Li mia haiŋ kpɛlɛ na

Jɛhova Jeliwuablesia

Kɛnyɛyei wumbu Mɛnde

Jɛhova Jeliwuableisia Ta Gbɔɔ Nasia Ma Kpundei A Ti Mɛi?

Jɛhova Jeliwuableisia Ta Gbɔɔ Nasia Ma Kpundei A Ti Mɛi?

Ɔɔ, Jɛhova Jeliwuableisia ta kpɔmi ve lɔ nunga wɛ ji kpundei a ti mɛi. Mua gbɔɔ Jɛhova Jeliwuableisia ma kɛ nasia Jɛhova Jeliwuabla yaa a tie, mua na wue lɔ gbɛva see Baibui ndeilɔ Galesiablɛisia 6:10 NY hu yɛɛ: “Mahoungɔ mu hinda yekpe wie a numu gbi, kakayee nasia mua tieni mu langɔ a Kristi.” I yama gbɔma mua ndomi gɛ lɔ tao mu Baibui gaa nasia ta yɛ ye kpundei na hu.—II Kɔrintabla 1:3, 4.

Mu Hugbatei

Ji kpundei a gula, gamaa gbakui ti ye hindei nasia gblanga ta lapi lɔ ti ti ndeengeisia kpɛlɛ loli kɔ ti kɔɔ gbɔɔ ta lo la tao ina gbɛogbɛ ii ti wueni. Jamaa gbakui jisia ti kpɔyɔnga na wue la, ta kɔlei nyɛin lɔ Jɛhova jeliwuableisia ti ngenge biki na gama i ti lɔlei hu.

Ina hakei nasia ti yeya ii guni ti ndeenga mahugbe va, Jɛhova Jeliwuableisia ti Guma Gbakuisia ta haiŋ lɛnga lɛ lɔ mba nunga ta lo la kɛ ti joyonga. Himia haala Klistimableisia ti yɛ a pie ji ndɔlei yɛ ti lɔlei hu. (I Kɔrintabla 16:1-4) Ngenge biki na ndɔɛ na hu ta loko loo lɔ nunga lɛnga ma kɔ ti loo ngenge ji gulɔ. Jɛhova Jeliwuableisia ti ndɔɛ yepekeisia hu, ta wati wumbu lɔ kɔ ti wa ti gbɔ nungei jisia ma kpundei a ti mɛi.—Saleisia 17:17.

Mi Mia Mua Kɔpoi Gbua Na

Pii yia ta mia a nunga ti lii hu gbɔmi ta fe ta joyo lɔ Jɛhova Jeliwuableisia ti yenge bikisia gama ye kɔpoi na mia ta gayenge gbɔva nungei nasia kpundei a ti mɛi. (Toobla ti Wiehindɛisia 11:27-30; II Kɔrintabla 8:13-15) Nasia ta wati wumbu kɔ ti wa ti gbɔ nungei nasia ma kundei a ti mɛi tɛ wa pawa va, fale kɔpoi nasia ɔɔ hakei nasia nunga ta fe i nasia lɔ va kundei a ti mɛi, muɛ pu mu hugbatei hu. Kɔpoi nasia nunga ta fe mua gayenge lɔ panda.—II Kɔrintabla 8:20.