Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 Kaa ye 15

Gbɛva Mia Kungɔ Bi Kaa Ji Madihou?

Gbɛva Mia Kungɔ Bi Kaa Ji Madihou?

1. Nafei ye gbɔɔ ba majɔɔ ji ba lɛ gulɔma a Baibui gaa la?

A tɔnya, hindei jisia kpɛlɛ bi kaanga Baibui hu, i pienga ndomi bi lii hu Jɛhova va i yɛa kpau. Kɔ ndomi na bi lii hu Ngewɔ va i lola, kungɔ bi kaa ji madihou. (I Pita 2:2) Lɛ gulɔma a Baibui gaa la, kɔ bi wote a Ngewɔ ndiamui. Na mia a wue bi kunafɔ lɛvui na majɔɔ bi lii looni ma.Jɔn 17:3; Juud 21 gaa.

Sia lee ba lɛ gulɔma a kaa ji, himia bi lanayei a gbaya. Bi lanayei a gbɔ bi ma bi Ngewɔ gohunɛ. (Hiibrublɛisia 11:1, 6) I yama gbɔma, a pie lɔ bi woove bi wue hinda nyamuisia ma, tao bi kpekpeya wue.Toobla ti Wiehindɛisia 3:19 gaa.

2. Ngewɔ layei ji bi kaa ma, a ye nunga yekeisia nafa?

Ndiamɔya yekpe a gu lɔ i yɛ wua Jɛhova luahu

Gbama hu bɛɛ, ba lolɔ bi nunga gaa a na bi kaanga. Mu kpɛlɛ mu gohu a nɛilɔ ji mua ngowi yia yekpi le. Sia ba yɛ lɛma gulɔma a Baibui gaa la, himia ba kɛ a nunga, kɛ lanayia lɔ bi hu Jɛhova va. Tao himia ba kɛ, kɛ bi langoi a na bi kaa ma.Romablɛisia 10:13-15 gaa.

Nunga lɛnga ta tato a ngowi yia yekpi ji le la ti bondeisia maa, ɔɔ ti ndiamuisia ma. Kɛɛ, ii nyandeni mu ngowi yia yekpi ji le a kpaya. Kɛɛ, kungɔ mu nde ti ma, na Ngewɔ wama piema mu va klɔma. Tao, giila kɛ nunga ti gohu a nɛilɔ bi wuehinda yikpi ma, i lee na ma ba nde ti ma.II Timɔti 2:24, 25 gaa.

3. Nafei yegbɛ mia ba majɔɔ, ji ba Ngewɔ Layei gaa?

Sia lee ba yɛ Ngewɔ Layei gaa ma, himia ndomi bi lii hu ngi va a yɛ kpau. A tɔnya, ba wote lɔ a Jɛhova ndiamui, bi ngi Layei gaanga.II Kɔrintabla 6:18 gaa.

 4. Ba ye gu bi lɛ gulɔma a Jɛhova vɛi lei?

Sia lee ba ye Baibui gaa ma, himia ndomi bi lii hu Ngewɔ va a lɛ gulɔma. (Hiibrublɛisia 5:13, 14) Jɛhova Jeliwuableisia ye ngla mɔli, kɔ i bi gaa a Baibui bukui ji hu, Gbɔɔ Vui Baibui Ndeni? Sia lee ba yɛ Ngewɔ Layei gaa ma, himia ba ndilɛli majɔɔ.Saam 1:1-3; 73:27, 28 gaa.

Ngowi yekpi ji gbuani Jɛhova gama lɔ, ndoma Yewɔwai. Sia lee ba yɛ lima Jɛhova Jeliwuableisia ti gomɛmi ɔɔ Mahaya Wɛɛ la, himia ndomi bi lii hu Ngewɔ va a lɛ gulɔma. (Hiibrublɛisia 10:24, 25) Bi lɛnga gulɔma a Jɛhova liima hindei wuela a bi lii kpɛlɛ, na a kɛlɔ, kɛ bia lapi ma, kɔ bi kunafɔ lɛvui majɔɔ. Ngewɔ ndiamɔyei leeni ndiamɔyei kpɛlɛ ma ba majɔɔ.I Timɔti 1:11; 6:19 gaa.