Li mia haiŋ kpɛlɛ na

Jɛhova Jeliwuablesia

Kɛnyɛyei wumbu Mɛnde

Gbɛva Mia Jɛhova Jeliwuableisia Tɛ Ŋami Wumbu?

Gbɛva Mia Jɛhova Jeliwuableisia Tɛ Ŋami Wumbu?

Hindei nasia a nunga hugiti

Ndɛɛ Yɛpeisia: Jɛhova Jeliwuableisia tɛ hali wumbu tao tɛ li hale wɛɛ la.

Tɔnyi: Mua hali wumbu lɔ tao mua kɛ mu mabla mua li lɔ hale wɛɛ la. Ji mua higbɛ, mua li lɔ dɔkiteisia gama ti bɛɛngɔ a ti yingi wue la nahi ta gu ti mu hale ina ti ŋama veni mu wɛ. Mu gohunɛngɔ maisi nasia ma ti gbatɛnga kɔ hali hindei i lɛ gulɔma. Na pienga, hale na ti yɛ a Jɛhova Jeliwuableisia hale la nahi tɛ ŋami ve ti wɛ tao ta bawo panda, i pienga nunga gboto tii yɛni a Jɛhova Jeliwuableisia ti toonga ti woma. Ndɔɛ gbotoma hu, nasia ti higbɛngɔ tia mia ta nde ina ti longɔ ti ŋami ve ti wɛ ɔɔ ta fe. Gbɛva see hinda nyamunga lɔ ŋami na hu nunga ta wumbu sianyikɔ, higbɛ nasia ta yɛ ŋami hu, higbɛ nasia ta gbua numu luwui ma, kɛ kpulangei nasia nunga ta pie.

Ndɛɛ Yɛpeisia: Jɛhova Jeliwuableisia ti langɔ la kɛ ti lanayei a ti hali lɔ.

Tɔnyi: Muɛ hɛ nunga ma kɔ ti bawo.

Ndɛɛ Yɛpeisia: Ba kɔpɔ wa ve lɔ ina bi ndia bɛ bɛ ŋami wumbu.

Tɔnyi: Ji bɛ ŋami wumbu bi hale va, bɛɛ kɔpɔ wa yayenge. *

Ndɛɛ Yɛpeisia: Jɛhova Jeliwuableisia gbotoma i gbɛɛ ndenga, ta haa lɔ fo gbi hu jifa tɛ ŋami wumbu.

Tɔnyi: Tɔnya yana kulobɛ va. Dɔkiteisia lɔ na ta yenge nunga ti liisia ma, ti galeisia kɛ ti lɔli nahi tɛɛ ŋami yayenge. * Higbɛbla, i gbɛɛ ndenga ma, nahi tɛɛ ŋami wumbu ji ta yɛ ti hali ma, ti gahu a gbua lɔ fulo i lee numui na ma a ŋami wumbu. * Kɛ na hu gbe, muɛ nde kɛ ina numu ii ŋami wumbuni a haa lɔ ɔɔ ɛɛ haa ina i ŋami wumbu lɔ.

Gbɛva mia Jɛhova Jeliwuableisia tɛ ŋami wumbu?

Jifa nyɛingɔ Baibui hu kɛ i nyandeni kɔ mu ŋami wumbu pii gbi lee hu, na va mia muɛ wumbu. (Jɛnɛsis 9:4; Lɛvitikus 17:10; Dutɛrɔnɔmi 12:23; Toobla ti Wiehindɛisia 15:28, 29) Tao, Ngewɔ i ŋami wumbu lɔ sia ndɛvui na. (Lɛvitikus 17:14) Fale muɛ ŋami wumbu jifa mu longɔ mu golo lee Ngewɔ bu, kɛ jifa mu longɔ mu bagɔɔmi ve numui na wɛ i ndɛvui veni mu wɛ.

Ti Ti Giiyei Mawoovenga

Ta gu lɔ ti yenge nunga ma nahi tɛɛ ŋami yayenge kulobɛ va

Gɛ gɛ, dɔkiteisia ti yɛ a gii la kɛ kɔ bi yenge numu ma nahi bɛ ŋami ve ngi wɛ, a kɛ lɔ kɛ bi bɛɛni a bi yingi, ɔɔ numu a haa lɔ ti yeya ina tii ŋami veni ti wɛ. Kɛɛ ti giiyei mawoovenga naa. Tɔmasei mia a ji, 2004 hu, kɔlɔ yia ti nyɛini kɔ dɔkiteisia ti kaa, i nde lɔ yɛɛ “pii nasia ta gayenge Jɛhova Jeliwuableisia ti hali va nahi tɛɛ ŋama ve ti wɛ, ta mia kungɔ ti ya gayenge nunga yekeisia ma.” * Kɔlei ta nyɛin kɔlongɔ nunga ti liisia ma, Lung kɛ Circulation nde lɔ 2010 hu yɛɛ “yenge va nunga ma nahi bɛ ŋami yayenge i gui ti ya pie Jɛhoava Jeliwuableisia ma lee kɛɛ kungɔ ti ya pie a nunga yekeisia ta wa kɔ dɔkitei i yenge ti ma.”

Dɔkiteisia gboto ma, ta pii nasia yayenge lɔ Jɛhova Jeliwuableisia ta gayenge kɔ ti yenge nunga yekeisia ma nahi tɛɛ ŋami yayenge ti ma. Na pienga ndɔɛ lɛnga hu, nungei nasia bɛ Jɛhova Jeliwuabla yaa a tie tɛ yaa luma ŋami wumbu va.

^ kɔlɔ wumbumi 8 Bukui ji, Transfusion and Apheresis Science, Vɔlium 33, Nɔ. 3, kɔl ye. 349 gbe.

^ kɔlɔ wumbumi 10 Bukui ji, The Journal of Thoracic and Cardiovascular Surgery, Vɔlium 134, Nɔ. 2, kɔl. 287-288; Texas Heart Institute Journal, Vɔlium 38, Nɔ. 5, kɔl. 563; Basics of Blood Management, kɔl. 2; kɛ Continuing Education in Anaesthesia, Critical Care & Pain, Vɔlium 4, Nɔ. 2, kɔl. 39.

^ kɔlɔ wumbumi 10 Bukui ji, The Journal of Thoracic and Cardiovascular Surgery, gaa Vɔlium 89, Nɔ. 6, kɔl. 918; kɛ Heart, Lung and Circulation, Vɔlium 19, kɔl. 658.

^ kɔlɔ wumbumi 14 Continuing Education in Anaesthesia, Critical Care & Pain, Vɔlium 4, Nɔ. 2, kɔl 39.