Li mia haiŋ kpɛlɛ na

Jɛhova Jeliwuablesia

Kɛnyɛyei wumbu Mɛnde

Saweisia Kɔlongɔ Nunga Ti Hindeisia Ma

Saweisia Kɔlongɔ Nunga Ti Hindeisia Ma

Jɛhova Jeliwuableisia ti hugbatei bagɔɔ lɔ hindei nasia ma nunga ta hugɛ a tie kɔlongɔ tia yekpe ma nahi tɛɛ lo numu yeka gbi i magɔɔ sia lee kɛngɔ la Baibui hu. Ti hugbatei a gbee lɔ hindanga va kɔlongɔ numui ma kɔ ti yenge la ti yingi lɛ va gulɔma, kɛɛ ta lapi lɔ kɔ numu yeka gbi aa ye hindei nasia bonda magɔɔ. (Saleisia 15:​22; 25:​9) Ti bagɔɔ lɔ wa nunga ti hindeisia ma.​—Saleisia 20:⁠19.

Ndɔɔ lɛnga hu ti sawanga langa na, na a kpɔma wue kɔ nunga taa ti mbaanga ti hindeisia gbua ngitiya. Kɛɛ pɛiŋ taa ya sawei jisia la, nunga ti yɛ kɔɔnga wɔɔ kpɔ kɛ Jɛhova Jeliwuableisia ti hugbatei ɛɛ nunga ti hinda gbua ngitiya. Tao Jɛhova Jeliwuableisia ti hugbatei a lɛ lɔ gulɔma a ji wue la sia lee nyɛingɔ la mbei.

Mia Kinii Sawei Jisia Ta Jia Na

Sawei jisia ta jia lɔ mia gbi lee Jɛhova Jeliwuableisia ti hugbatei na ndunyi hu kpɛlɛ. Ti yenge bikisia mia ta ti yama jɔngɔ gbua.

Sia Mua Nunga Ti Hindeisia Hou La

Jɛhova Jeliwuableisia ta jia lɔ a nunga ti hindeisia sia lee kɛngɔ la mbui ji:

  1. Hindei nasia numu a nyɛin kɔlongɔ taikpe ma, ta yenge lɔ la sia lee kɛngɔ la sawei hu.

  2. Hindei nasia numu a nyɛin kɔlongɔ taikpe ma, ta gayenge lee sabui na va lɔ a nyɛin fa.

  3. Hindei nasia numu a nyɛin kɔlongɔ taikpe ma tɛɛ kpua ma tao tɛɛ mato. Kɛɛ ti lii heinga kpulanga gbi ma, ta pie lɔ ye numui i magɔɔ kɔ ti too tenga hu gama-gama.

  4. Hindei nasia numu a nyɛin kɔlongɔ taikpe ma ta ndamagbatɛ wati na va lɔ lee ti gbeengɔ fa.

  5. Ta lapi lɔ gboŋ kɔ taa nunga ti hindeisia gbua ngitiya.

  6. Mu hugbatei a na gbi wue lɔ a gu a pie la kɔ bi hindeisia taa gbua ngitiya ɔɔ kɔ numu aa loko la ma, nahi ngi ma ii houni majɔɔ va. Kɔmpitei nasia kpɛlɛ nunga ti hindeisia ti hu ta kpɔu lɔ a paswɔdi nahi numu yeka gbi ɛɛ gu i ndawo kɛlee nasia ti kpayei venga ti wɛ. Ngenge wati gbɔyɔnga ta ye ngengemi gbɔu lɔ kpauŋ kɔ numu yeka gbi aa gu i jɔkɔ na kɛlee nasia ta yenge na.

  7. Hindei nasia numu a nyɛin kɔlongɔ taikpe ma tɛɛ joyo ngenge beka yekanga hu kɛlee ina ti gbeenga fa kɔ Jɛhova vɛi yingi i lɛ gulɔma, tao hinda mia nahi Jɛhova Jeliwuableisia kpɛlɛ ti yɛ kulunga ma a wati na ti lumani kɔ ti wote a Jɛhova Jeliwuableisia.

Kpayei na Nunga Yeya

  1. Kpayei lɔ numu gbi yeya kɔ i tɔ kɛ hindei nasia i nyɛinga kɔlongɔ taikpe ma, mui kpuani ngitiya. Tao numu longa i hinda mawove hindei na hu i yɛ nyɛinga ɔɔ i kpua na, a pie lɔ, ina lee ii windɛni na mahu nyɛingɔ mbei.

  2. Numui na gbi lee a lo i hindei ji bonda wue kungɔ i taikpe hinda hugɛ vui panda kɔ ti kɔɔ vui kɛ ta mia.

  3. Ina numu longɔ ngi loko i fo hindei nasia ma i yɛ nyɛinga kɔlongɔ taikpe ma, ɔɔ i hinda mawove hu, ɔɔ i kpua na, Jɛhova Jeliwuableisia ti hugbatei a nɛmahu wua lɔ bu kɔ i kɔɔ sabui na va numu longɔ i hindei na bonda wue kɔ taa hinda wue nahi a ti vawei kulɔma.

  4. Jɛhova Jeliwuableisia ti hugbatei a lo lɔ i hindei nasia lamagbatɛ bi nyɛinga na a kɛ kɛ Jɛhova Jeliwuamui mia a bie. Ii guni numu i hindei na bonda gbua na, gbɛva see kpayei lɔ ti hugbatei yeya fa.

Kpayei Lɔ Bi Yeya Bi Lɔnyi Mavale Va

Numu giinga la kɛ ti nyiminga ngi lɔnyi ma, a kɔlei nyɛilɔ i joyo Ngenge Beke Mahugbebla gama kɔ i kɛ sia ti nyimini la ngi lɔnyi ma. Kungɔ i ye kɔlei yoyo wiki fele gohu.