Ũrĩa Bibiria yugaga

 Ũnene bwa Mũrungu nĩ thirikarĩ yongwa ĩrĩa ĩtongeeretue nĩ Jehova Mũrungu. Bibiriene “unene bwa Murungu” nĩbwĩtagwa kinya “unene bwa iguru” tontũ bwathanaga kuuma ĩgũrũ. (Mariko 1:14, 15; Mathayo 4:17) Thirikarĩ ĩu nĩĩthagĩrwa na nkuma ing’uanene na thirikarĩ cia antũ, ĩndĩ ĩrĩ inya nkũrũki ya cia antũ.

•   Atongeeria. Mũrungu nathuurĩte Jesũ Kristũ arĩ mũnene wa Ũnene bwa Mũrungu na arĩna inya nkũrũki ya mũtongeeria kinya ũrĩkũ. (Mathayo 28:18) Jesũ atĩtumagĩra inya ĩu kũthithia mantũ jameega akĩ ĩndĩ noonanĩtie nĩ mũnene ũrĩna kĩao na wa kwĩrĩgĩĩrĩka. (Mathayo 4:23; Mariko 1:40, 41; 6:31-34; Luka 7:11-17) Agĩtongagĩĩrua nĩ Mũrungu, Jesũ nathũũrĩte antũ kuuma mĩgongo yonthe barĩa bakathana nawe ĩgũrũ, ‘barĩ anene’.—Kugwurirwa 5:9, 10.

•   Ĩgiita. Mwanya na thirikarĩ cia kĩthĩgũrũ irĩa ciathanaga ĩgiita rĩkai, Ũnene bwa Mũrungu “butikaritharua kinya ri.”—Danieli 2:44.

•   Raia. O muntũ wonthe ũrĩa ũthithagia wendi bwa Mũrungu no ae raia wa Ũnene bwa Mũrungu kinya gũkethĩrwa nĩkũ aumĩte.—Mathithio 10:34, 35.

•   Mawatho. Mawatho (maathana) ja Ũnene bwa Mũrungu jatĩrigagĩĩria antũ kuthithia moothũũku akĩ, ĩndĩ nĩjaritanaga antũ mĩtĩĩre ĩmĩega. Ngerekano, Bibiria yugaga ũjũ: “Endaga Mwathani Murungu waku na nkoro yaku yonthe, na kirundu giaku kionthe, na mathũgaanio jaku jonthe. Riri nirio yathana riria riri riinene na ria mbere. Na ria jairi iring’uanene nario, nario niri, Endaga mutuuri waku ta uria uciendete gwengwa.” (Mathayo 22:37-39) Kwenda Mũrungu na mũtũũri nĩgũtũmaga raia ba Ũnene bwa Mũrungu bathithĩria bangĩ mantũ jameega.

•   Ũritani. Amwe na kwĩthĩrwa ithimi bia Mũrungu bia wagĩru birĩ ĩgũrũ, Ũnene bwa Mũrungu nĩbũtethagĩĩria antũ kũbikinyĩra.—Isaya 48:17, 18.

•   Mworoto. Ũnene bwa Mũrungu bũgunaga raia nkũrũki ya barĩa bakwathana. Kinya, bũkojũria wendi bwa Mũrungu o amwe na mawĩrane jarĩa augĩĩte atĩ barĩa bamwendete bagatũũra nthĩgũrũne kenya na kenya.—Isaya 35:1, 5, 6; Mathayo 6:10; Kugwurirwa 21:1-4.