Akũũjĩ ba Jehova batĩĩtaga ndwene tontũ bwa itũmi bibi:

1.   Nĩ Mũrungu bathĩkagĩra. Bibiria yugaga atumĩkĩri ba Mũrungu “bagatura nciu ciao macembe” na “ningi antu batikoroiritana ndua buru.”—Isaya 2:4.

2.   Nĩ Jesũ bathĩkagĩra. Jesũ eerĩre mũtũmwa Petero: “Cokia ruciu rwaku kiuene; nikwithirwa bonthe baria bajukagia ruciu bakathirua na ruciu.” (Mathayo 26:52) Gũkũrũkĩĩra biugo biu, Jesũ noonanĩrie atĩ athingati baawe batĩtumĩra mathaga ja ndwa.

    Aritwa ba Jesũ nĩ bathĩkagĩra watho bwawe bwa kwĩthĩrwa “bati ba nthiguru” gũkũrũkĩĩra kũrega kũgwata mbaru rũtere kinya rũrĩkũ mantũne ja gĩsiasa. (Johana 17:16) Batĩandamanaga bakĩregana na ndwa kana barigĩĩria antũ gũtonya njeshine.

3.   Nĩbendete antũ bangĩ. Jesũ naathĩre aritwa baawe ‘bendanage.’ (Johana 13:34, 35) Bũu bũrĩngĩtũma bethĩrwa na ũrũmwe bwa nthĩgũrũne yonthe, na gũtĩ muntũ ũrĩngĩrwa na mũtana kana mwarĩ wa baaba ũngĩ.—1 Johana 3:10-12.

4.   Nĩbathingataga ngerekano ya Akristũ ba mbere. Iuku Encyclopedia of Religion and War riugaga ũjũ: “Athingati ba mbere ba Jesũ nĩbaaregere mantũ ja ndwa na ja gũtonya njeshine,” tontũ nĩbaciũkagĩrwa atĩ mantũ jau “jatagwatanagĩra na ũritani bwegie wendo bũrĩa Jesũ aaritanaga, na watho bũrĩa aaejanĩte atĩ, muntũ nabuĩrĩte kwenda anthũ baawe.” Mũthomi ũmwe wa mantũ ja ndini kuuma Germany, Peter Meinhold, aaugĩre ũjũ bwegie athingati bau ba Jesũ: “Gũtĩngĩũmbĩka wĩthĩrwa ũrĩ Mũkristũ, na ĩgiita o rĩu wĩthĩrwa ũrĩ mũnjeshi.”

Ũrĩa batethagia antũ bangĩ

 Akũũjĩ ba Jehova nĩbatethagia antũ bangĩ barĩa batũũranagia nabo, na batĩĩthagĩrwa barĩ ũgwati nthĩgũrũne irĩa bakaraga. Nĩtũtĩĩa thirikarĩ tũkĩthingatagĩĩra mantũ jaja twathĩtwe nĩ Bibiria:

•   ‘Muntũ ũrĩa ũtwĩre mwoyo naigague barĩa baathanaga.’—Aroma 13:1.

•   “Niu nenkagireni Kaisari into biawe, na Murungu nawe bumunenkagire into biawe.”—Mathayo 22:21.

 Tontũ bũũ, nĩtũtĩĩaga waatho, tũkarea ũgoti, na tũkagwatanĩra na thirikarĩ ngũgĩne cia gũtethia mwingĩ.