Li mia haiŋ kpɛlɛ na

Li mia kɔlɔngui yepekeisia kpɛlɛ ti na

Jɛhova Jeliwuablesia

Kɛnyɛyei wumbu Mɛnde

 Kaa ye 5

Gbɛva Mia Ngewɔ Ndunyi Ji Gbatɛni?

Gbɛva Mia Ngewɔ Ndunyi Ji Gbatɛni?

1. Gbɛva mia Ngewɔ ndunyi ji gbatɛni?

Jɛhova ndunyi ji gbatɛni mu va lɔ. Famia ji i Adam tia Iv gbatɛni, i ti wuni ndunyi ji hu lɔ, kɛɛ, maikeisia mia i ti gbatɛi ngelegohu va. (Joob 38:4, 7) Kata nyande wa hu mia Ngewɔ na gbatɛni, kɛ i Adam wuana, nahin na lei mia a Idɛn. (Jɛnɛsis 2:15-17) Jɛhova ti gbatɛilɔ kɔ ti yɛ ndunyi ji hu kunafɔ va.Saam 37:29; 115:16 gaa.

A wati na, Idɛn mia Ngewɔ na gbatɛni a alijɛnɛ. Adam tia Iv lengeisia ta yɛlɔ a ndunyi ji lave, tao ta yɛɛ a na wote a alijɛnɛ. (Jɛnɛsis 1:28) Ndunyi ji ɛɛ nyani kunafɔ va. Mu yetahun mia kunafɔ va.Saam 104:5 gaa.

2. Gbɛva mia ndunyi Alijɛnɛ yana naa?

Adam tia Iv tii woloni Ngewɔ layei ma, nava mia Jɛhova ti gbɛni katei na hu. Mu bailɔ a ndunyama Alijɛni, tao numu gbi ii ya guni ndunyi ji wote va a alijɛnɛ. Baibui ndeilɔ yɛ: “Ndunyɛi vengɔe jumbubla yeya.”Joob 9:24.Jɛnɛsis 3:23, 24 gaa.

Kpayagbi Yewɔwai Jɛhova, ii ya lemani gbi nama ngi lii hu nuvuisia va. Tao, hinda gbi lee i ndenga, a pie lɔ. (Aisaia 45:18) Ta tuŋ Ngewɔ nɛmahu, kɔ i wa a ndunyama Alijɛni.Saam 37:11, 34 gaa.

3. Nuvui a ye gbɔma ndunyama Alijɛni na majɔɔ?

Nuvui a ndunyama Alijɛni na majɔɔ lee, ji Ngewɔ a Yesu wote a Maha ndunyi ji mahu. Kɔ na i wue, Yesu tia ngi maikeisia, ti wama kɔ wɛɛ ma nasia ma bagɔɔma gbii ti yeya Ngewɔ va. Ye koi na biyei mia, a Amagɛdɔn. I gbua  nama, Yesu a Setana magba lɔ fo 1,000 va. Nasia ti Ngewɔ va, tɛɛ haa koi na hu, Yesu a ti mabawolɔ. Ta yɛlɔ ndunyama Alijɛni hu kunafɔ va.Hinda Gɛngɔ 20:1-3; 21:3, 4 gaa.

4. Migbe mia mɔni a gbɔyɔ ndunyi ji hu?

Migbe mia Ngewɔ a hinda nyamuisia gbua ndunyi ji hu? Yesu sawulanga gɛilɔ kɔlongɔ hindei nasia ma ta wue, ji kɛlɛma vuisia ta yɛ lukpe ma gblanga. Hindei jisia kpɛlɛ ti wue ma ha ndunyi hu, ti kɛma lɔ kɛ kɛlɛma vuisia mia naa mu hu.Matiu 24:3, 7-14, 21, 22 gaa.

Fo 1,000 na va Yesu a yɛ Mahayia hu ngelegohu, a kpagba kpɛlɛ gbɔyɔ lɔ ndunyi ji hu. (Aisaia 9:6, 7; 11:9) I gbua nama, Yesu a mu jumbuisia kpɛlɛ gbua mu ma. Tao ngi huwue mia, Ngewɔ a hingbei, kɛ hei gbua mu ma, tao numu gbi ɛɛ ya wova.Aisaia 25:8; 33:24 gaa.

5. Yeni mia ta yɛ ndunyama Alijɛni na hu?

Bi ya Mahayia Wɛɛ la, ba nunga mɛilɔ ti longɔ a Ngewɔ, tao ti longɔ ti gaa sia ta ye ngi liima hindei wue

Nasia ta Ngewɔ layei mɛni, tia mia ta yɛ ndunyama Alijɛni na hu. (I Jɔn 2:17) Yesu ngi womableisia looilɔ, kɔ ti nasia lɔlɔ ti mayeingɔ, tao titi gaa sia ta ye wote a Ngewɔ ndiamuisia. Ha bɛɛ, Jɛhova lɔ nunga gboto gaama sia ta ye gu ti yɛ ndunyama Alijɛni na hu. (Sɛfanaia 2:3) Jɛhova Jeliwuableisia ti gomɛmi, ta na loli a Mahayia Wɛɛ, hinga tia nyahanga lɔ kaa wue ma, sia ta ye wote a ndebla yekpenga. Ndebla tia ti lengeisia ta Ngewɔ vɛli hinda yia lɔ, tao ta gaa sia ta ye nafa majɔɔ kɔlongɔ nama ti kaa ma.Maika 4:1-4 gaa.