Rĩ, Akũũjĩ ba Jehova Nĩbethagĩrwa na Mawaatho Jegie Ngambanio?
Akũũjĩ ba Jehova nĩbetĩkĩtie moritani na mawaatho jarĩa jarĩ Bibiriene, na nĩjo jomba gũtũtethia gũtua matua jameega jarĩa jakagwĩria Mũrungu na jatũgune. (Isaya 48:17, 18) Tĩ batwĩ twĩkĩte mawaatho na moritani jau, ĩndĩ nĩtũtũraga kũringana najo. Cũnkũũna mawaatho jaja jamwe jegie ngambanio. a
Ngũrano nĩ gĩntũ gĩa gũtũũra. (Mathayo 19:6) Tontũ Akũũjĩ ba Jehova nĩ bonaga ngambanio ĩtongagĩĩria ngũranone, kwou nĩbajũkagia ũntũ bũu na ũrito mono.
Ngambanio nĩ ya barĩa barĩna na ũkũrũ bũngʼanu bwa gũtonya ngũranone. Bau nĩ barĩa ‘bakũrũkĩte ĩgiita rĩa wĩthĩ bwao,ʼ kana barĩa bakũũmba kwatha mĩĩrĩ yao.—1 Akorintho 7:36, NWT.
Barĩa bakũgambania babuĩrĩte kwĩthĩrwa na rũũtha rwa kĩmaandĩko rwa kũgũrana. Antũ bamwe barĩa batigene buru kĩwaatho, batĩtĩkĩĩrĩtue nĩ Mũrungu kũgũrana kaĩrĩ, tontũ ithimi biawe nĩ atĩ kĩrĩa kĩũmba gũtũma antũ baĩrĩ bagũrene kĩwaatho batigana buru nĩ ũthũngĩri.—Mathayo 19:9.
Akristũ barĩa bakwenda kũgũrana barĩkĩrwa inya bataare muntũ ũrĩa ũrĩna wĩtĩkio ta bwao. (1 Akorintho 7:39) Akũũjĩ ba Jehova bonaga waatho bũu bũtĩkwarĩĩria muntũ ũrĩa ũgũtĩĩa jarĩa twĩtĩkĩtie akĩ, ĩndĩ nĩ ũrĩa ũthuurĩte kwaa Mũkũũjĩ wa Jehova na akabatithua. (2 Akorintho 6:14) Rĩonthe, Mũrungu neraga athathayia baawe batonye ngũranone amwe na barĩa betĩkĩtie ũmwe nabo.(Kiambiriria 24:3; Malaki 2:11) Kinya acũnkũũni nĩbonete waatho bũu nĩ bwa mma. b
Aana nĩbabuĩrĩte kwathĩkĩra aciari baao. (Njuno 1:8; Akolosai 3:20) Kĩrĩ aana barĩa bagũkara na aciari, nĩbabuĩrĩte kwathĩkĩra mawaatho ja aciari baao jegie ngambanio. Mantũ jaja nĩ ta, barĩna ũkũrũ bũngʼana na nĩ mantũ jarĩkũ betĩkĩĩrĩtue kũthithia ngambanione.
Agĩtongaagĩrua nĩ Maandĩko, o Mũkũũjĩ akathuura kethĩra akagambua na nũũ ũkamũgambia. Bũbũ nĩbũkũgwatanĩra na ũritani bũrĩa bũkuuga ũjũ: “Nikwithirwa o muntu agaikamatira murigo jwawe wengwa.” (Agalatia 6:5) Kinya gũkari o ũu, rĩrĩa antũ bamwe bakwenda kũgambania, nĩbacwaga ũtaaro kuuma kĩrĩ Akristũ bagimaru gĩkĩrundu barĩa bakũbendera mantũ jameega.—Njuno 1:5.
Mantũ jamaingĩ jarĩa jagwetanagĩrua na ngambanio, jamwe jaajo jethagĩrwa jarĩ meeyia jamarito. Ngerekano, Bibiria nĩtwĩraga tũciebanie na mĩtugo ya waganu ya kũmenyana kĩmwĩrĩ. Mĩtugo ĩu ya waganu nĩ amwe na, mathithio jatĩbui gatĩgatĩ ka antũ batĩgurene ta, gũtongatonga muntũ ũngĩ irungo biawe bia withone, kana kũmumunya irũngo bia withone bia muntũ ũngĩ, o amwe na kũmenyana kĩmwĩrĩ kwa antũ ba mũthemba jũmwe. (1 Akorintho 6:9-11) Mathithio jamwe jarĩa jacancamũraga muntũ akuĩ athithia ũmaramari nĩ ‘mantũ jarĩa jatĩtheri’ na jatĩgwĩragia Jehova. (Agalatia 5:19-21) Kinya rwaria rwa waganu rũrĩa rũrĩna ‘mantũ jamathũũku’ nĩrũmeneeretue Bibiriene.—Akolosai 3:8.
Nkoro ĩrĩ wayia nkũrũki ya into bingĩ bionthe. (Jeremia 17:9) No ĩtongeerie muntũ kũthithia mantũ jarĩa akũmenya nĩ jamathũũku. Antũ barĩa bakũgambania, nĩbabuĩrĩte kwimenyeera batĩkethĩrwe barĩ bonka withone, ũntũ bũrĩa bũũmba kũbatonyia ũgwatine nĩkenda nkoro ciao ĩtĩkabatongeerie bũbũũĩ. No bathuure kũthingatĩĩra mĩkaana rĩrĩa barĩ amwe, na njĩra ya gũkara gũntũ kũrĩna na antũ kana kinya kwĩthĩrwa barĩna muntũ ũngĩ rĩrĩa barĩ amwe. (Njuno 28:26) Akristũ barĩa batĩgũrene na bagũcwaa eendwa ba kũgũrana nabo, nĩbabuĩrĩte kũmenya ũgwati bũrĩa bwĩthagĩrwa bũrĩ o rĩrĩa bagũcwa mwendwa wa kũgũrana nawe kĩrĩ ituo bia mwingĩ, monomono kwambĩrĩria ũcoore ta bũu na muntũ ũtĩkũmũmenya bwega.—Zaburi 26:4.
a Nthĩgũrũne imwe nĩ ũntũ bwa wĩthĩre kwambĩrĩria ũcoore bũrĩa bũũmba gũkĩnyithia antũ kũgũrana, ĩndĩ kĩrĩ nthĩgũrũ ingĩ tĩ ũntũ bwa wĩthĩre. Bibiria ĩtiugaga no mwanka muntũ atonye ngambanione, kana yuuga nĩyo njĩra akĩ ĩrĩa ĩtongagĩĩria antũ kũgũrana.
b Ngerekano, kĩthoomo kĩmwe kĩrĩ ngacĩti ya Marriage & Family Review yugaga atĩ, “ũcũnkũũnĩ bũrĩa bwathithĩrue bwonanagia mantũ jarĩa jatũmaga ngũrano ĩkara ĩgiita rĩraaja nĩ atĩ, antũ barĩa bagũrene barĩ na mwonere, wĩtĩkio na moritani ja Bibiria jang’uanene ũtũũrone bwao, ngũrano yaao nĩkaraga ĩgiita rĩraaja (mĩaka 25-50 na kinya nkũrũki).”—Toleo la 38, nakala ya 1, ukurasa wa 88 (2005).
