Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 Kaa ye 12

Ba Ye Gu Bi Wote a Ngewɔ Ndiamui?

Ba Ye Gu Bi Wote a Ngewɔ Ndiamui?

1. Hɛwuisia kpɛlɛ mia Ngewɔ a wolo ma?

Ngewɔ longɔ nunga gbi ti hɛ ngi gama. (Saam 65:2) Kɛɛ, hɛwuisia kpɛlɛ yana aa yɛ woloma ma, tao aa yɛ ndahou ma. Tɔmasei yila lɔ a ji, hindui na ɛɛ ngi nyahin houpanda, Ngewɔ ɛɛ ngi hɛwuisia lahou. (I Pita 3:7) Ji Isuɛlbleisia ti yɛ a hinda nyamuisia wue, Ngewɔ ii yɛ a wolo ti hɛwuisia ma. Kɛ nahugbi, nasia ta woove ti wuehinda nyamuisia ma, Ngewɔ a ti hɛwuisia lahou lɔ. Tɔnya, hei pele yekpe mia yɛpɛ va Ngewɔ gama. Fale mua klua kɔlɛ hu.Aisaia 1:15; 55:7 gaa.

2. Mua ye hɛ Ngewɔ gama?

Jɛhova mia lee kungɔ mu hɛ ngi gama, jifa ta mia mu gbatɛni, tao ta yakpe mia tɔnya Yewɔwai a ngie. (Matiu 4:10; 6:9) Jifa jumbubla mia a mue, famia kungɔ mu hɛ Yesu biyei hu, gbɛva, ta mia haani mu jumbuisia va. (Jɔn 14:6) Jɛhova longɔ mu hɛwuisia ti gbua mu lii hu, famia ii loni ji mua njɛpɛ yia le a wati gbi lee.Matiu 6:7; Filipaibla 4:6, 7 gaa.

Ina bɛɛ mui hɛni ngeeya, mu hɛnga mu lii hu, Ngewɔ a mu womɛilɔ. (I Samuɛl 1:12, 13) Ngi longɔ mu hɛ ngi gama a wati gbi lee. Sia nyikɔ mu wunga a gendei, mu ya lama a kpindi, mu ya mɛhɛ mɛ ma, kɛ, ji mua yɛ kiti hu.Saam 55:22; Matiu 15:36 gaa.

3. Gbɛva mia nasia ti tooma Yesu ma a tɔnya ta gomɛ hinda yila?

Wote va a Ngewɔ ndiamui ii bɛbɛni, gbɛva, lanayia gbii nunga gbotoma hu ha Ngewɔ va. Tao, nunga tii lani la  kɛ Ngewɔ a waa a ndilɛli ndunyi ji hu. (II Timɔti 3:1, 4; II Pita 3:3, 13) Famia kungɔ mu gomɛ hinda yila mu nyɔunyɔu lii nɛpɔ va.Hiibrublɛisia 10:24, 25 gaa.

Mu lalanga Ngewɔ ndiamuisia gblanga, na a gbɔ mu ma, kɔ mu wote a Ngewɔ ndiamui. Ji Jɛhova Jeliwuableisia ta gomɛ Ngewɔ vɛi va, ti lanayei a ti nyɔunyɔu lii nɛpɔ lɔ.Romablɛisia 1:12 gaa.

4. Ba ye wote a Ngewɔ ndiamui?

Wua Jɛhova wu ndiamɔyei a gbakpau lɔ, ji ba ngi Layei gaa, tao bi hei bi gili a na bi kaanga. Wati lɛnga, a nyande lɔ mu hei mu gili, a ndahin nasia Jɛhova fenga mu wɛ, hindei nasia i pienga, na i pie ma, kɛ na i wama pie ma. Mua kɔɔ lɔ kɛ Ngewɔ longɔ a mue, tao ngi nɛmahu leengɔ, ji mua hei mu gili a ngi yenge lukuisia, tao ji mua hɛ ngi gama.Jɔsua 1:8; Saam 1:1-3 gaa.

Kungɔ bi lanayia, kɛ lilooma wu Ngewɔ hu. Na mia a pie ndiamɔyei i lɛ gulɔma. Bi lanayei a yɛɛ kpau ji ba Ngewɔ Layei gaa wati gbi lee, bi hei bi gili a na ba kaa, tao ji ba hɛ ngi gama.Matiu 4:4; Hiibrublɛisia 11:1, 6 gaa.

5. Nafei ye gbɔɔ ba majɔɔ ji ba wote a Ngewɔ ndiamui?

Jɛhova gbeengoi nasia va ti longɔ a ngie. Tao, a ti mahugbe lɔ hinda gbi lee ma a ti lanayei vawei, kɛ ti kunafɔ lɛvu majɔɔ lei. (Saam 91:1, 2, 7-10) A mu lahin lɔ kɔlongɔ hindei nasia ma kungɔ mu woove ma, kɔ mu kohunɛ, kɛ kahungbua yekpe majɔɔ. Jɛhova mia lee a pele yekpe gɛ a mue.Saam 73:27, 28; Jeems 4:4, 8 gaa.