noonanĩrie ũntũ bũu rĩrĩa aaugĩre ũjũ: ‘Ĩndĩ ũrĩa ũkoomĩĩria mwanka mũthiro, ũu nĩwe ũkoonokua.’—Mathayo 24:13.