Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 KLISIMABLA TI HINDEISIA

Ngewɔ Layia Lelei Kakei Nasia Ma Ta Kɛnyɛyia Gboto Le Na

Ngewɔ Layia Lelei Kakei Nasia Ma Ta Kɛnyɛyia Gboto Le Na

Nunga gbotoma ta gohunɛ lɔ wa ngowi yekpi ma mua nde ti ma ji ta humɛi ti nda gɛnyɛyiei hu. A wue lɔ kɛ na va mia Jɛhova hugbatɛ wueni Pɛtikɔsi vui na ma 33 C.E., kɔ nasia “hɛmadihoubla a tie, ti gbuani kɛnyɛi gbi . . . hu ngelebu,” ti ngowi yekpe humɛi ti “nda gɛnyɛyiɛi hu,” sia bɛ a wue lɔ kɛ tia bɛ ti yɛɛ a Hiiblu ɔɔ Giiliki yiei le. (ToW 2:​5, 8) Kakei nasia ta kɛnyɛyia gboto le na ha, jamaa nasia ta komɛ hou kɛnyɛyia ngila ngila hu ta Ngewɔ layiei le lɔ ye kakei nasia ma. Ngewɔ layia leblei nasia ti ye jamaa nasia nyikɔ hu, ta ye yenge a ngooyia kɔ ti Ngewɔ layiei le a pili na nunga tɛɛ gbaha a ti lɔ la ɔɔ wolo la ti ma?

  • A nguhitɛ wue (Sal 15:​22): Kungɔ Ngewɔ layia le hinda mahugbeblei nasia ti ye jamaa nasia hu, ti yɛpɛ kɔlongɔ pili na ma mahoungɔ ti Ngewɔ layiei le la ye tatei nasia hu. Jamaa lɛnga ta lo lɔ jamaa yekeisia ti windɛ pɛɛ nasia mahu nahi ye nunga ta kɛnyɛyiei na le tia ta komi hou hu. Kɛɛ na hu gbi, ina ti tɔnga kɛ tɛɛ gu taa fo ye nungei nasia kpɛlɛ ma, kɛnga tɛɛ lo wu windɛ pɛɛ gbi mahu, kɛɛ ta lo lɔ wu pie ti kɔɔ ina wu bɛilɔ numu ma a kɛnyɛyiei na le tia ta komi hou hu tao ngi gohunɛingɔ ngowi yekpi ma. (od-E kɔl. 93, njw. 37) Ɔɔ kɛnga ta jamaa yekanga mamɔlilɔ gbɔ va ti ma kɔ ti nungei nasia gɔkoi ta kɛnyɛyiei na le tia ta komi hou hu tao ti ti adɛsisia ve ti wɛ. (km-E 7/12 kɔl. 5, kɛ ye bɔsi) A nda nɛmahu kɛ pɛɛ la lɛnga, nunga ta yɛɛ na ta kɛnyɛyia ngila ngila le. Mahoungɔ hugbatɛ gbi yaa wuema, i yɛ loni lengahu a sawei nasia ti ye ndɔɛ hu.

  • A yenge a ngooyia (Ɛfɛ 4:​16): Jia a na gbi Ngewɔ layia le hinda mahugbemui a nde bi ma. Bia Baibu gaa wuema a numu nahi kɛnyɛyiei na a nde vui wa, ta yana wua yɛ ndema wu jamaa hu? A wue lɔ lɔɔ kɛ ye numui na a lɛ lɔ gulɔma fulo fulo ina bi pie lɔ numui na jamaa na hu ta ngi gɛnyɛyiei le na, i ngi gaa a Baibui.

  • Magbatei wue (Sal 15:​28; 16:​1): Bi numu mainga nahi a kɛnyɛyia yeka le, lapi kɔ bi ngowi yekpi le ngi ma. Ba bi magbatɛ lɔ a ji ba gii a kɛnyɛyiei nasia nunga ta nde mia wua Ngewɔ layiei le na, tao bi Baibui, bukuisia, kɛ viduisia daulodi ye kɛnyɛyiei nasia hu. Ba JW Language app yayenge lɔ kɔ bi gaa a fami wue la kɛnyɛyiei lɛnga hu.