1. Gbɛva mia Ngewɔ Isuɛlbleisia wumbui wɔɔ, kɔ ti wote a ngi nunga?

Ngewɔ Eblaham lengeisia wumbuilɔ i ti wote a kɛnyɛwui, kɛ i ti loinga a “Isuɛl.” Ngewɔ saweisia veilɔ ti wɛ. Tia mia lee ti yɛ a Ngewɔ vɛi a pɔna, tao ti woteilɔ a Ngewɔ jawa houbla. (Saam 147:19, 20) Famia, kɛnyɛisia gbi ta nafa jɔɔ Isuɛl hu lɔ.Jɛnɛsis 22:18 gaa.

Ngewɔ Isuɛlbleisia ti wumbuilɔ, kɔ ti wote a ngi jeliwuabla. Na kinii wueni ti wati na hu, i kɛ ma lɔ kɛ nafa a yɛ nasia va ta Ngewɔ jaweisia hou. (Dutɛrɔnɔmi 4:6) Fale, mua gulɔ mu tɔnya Yewɔwai gɔɔ panda, ji mua kaa wue kɔlongɔ Isuɛlbleisia ma.Aisaia 43:10, 12 gaa.

2. Gbɛva mia ha Ngewɔ longɔ ngi mableisia ti yɛ ngooyia hu?

Wati lɛnga woma, Ngewɔ gbuailɔ Isuɛlbleisia ti woma, jifa tii ya yɛ a ngi layei mɛini, kɛ i wotenga Klistimableisia gama. (Matiu 21:43; 23:37, 38) Nasia Klistimableisia a tie a tɔnya, tia mia naa Jɛhova ti wumbua, kɔ ti wote a seliwuableisia ngi va.Toobla ti Wiehindɛisia 15:14, 17 gaa.

Yesu ngi womableisia looilɔ, kɔ ti Ngewɔ layei le, tao kɔ ti nunga wote a topomabla kɛnyɛwuisia gbi hu. (Matiu 10:7, 11; 24:14; 28:19, 20) Ngingi ji wama gɛlɛma sange, jifa mu ndunyi ye kɛlɛmi lɔ. Sia wɔɔ gba, hala wati lɔ Jɛhova i nunga miliɔn gboto lɛnga ma kɛnyɛwuisia kpɛlɛ hu, kɔ ti ngi vɛi a tɔnya. (Hinda Gɛngɔ 7:9, 10) Nasia Klistimableisia a tie a tɔnya, ta ti nyɔunyɔu lii nɛpɔ lɔ, tao ta gbɔ ti nyɔunyɔu ma. Kaa yakpe mia ta majɔɔ Baibui hu, ndunyi hu kpɛlɛ.Hiibrublɛisia 10:24, 25 gaa.

 3. Jɛhova Jeliwuableisia ti na ha, ti hugbatei ye latoni?

Nunga lɛnga ti yɛ a ti loli a Baibu Gaalupuisia, ti lɛilɔ ma 1870 hu, kɛ ti tatonga a Baibui hu vɛsɛ la. Na wuelɔ ti tato a tɔnyi majɔɔ la gbɔma. Sia lee ti kɔɔni, kɛ Yesu ngi mableisia loilɔ kɔ ti Ngewɔ layei le, tia bɛɛ ti tatoilɔ a Ngewɔ layei lela ndunyi hu kpɛlɛ. Jɛhova Jeliwuableisia ti biyei ji wumbuni 1931 hu lɔ.Toobla ti Wiehindɛisia 1:8; 2:1, 4; 5:42 gaa.

4. Jɛhova Jeliwuableisia ti hungbatei ye na?

Ji Klistimableisia ti tatoni hala, ti nafa jɔɔilɔ, jifa nasia ti yɛ a Ngewɔ layei lelei mahugbe a wati na, ti yɛ kɔɔ lɔ kɛ Yesu mia Looni ti Gulɔ. (Toobla ti Wiehindɛisia 16:4, 5) Ndunyi hu kpɛlɛ ha, Jɛhova Jeliwuableisia bɛɛ lɔ nafa jɔɔ ma Guma Gbakuisia hu. Tia mia ti gingi kpɛlɛ mahugbe ma, Jɛhova Jeliwuableisia ta pie ti yenge bikisia hu. Ye ngenge biki jisia lɛnga hu mia, ta ti bukuisia gbatɛ na, ta kpua puyei hu, ta pote kɛnyɛyia yekanga hu, nahin teengɔ 600 ma. Guma Gbakuisia mia ta Jɛhova Jeliwuableisia ti lii nɛpɔ a Ngewɔ Layei, ndunyi hu kpɛlɛ. Tao tia mia ta pele gɛ a tie na kungɔ ti jiala. Jɛhova Jeliwuableisia ti Jamaa gbi hu, hingei nasia ta Ngewɔ yingi madihou, ta yɛɛ a Ngewɔ mabla ti mahugbebla ɔɔ kpakuisia. Tao ta pielɔ a ndoma.I Pita 5:2, 3 gaa.

Jɛhova Jeliwuableisia tia ha Ngewɔ layei lema nunga ma, sia lee wɔɔ topomableisia ti yɛ a piela. (Toobla ti Wiehindɛisia 20:20) Nasia ti longɔ ti tɔnyi gɔɔ Baibui hu, mua lilɔ ti wɛɛsia la ti gaa va. Jɛhova Jeliwuableisia mu kpɛlɛ bonda yia mia a mue, tao mu Kɛkɛ yia, tamia a Jɛhova. Mu kpɛlɛ ndeenga mia a mue, tao mu gbeengoi mu nyɔunyɔu va. (II Tɛsaloniabla 1:3) Jɛhova mableisia ti gohunɛini i lee bonda yekeisia kpɛlɛ ma ndunyi ji hu. Jifa ta Ngewɔ liima hindei wue, tao ta gbɔ nunga ma.Saam 33:12; Toobla ti Wiehindɛisia 20:35 gaa.