1. Gbɛva mia kungɔ heinyɔyei hu i gbatɛ sawei gɔɔbu?

Ngowi yekpi ji gbuani Jɛhova gama lɔ, kohunɛ ma Yewɔwai. Na ngi longɔ bondeisia kpɛlɛ ti yɛ kohunɛ hu. (I Timɔti 1:11) Ta mia heinyɔyei gbɔkuni. Ji mua heinyɔyei hu gbatɛ sawei gɔɔbu, a waa a kohunɛ ndi hu, tao a pie lɔ wu ndenga makɛ a pili na ta gbua kpekpengɔ. Nasia ti longɔ ti wolo Ngewɔ ma, kungɔ ti ndɔɔ hu jawei hou kɔlongɔ heinyɔyei ma. (Luuk 2:1, 4, 5)

Gbɛ mia Ngewɔ giliyei le heinyɔyei va? Ngewɔ longɔ hindui tia ngi nyahin ti yɛ na kunafɔ va ti lɛvui hu. Jɛhova ii loni a puegbualei. (Hiibrublɛisia 13:4) Jɛhova juuyangoi a ji hindui a gbele ngi nyahin ma, ɔɔ ji nyahin a gbele ngi hini ma. (Malakai 2:16) Kɛɛ, Jɛhova a luma lɔ ti gɔlɛ ina ye ngila puegbua.Matiu 19:3-6, 9 gaa.

2. Hindui tia ngi nyahin, ta ye ti nyɔunyɔu hou?

Jɛhova hindui tia nyahin gbatɛilɔ kɔ ti gbɔ ti nyɔunyɔu ma. (Jɛnɛsis 2:18) Jifa hindui mia looni bonda hindei gulɔ, ta mia kungɔ i kpɔma wue kɔ ngi mableisia ti mɛhɛ mɛ, ti klua yii, tao ti la ndama yekpe. I yama i ti gaa kɔlongɔ Ngewɔ ma. Kungɔ hindui i lo a ngi nyahin a ngi lii kpɛlɛ. Kungɔ ti lo a ti nyɔunyɔu, tao bagɔɔma i yɛ ti yeya ti nyɔunyɔu va. Sia jumbubla mia a mue, kungɔ nyahajɔɔbla, kɛ hinjɔɔbla ti ya ti nyɔunyɔu ti jumbuisia kafai, ji a wa a kohunɛ kɛ ndilɛi heinyɔyei hu.Ɛfɛsubla 4:31, 32; 5:22-25, 33; I Pita 3:7 gaa.

3. Ma hoingoi bi gbua heinyɔyei hu jifa kohunɛ gbii na?

Kungɔ wu ndoma gɛ a wu nyɔunyɔu ina njianjiei lɔ wu heinyɔyei hu. (I Kɔrintabla 13:4, 5) Ngewɔ Layei ii ndeni  yɛ kɛ ji wua gɔlɛ ta mia a pie njianjiei i gbɔyɔ heinyɔyei hu.I Kɔrintabla 7:10-13 gaa.

4. Ndengeisia, gbɛ mia Ngewɔ longɔ la wu va?

Jɛhova longɔ wu gohu i nɛɛ. Famia bɛɛ, i ndahin yekpe venga wu wɛ, sia wa ye gu wu yɛ kohunɛ hu a wati na wu voningengɔ. Jɛhova longɔ wu nafa nɛmahuli na hu wu lebla yeya. (Kɔlɔsiabla 3:20) Jɛhova tia Yesu longɔ wu kɔɔ, kɛ wua kohunɛ majɔɔ lɔ, ji wua ti yingi wue.Ɛkkliisiastiis 11:912:1; Matiu 19:13-15; 21:15, 16 gaa.

5. Ndebla, gbɔɔ wua pie kɔ wu lengeisia ti kohunɛ majɔɔ?

Ndebla, kungɔ wu yenge vui kɔ mɛhɛ, ngima haiŋ, kɛ ndami i yɛ na wu lengeisia va. (I Timɔti 5:8) Kɛɛ, kɔ ndenga ti kohunɛ majɔɔ gbɔma, kungɔ wu ti gaa sia ta ye lo a Jɛhova. (Ɛfɛsubla 6:4) Ndomi na wua kɛ Ngewɔ va, a yɛ a tɔmasei lɔ wu lengeisia va. Wu Ngewɔ Layei gaanga, wua gulɔ wu gbɔ wu lengeisia ma, kɔ ti kiiyia yekpe wue kɔlongɔ Ngewɔ ma.Dutɛrɔnɔmi 6:4-7; Saleisia 22:6 gaa.

Ndengeisia ti gohu a nɛilɔ ji ti lebla ta ti lato hinda yekpisia va ta pie, tao ji ta ti lii nɛpɔ. Kungɔ ndebla ti ya makɛ yekpe wu ti lengeisia hu. Ye makɛ yekpi na a ti mahungbe lɔ, kɔ ta loko wui hinda gbi hu, na a wa a ndii nyani ti gama. (Saleisia 22:15) Kɛɛ wua kpalɛ la wu lengeisia ma ji wa yɛ ti makɛ ma.Kɔlɔsiabla 3:21 gaa.

Jɛhova Jeliwuableisia ti buku gbotonga gbatɛa, kɔ ti gbɔ wu ndebla ma, kɛ wu lengeisia. Njɛpei nasia kpɛlɛ ti ye bukui jisia hu, ti gbuani Baibui hu lɔ.Saam 19:7, 11 gaa.