Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KLISIMABLA TI HINDEISIA

“Bi Kɛkɛ Bɛlɛhou taa Bi Nje”

“Bi Kɛkɛ Bɛlɛhou taa Bi Nje”

Ji Yesu yɛ ndunyi ji ma, i laligbailɔ sawei na ma ndeni yɛɛ: “Bi kɛkɛ bɛlɛhou taa bi nje.” (Ɛks 20:​12; Mat 15:​4) Yesu ii yɛ a luwa a yɛpɛ la kɔlongɔ hindei ji ma, gbɛva see “i goloilɔ” ngi lebla bu ngi gulongoi hu. (Luk 2:​51) Tao ngi jɛmbɛngoi hu, i kɛilɔ kɛ ngi gbeengoi ngi nje va a ji i ngi loko wuani numu yeya ngi mahugbe va ngi haangoi woma.—Jɔn 19:​26, 27.

Mu nda wati ji hu bɛ, Klisimablei nasia ti voningengɔ, ta ti lebla bɛlɛhou lɔ a ji ta golo ti bu tao ta yɛpɛ ti gama a bagɔɔma. Na pɛiŋ hindei ma, numu ɛɛ jɛmbɛ sawei na hou va, na ndeni yɛ mu mu lebla ti bɛlɛhou. Mu lebla ti wova bɛ, kungɔ mu lɛ gulɔma a ti bɛlɛhou la a ji mua wolo ndahi nasia ma ta fe mu wɛ. (Sal 23:​22) Mu lebla ti wovanga, mua ti bɛlɛhou lɔ a ji mua kɛ kɛ mu gbeengoi ti va, kɛ ji mua hinda wue ti va. (I Tim 5:​8) Mu wue bɛ a ndopo ɔɔ kpako, mua mu lebla bɛlɛhou lɔ i lee kpɛlɛ ma, ji njɛpɛ yekpe a yɛ mua tieni luahu.

BA PIE LƆ TI VIDUI JI GƐ, AW A GO EBUL TƆK TO MI MAMA ƐN PAPA? NA WOMA WUA MƆLI JISIA GBƐMBO LƆ:

  • Gbɛva mia wati lɛnga ɛɛ bɛbɛ kɔ bi yɛpɛ bi lebla gama?

  • Ba ye bi lebla bɛlɛhou ji ba yɛ yɛpɛma ti gama?

  • Gbɛva mia mua nde kɛ kungɔ vui mu mu buyii kɔ njɛpɛ yekpe i yɛ mua mu lebla luahu? (Sal 15:​22)

    Bi yaa yɛpɛma bi lebla gama na a gbɔɔ bi ma bi lɛvui hu