Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 Kaa ye 3

Ngowi Yia Yekpi Ji Gbuama Vui Ye Gama Lɔ?

Ngowi Yia Yekpi Ji Gbuama Vui Ye Gama Lɔ?

1. Ye layia mia vui Baibui hu?

Ngowi yia yekpe lɔ Baibui hu, kɛ nunga ta yɛlɔ ndunyi ji hu kunafɔ va. (Saam 37:29) Buku 66 mia Baibui hu. Nunga ti 40 mia Ngewɔ ti looni kɔ ti Baibui nyɛin. Jɛnɛsis haŋ i too ma Dutɛrɔnɔmi, Mosis mia ti nyɛini fo 3,500 lewengɔ woma. Jɔn mia kɛlɛma bukui nyɛini Baibui hu, fo 1,900 lewengɔ woma. Ye layia mia ti nyɛin Baibui hu? Ngewɔ mia yɛ a yɛpɛ ti gama, a ngi yafa yekpi huwue, kɔ ti Baibui nyɛin. (II Samuɛl 23:2) Ti layia yana ta nyɛin, Ngewɔ layei mia. Ji kpɛlɛ kɛ ma lɔ, kɛ Jɛhova layei mia Baibui hu.II Timɔti 3:16; II Pita 1:20, 21 gaa.

2. Gbɔɔ vui a kɛ, kɛ tɔnya mia Baibui hu?

Baibui a yɛpɛɛ kɔlongɔ nama kinii wama wuema kulɔma, nahin ɛɛ kpulanga gbi. Ji kɛma lɔ kɛ Ngewɔ layei mia Baibui hu. Numu gbi ɛɛ gu a na wue. (Jɔsua 23:14) Mahin Ngewɔ yakpe mia lee a gu i nde muma, yena wama wue ma kulɔma.Aisaia 42:9; 46:10 gaa.

Baibui gba bukui kpɛlɛ ma. Baibui nyɛingoi kɛnyɛyia gboto hu. Tao, sia bɛɛ ti Baibui nyɛinga wɔɔ kpɔ, a yɛpɛɛ kɔlongɔ ndunyama hindeisia ma ɔɔ Sayɛnsi. Sia bɛɛ nasia ti Baibui nyɛini hinda yakpe yana ta gbuana, tii mawai houni kɔlongɔ na ma ti nyɛini. * I yama gbɔma, yena Baibui ndeni kɔlongɔ ndoma ma, a gbua lee tɔnya, kɛ ndoma Yewɔwai gama lɔ. Tao Baibui a gbɔ nunga ma, kɔ ti gbe ti wuehinda nyamuisia ma. Ye tɔnyi jisia ti gbɔnga nunga gboto ma, kɔ ti lala kɛ Baibui Ngewɔ layei mia.I Tɛsaloniabla 2:13 gaa.

 3. Gbɛ mia Baibui yɛpɛ ma kɔlongɔ ma?

Baibui yɛpɛ ma lɔ kɔlongɔ kpekpeyei nama Ngewɔ nɛmahu nuvuisia va. Baibui hungɛilɔ sia nuvui ye baani a ndunyama Alijɛni, tao sia i ye wama majɔɔ ma gbɔma.Hinda Gɛngɔ 21:4, 5 gaa.

Saweisia, kɛ ndahinga lɔ Baibui hu. Baibui a Ngewɔ hinda hungɛ lɔ a mue, tao a tɔmaselinga gɛlɔ a mue sia Ngewɔ ye wɔɔ yɛ a jia a nunga. Baibui a gbɔ bi ma bi Ngewɔ gɔɔ, tao a kɛlɔ sia ba ye wote a Ngewɔ ndiamui.Saam 19:7, 11; Jeems 2:23; 4:8 gaa.

4. Ba ye gu bi kɔɔ gbɛ mia vui Baibui hu?

Bukui ji a gbɔ bi ma bi kɔɔ na vui Baibui hu. Sia lee wɔɔ Yesu yɛ a pie la, bukui ji a Baibu bukui ye ngui, kɛ ye kpambi gama gɛlɔ, tao a hungɛ lɔ na ti loni fa.Luuk 24:27, 45 gaa.

Gbɛogbɛ gbi na aa hinti ngowi yia yekpi ji hu. Kɛɛ nahu gbi, numu kpɛlɛ yana ti gohu aa yɛ nɛima ye ngowi yia yekpi ji ma. Kɛɛ, na aa bi lii nyani, gbɛva see, kɔ bi kunafɔ lɛvui majɔɔ, kungɔ bi kaa wue kɔlongɔ Ngewɔ ma.Jɔn 17:3 gaa.

 

^ kɔlɔ wumbumi 7 Bukui ji gaa, A Book for All People.