Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 NA BUKUI JI YE KULEI | GBƐVA MIA KUNGƆ BI WƆNA?

Numu A Gu Lɔ I Wɔna Siahuna?

Numu A Gu Lɔ I Wɔna Siahuna?

Hitosi yɛɛ a yenge ngengema yia mia ta jia na a navo hindei Jepan lɔlei hu. Ji tia ngi mahumui ti yɛɛ jiama kɔlei na woma a kɛ navui na ta majɔɔ kɛ pili na ta gayenge la, ngi mahumui ndeilɔ ngi ma yɛ i yɛɛ a gii la kɛ a ye kɔlei hugbatɛ lɔ. Hitosi ndeilɔ ngi ma yɛ ɛɛ gu aa kava hinda gbi wue jifa ngi longɔ ngi nɛmahu i yɛ sɛwɛ. Ngi mahumui ndeilɔ ngi ma yɛ a ngi gbua lɔ ngingi hu ina ii pieni. Hitosi ii lumani a pie, fale i baailɔ a ngi yingi.

Na leengɔ woma Hitosi yɛɛ a gii ina a gu lɔ i ngenge yeka majɔɔ. Ji i lini ngengema yia kɔ ti yɛpɛ ngi gama kɔlongɔ ngingi na ma a gu i pie, i ndeilɔ numui na ma yɛ a yɛpɛ ngi gama yɛ ɛɛ loko wili guyu-guyu hinda gbi hu. Ye numui ndeilɔ ngi ma yɛ, “Nguhu baa hinda mia a na!” Hitosi mableisia kɛ ngi ndiamuisia ti lɛilɔ gulɔma a ngi liinɛpɔ la kɔ i lɛ gulɔma a pɔna hindei wue la sia lee i ngi lii huyiinga pie va. Kɛɛ ngi nɛmahu tatoilɔ naa a giti kɔlongɔ ngi wɔnalei ma. Wati yia i ndeilɔ pɛiŋ yɛ, “Ngii gii la vui ina kpekpeya hinda mia ngi pieni a ji ngi wɔnani.”

Na wueni a Hitosi kɛma lɔ gboleiŋ kɛ nunga gbotoma tii bagɔɔ pɔna hindei ma. Tao nunga lɛnga ti giingɔ la pɛiŋ kɛ numu bi ndenga bɛ bi wɔna ma bɛɛ lɛ gulɔma hinda gbi hu. Nyapo yia na a yenge Saout Aflika, ndeilɔ yɛ, “Kavabla mia lee mua tieni mua yenge, tao wati lɛnga ɛɛ bɛbɛ nya va.”

Hinda yia na nunga tii mbumbuni aa gbɛogbɛ ta mia a ndɛɛ gulalei. Fo lɛnga leengɔ woma, kena yia na ngi biyei mia a Lɔbɔti S. Fidma na a yenge Yunivasiti yia hu Amɛlika gɔfɛgbua yia wueilɔ na kɛni kɛ kpako puu gbi lee lia ti weita ta ndɛɛ gula lɔ miniti puu gbi gohu ji tia nunga ta yɛ yɛpɛma. I ndeilɔ yɛ, “Ji gualangɔ wa nya ma, gbɛva see ngii yɛ kɔɔ kɛ hi mia nunga ti ndɛɛ gulalei wotenga a ti magulei.” Nunga tii loni ti ndɛɛ gula ti wɛ kɛɛ tia ta ndɛɛ gula lɔ nunga wɛ. Hinda yekpe mia a na?

Gbɛva mia ndɛɛ gulalei, huma wuelei, kɛ kava-kava hindei yepekeisia ti gbotongɔ ha ndunyi hu? Guyu-guyu hindeisia ta ye nunga vawei? Gbɛ mia kungɔ mu pie kɔ mua loko wili kava hinda gbi hu?